Yashaayaah 49

rabb ka paighambar aqvaam ka noor hai

¹ai jazeero, suno! ai doordaraaz qaumo, dhyaan do! rabb nay mujhay paidaaish say pahelay hee bulaaya, meree maan kay pet say hee meray naam ko yaad karta aaya hai. ²us nay meray munh ko tez talvaar bana kar mujhay apnay haath kay saay men chhupaaay rakha, mujhay tez teer bana kar apnay tarkash men posheeda rakha hai. ³vah mujh say hamkalaam hua, “too mera khaadim israaeel hai, jis kay zareeay main apna jalaal zaahir karoonga.”

⁴main to bola tha, “meree mehanat-mashaqqat besood thee, main nay apnee taaqat befaaida aur bemaqsad zaaay kar dee hai. taaham mera haqq allaah kay haath men hai, mera khuda hee mujhay ajr dega.”

⁵lekin ab rabb mujh say hamkalaam hua hai, vah jo maan kay pet say hee mujhay is maqsad say tashkeel deta aaya hai ki main us kee khidmat karkay yaaqoob kee aulaad ko us kay paas vaapas laaoon aur israaeel ko us kay huzoor jama karoon. rabb hee kay huzoor mera ehatiraam kiya jaaega, mera khuda hee meree quvvat hoga. ⁶vahee farmaata hai, “too meree khidmat karkay na sirf yaaqoob kay qabeelay bahaal karega aur unhen vaapas laaega jinhen main nay mahfooz rakha hai balki too is say kaheen badh kar karega. kyoonki main tujhay deegar aqvaam kee raushnee bana doonga taaki too meree najaat ko duniya kee intiha tak pahunchaaay.”

⁷rabb jo israaeel ka chhudaanay vaala aur us ka quddoos hai us say hamkalaam hua hai jisay log haqeer jaantay hain, jis say deegar aqvaam ghin khaatay hain aur jo hukmaraanon ka ghulaam hai. us say rabb farmaata hai, “tujhay dekhtay hee baadshaah khaday ho jaaengay aur raees munh kay bal jhuk jaaengay. yah rabb kee khaatir hee pesh aaega jo vafaadaar hai aur israaeel kay quddoos kay baais hee vuqoopzeer hoga jis nay tujhay chun liya hai.”

⁸rabb farmaata hai, “qabooliyat kay vaqt main teree sunoonga, najaat kay din teree madad karoonga. tab main tujhay mahfooz rakh kar muqarrar karoonga ki too meray aur qaum kay darmiyaan ahd banay, ki too mulk bahaal karkay tabaahashuda mauroosee zameen ko naay siray say taqseem karay, ⁹ki too qaidiyon ko kahay, ‘nikal aao’ aur taareekee men basnay vaalon ko, ‘raushnee men a jaao!’ tab meree bheden raaston kay kinaaray kinaaray charengee, aur tamaam banjar bulandiyon par bhee un kee haree haree charaagaahen hongee. ¹⁰na unhen bhook sataaegee na piyaas. na taptee garmee, na dhoop unhen jhulasaaegee. kyoonki jo un par taras khaata hai vah un kee qiyaadat karkay unhen chashmon kay paas lay jaaega. ¹¹main pahaadon ko hamvaar raaston men tabdeel kar doonga jabki meree shaaharaahen oonchee ho jaaengee. ¹²tab vah doordaraaz ilaaqon say aaengay, kuchh shimaal say, kuchh maghrib say, aur kuchh misr kay junoobee shaher asvaan say bhee.”

¹³ai aasmaan, khushee kay naaray laga! ai zameen, baagh baagh ho ja! ai pahaado, shaadmaanee kay geet gaao! kyoonki rabb nay apnee qaum ko tasallee dee hai, usay apnay museebatzada logon par taras aaya hai.

rabb apnee qaum ko kabhee naheen bhoolegaa

¹⁴lekin siyyoon kahetee hai, “rabb nay mujhay tark kar diya hai, qaadir-ay-mutlaq mujhay bhool gaya hai.”

¹⁵“yah kaisay ho sakta hai? kya maan apnay sheerakhwaar ko bhool saktee hai? jis bachchay ko us nay janm diya, kya vah us par taras naheen khaaegee? shaayad vah bhool jaaay, lekin main tujhay kabhee naheen bhooloonga! ¹⁶dekh, main nay tujhay apnee donon hatheliyon men kanda kar diya hai, teree zameenabos deevaaren hamesha meray saamnay hain.

¹⁷jo tujhay naay siray say taameer karna chaahatay hain vah daud kar vaapas a rahay hain jabki jin logon nay tujhay dha kar tabaah kiya vah tujh say nikal rahay hain. ¹⁸ai siyyoon betee, nazar utha kar chaaron taraf dekh! yah sab jama ho kar teray paas a rahay hain. meree hayaat kee qasam, yah sab teray zevraat banengay jin say too apnay aap ko dulhan kee tarah aaraasta karegee.” yah rabb ka farmaan hai.

¹⁹“filahaal teray mulk men chaaron taraf khandaraat, ujaad aur tabaahee nazar aatee hai, lekin aainda vah apnay baashindon kee kasrat kay baais chhota hoga. aur jinhon nay tujhay hadap kar liya tha vah door rahengay. ²⁰pahelay too beaulaad thee, lekin ab teray itnay bachchay hongay ki vah teray paas a kar kahengay, ‘meray liyay jagah kam hai, mujhay aur zameen den taaki main aaraam say zindagee guzaar sakoon.’ too apnay kaanon say yah sunegee.

²¹tab too hairaan ho kar dil men sochegee, ‘kis nay yah bachchay meray liyay paida kiay? main to bachchon say maheroom aur beaulaad thee, mujhay jilaavatan karkay hataaya gaya tha. kis nay in ko paala? mujhay to tanha hee chhod diya gaya tha. to phir yah kahaan say a gaay hain’?”

²²rabb qaadir-ay-mutlaq farmaata hai, “dekh, main deegar qaumon ko haath say ishaara day kar un kay saamnay apna jhanda gaad doonga. tab vah teray beton ko utha kar apnay baazooon men vaapas lay aaengay aur teree betiyon ko kandhay par bitha kar teray paas pahunchaaengay. ²³baadshaah teray bachchon kee dekh-bhaal karengay, aur raaniyaan un kee daaiyaan hongee. vah munh kay bal jhuk kar teray paaon kee khaak chaatengay. tab too jaan legee ki main hee rabb hoon, ki jo bhee mujh say ummeed rakhay vah kabhee sharminda naheen hoga.”

²⁴kya soormay ka loota hua maal us kay haath say chheena ja sakta hai? ya kya zaalim kay qaidee us kay qabzay say chhoot saktay hain? mushkil hee say. ²⁵lekin rabb farmaata hai, “yaqeenan soormay ka qaidee us kay haath say chheen liya jaaega aur zaalim ka loota hua maal us kay qabzay say chhoot jaaega. jo tujh say jhagday us kay saath main khud jhagdoonga, main hee teray bachchon ko najaat doonga. ²⁶jinhon nay tujh par zulm kiya unhen main un ka apna gosht khilaaoonga, un ka apna khoon yoon pilaaoonga ki vah usay naee mai kee tarah pee pee kar mast ho jaaengay. tab tamaam insaan jaan lengay ki main rabb tera najaatadihanda, tera chhudaanay vaala aur yaaqoob ka zabardast soorma hoon.”