Yashaayaah 48

rabb apnay naam kee khaatir israaeel ko bachaaegaa

¹ai yaaqoob kay gharaanay, suno! tum jo israaeel kahelaatay aur yahoodaah kay qabeelay kay ho, dhyaan do! tum jo rabb kay naam kee qasam kha kar israaeel kay khuda ko yaad kartay ho, agarchi tumhaaree baat na sachchaaee, na insaaf par mabnee hai, ghaur karo! ²haan tavajjuh do, tum jo muqaddas shaher kay log kahelaatay aur israaeel kay khuda par etimaad kartay ho, suno ki allaah jis ka naam rabb-ul-afwaaj hai kya farmaata hai.

³jo kuchh pesh aaya hai us ka elaan main nay badee der pahelay kiya. meray hee munh say us kee peshgoee saadir huee, main hee nay us kee ittila dee. phir achaanak hee main usay amal men laaya aur vah vuqoopzeer hua. ⁴main jaanta tha ki too kitna ziddee hai. teray galay kee nasen lohay jaisee belachak aur teree peshaanee peetal jaisee sakht hai. ⁵yah jaan kar main nay badee der pahelay in baaton kee peshgoee kee. un kay pesh aanay say pahelay main nay tujhay un kee khabar dee taaki too daava na kar sakay, ‘meray but nay yah kuchh kiya, meray taraashay aur dhaalay gaay devta nay is ka hukm diya.’ ⁶ab jab too nay yah sun liya hai to sab kuchh par ghaur kar. too kyoon in baaton ko maannay kay liyay tayyaar naheen?

ab say main tujhay naee naee baaten bataaoonga, aisee posheeda baaten jo tujhay ab tak maaloom na theen. ⁷yah kisee qadeem zamaanay men vujood men naheen aaeen balki abhee abhee aaj hee teray ilm men aaee hain. kyoonki main naheen chaahata tha ki too kahay, ‘mujhay pahelay say is ka ilm tha.’ ⁸chunaanchay na yah baaten teray kaan tak pahunchee hain, na too in ka ilm rakhta hai, balki qadeem zamaanay say hee tera kaan yah sun naheen sakta tha. kyoonki main jaanta tha ki too saraasar bevafa hai, ki paidaaish say hee namakaheraam kahelaata hai. ⁹to bhee main apnay naam kee khaatir apna ghazab naazil karnay say baaz raheta, apnee tamjeed kee khaatir apnay aap ko tujhay nest-o-naabood karnay say rokay rakhta hoon. ¹⁰dekh, main nay tujhay paak-saaf kar diya hai, lekin chaandee ko saaf karnay kee kuthaalee men naheen balki museebat kee bhattee men. usee men main nay tujhay aazmaaya hai. ¹¹apnee khaatir, haan apnee hee khaatir main yah sab kuchh karta hoon, aisa na ho ki meray naam kee behuramtee ho jaaay. kyoonki main ijaazat naheen doonga ki kisee aur ko vah jalaal diya jaaay jis ka sirf main haqdaar hoon.

rabb israaeel ka najaatadihanda hai

¹²ai yaaqoob kee aulaad, meree sun! ai meray barguzeeda israaeel, dhyaan day! main hee vahee hoon. main hee avval-o-aakhir hoon. ¹³meray hee haath nay zameen kee bunyaad rakhee, meray hee dahenay haath nay aasmaan ko khaimay kee tarah taan liya. jab main aavaaz deta hoon to sab mil kar khaday ho jaatay hain. ¹⁴aao, sab jama ho kar suno! buton men say kis nay is kee peshgoee kee? kisee nay naheen! jis aadmee ko rabb piyaar karta hai vah baabal kay khilaaf us kee marzee pooree karega, baabliyon par us kee quvvat ka izhaar karega. ¹⁵main, haan main hee nay yah farmaaya. main hee usay bula kar yahaan laaya hoon, is liyay vah zaroor kaamyaab hoga. ¹⁶meray qareeb a kar suno! shuroo say main nay alaaniya baat kee, jab say yah pesh aaya main haazir hoon.”

aur ab rabb qaadir-ay-mutlaq aur us kay rooh nay mujhay bheja hai.

¹⁷rabb jo tera chhudaanay vaala aur israaeel ka quddoos hai farmaata hai, “main rabb tera khuda hoon. main tujhay vah kuchh sikhaata hoon jo mufeed hai aur tujhay un raahon par chalnay deta hoon jin par tujhay chalna hai. ¹⁸kaash too meray ahkaam par dhyaan deta! tab teree salaamatee bahetay darya jaisee aur teree raastbaazee samundar kee maujon jaisee hotee. ¹⁹teree aulaad ret kee maanind hotee, teray pet ka phal ret kay zarron jaisa anaginat hota. is ka imkaan hee na hota ki tera naam-o-nishaan meray saamnay say mit jaaay.”

²⁰baabal say nikal jaao! baabliyon kay beech men say hijrat karo! khushee kay naaray laga laga kar elaan karo, duniya kee intiha tak khushkhabaree phailaatay jaao ki rabb nay ivzaana day kar apnay khaadim yaaqoob ko chhudaaya hai. ²¹unhen piyaas na lagee jab us nay unhen registaan men say guzarnay diya. us kay hukm par patthar men say paanee bah nikla. jab us nay chataan ko cheer daala to paanee phoot nikla.

²²lekin rabb farmaata hai ki bedeen salaamatee naheen paaengay.