Yashaayaah 47

rabb baabal ko saza degaa

¹ai kunvaaree baabal betee, utar ja! khaak men baith ja! ai baabliyon kee betee, zameen par baith ja jahaan takht naheen hai! ab say log tujh say naheen kahengay, ‘ai meree naaz-parvarda, ai meree laadlee!’

²ab chakkee lay kar aata pees! apna niqaab hata, apnay libaas ka daaman utha, apnee taangon ko uriyaan karkay nadiyaan paar kar. ³teree barahenagee sab par zaahir hogee, sab teree sharmasaar haalat dekhengay. kyoonki main badla lay kar kisee ko naheen chhodoonga.”

⁴jis nay ivzaana day kar hamen chhudaaya hai vahee yah farmaata hai, vah jis ka naam rabb-ul-afwaaj hai aur jo israaeel ka quddoos hai.

⁵“ai baabliyon kee betee, chupkay say baith ja! taareekee men chhup ja! aainda too ‘mamaalik kee malika’ naheen kahelaaegee.

⁶jab mujhay apnee qaum par ghussa aaya to main nay usay yoon rusva kiya ki us kee muqaddas haalat jaatee rahee, go vah mera mauroosee hissa thee. us vaqt main nay unhen teray havaalay kar diya, lekin too nay un par rahem na kiya balki boodhon kee gardan par bhee apna bhaaree jooa rakh diya. ⁷too bolee, ‘main abad tak malika hee rahoongee!’ too nay sanjeedgee say dhyaan na diya, na is kay anjaam par ghaur kiya.

⁸ab sun, ai ayyaash, too jo apnay aap ko mahfooz samajh kar kahetee hai, ‘main hee hoon, meray siva koee aur naheen hai. main na kabhee beva, na kabhee beaulaad hoongee.’ ⁹main farmaata hoon ki ek hee din aur ek hee lamhay men too beaulaad bhee banegee aur beva bhee. teray saaray zabardast jaadoomantr kay baavujood yah aafat pooray zor say tujh par aaegee.

¹⁰too nay apnee badkaaree par etimaad karkay socha, ‘koee naheen mujhay dekhta.’ lekin teree ‘hikmat’ aur ‘ilm’ tujhay ghalat raah par laaya hai. un kee bina par too nay dil men kaha, ‘main hee hoon, meray siva koee aur naheen hai.’ ¹¹ab tujh par aisee aafat aaegee jisay teray jaadoomantr door karnay naheen paaengay, too aisee museebat men phans jaaegee jis say nipat naheen sakegee. achaanak hee tujh par tabaahee naazil hogee, aur too us kay liyay tayyaar hee naheen hogee. ¹²ab khadee ho ja, apnay jaadoo-tonay ka poora khazaana khol kar sab kuchh istemaal men la jo too nay javaanee say badee mehanat-mashaqqat kay saath apna liya hai. shaayad faaida ho, shaayad too logon ko dara kar bhaga sakay.

¹³lekin doosron kay beshumaar mashvray bekaar hain, unhon nay tujhay sirf thaka diya hai. ab teray najoomee khaday ho jaaen, jo sitaaron ko dekh dekh kar har maheenay peshgoiyaan kartay hain vah saamnay a kar tujhay us say bachaaen jo tujh par aanay vaala hai. ¹⁴yaqeenan vah aag men jalnay vaala bhoosa hee hain jo apnee jaan ko sholon say bacha naheen saktay. aur yah koilon kee aag naheen hogee jis kay saamnay insaan baith kar aag taap sakay.

¹⁵yahee un sab ka haal hai jin par too nay mehanat kee hai aur jo teree javaanee say teray saath tijaarat kartay rahay hain. har ek ladkhadaatay huay apnee apnee raah ikhtiyaar karega, aur ek bhee naheen hoga jo tujhay bachaaay.