Yashaayaah 46

devta madad naheen kar sakte

¹baabal kay devta bel aur naboo jhuk kar gir gaay hain, aur laadoo jaanvar un kay buton ko uthaaay phir rahay hain. tumhaaray jo but uthaaay ja saktay hain thakehaaray jaanvaron ka bojh ban gaay hain. ²kyoonki donon devta jhuk kar gir gaay hain. vah bojh bannay say bach na sakay, aur ab khud jilaavatanee men ja rahay hain.

³“ai yaaqoob kay gharaanay, suno! ai israaeel kay gharaanay kay bachay huay afraad, dhyaan do! maan kay pet say hee tum meray liyay bojh rahay ho, paidaaish say pahelay hee main tumhen uthaaay phir raha hoon. ⁴tumhaaray boodhay honay tak main vahee rahoonga, tumhaaray baal kay safed ho jaanay tak tumhen uthaaay phiroonga. yah ibtida say mera hee kaam raha hai, aur aainda bhee main tujhay uthaaay phiroonga, aainda bhee tera sahaara ban kar tujhay bachaaay rakhoonga.

⁵tum mera muqaabla kis say karogay, mujhay kis kay baraabar thaheraaogay? tum mera muvaazna kis say karogay jo meree maanind ho? ⁶log but banvaanay kay liyay batvay say kasrat ka sona nikaaltay aur chaandee taraazoo men toltay hain. phir vah sunaar ko but banaanay ka theka detay hain. jab tayyaar ho jaaay to vah jhuk kar munh kay bal us kee pooja kartay hain. ⁷vah usay apnay kandhon par rakh kar idhar udhar liyay phirtay hain, phir usay dubaara us kee jagah par rakh detay hain. vahaan vah khada raheta hai aur zara bhee naheen hilta. log chilla kar us say faryaad kartay hain, lekin vah javaab naheen deta, duaago ko museebat say naheen bachaata.

⁸ai bevafa logo, is ka khayaal rakho! mardaangee dikha kar sanjeedgee say is par dhyaan do! ⁹jo kuchh azal say pesh aaya hai usay yaad rakho. kyoonki main hee rabb hoon, aur meray siva koee aur naheen. main hee rabb hoon, aur meree maanind koee naheen.

¹⁰main ibtida say anjaam ka elaan, qadeem zamaanay say aanay vaalee baaton kee peshgoee karta aaya hoon. ab main farmaata hoon ki mera mansooba atal hai, main apnee marzee har lihaaz say pooree karoonga. ¹¹mashriq say main shikaaree parinda bula raha hoon, doordaraaz mulk say ek aisa aadmee jo mera mansooba poora karay. dhyaan do, jo kuchh main nay farmaaya vah takmeel tak pahunchaaoonga, jo mansooba main nay baandha vah poora karoonga.

¹²ai ziddee logo jo raastee say kaheen door ho, meree suno! ¹³main apnee raastee qareeb hee laaya hoon, vah door naheen hai. meree najaat kay aanay men der naheen hogee. main siyyoon ko najaat doonga, israaeel ko apnee shaan-o-shaukat say navaazoonga.