Yashaayaah 45

khoras rabb ka aala-ay-kaar hai

¹rabb apnay masah kiay huay khaadim khoras say farmaata hai, “main nay teray dahenay haath ko pakad liya hai, is liyay jahaan bhee too jaaay vahaan qaumen teray taabay ho jaaengee, baadshaahon kee taaqat jaatee rahegee, darvaazay khul jaaengay aur shaher kay darvaazay band naheen rahengay. ²main khud teray aagay aagay ja kar qil’aabandiyon ko zameenabos kar doonga. main peetal kay darvaazay tukday tukday karkay tamaam kunday tudva doonga. ³main tujhay andheray men chhupay khazaanay aur posheeda maal-o-daulat ata karoonga taaki too jaan lay ki main rabb hoon jo tera naam lay kar tujhay bulaata hai, ki main israaeel ka khuda hoon. ⁴go too mujhay naheen jaanta tha, lekin apnay khaadim yaaqoob kee khaatir main nay tera naam lay kar tujhay bulaaya, apnay barguzeeda israaeel kay vaastay tujhay ezaazee naam say navaaza hai.

⁵main hee rabb hoon, aur meray siva koee aur khuda naheen hai. go too mujhay naheen jaanta tha to bhee main tujhay kamarbasta karta hoon ⁶taaki mashriq say maghrib tak insaan jaan len ki meray siva koee aur naheen hai. main hee rabb hoon, aur meray siva koee aur naheen hai. ⁷main hee raushnee ko tashkeel deta aur andheray ko vujood men laata hoon, main hee achchhay aur buray haalaat paida karta, main rabb hee yah sab kuchh karta hoon. ⁸ai aasmaan, raastee kee boonda-baandee say zameen ko tar-o-taaza kar! ai baadlo, sadaaqat barsaao! zameen khul kar najaat ka phal laaay aur raastee ka pauda phootnay day. main rabb hee usay vujood men laaya hoon.”

apnay khaaliq par ilzaam lagaanay vaalay par afsos

⁹us par afsos jo apnay khaaliq say jhagda karta hai, go vah mittee kay tootay-phootay bartanon ka theekra hee hai. kya gaara kumhaar say poochhta hai, “too kya bana raha hai?” kya teree banaaee huee koee cheez teray baaray men shikaayat kartee hai, “us kee koee taaqat naheen”? ¹⁰us par afsos jo baap say savaal karay, “too kyoon baap ban raha hai?” ya aurat say, “too kyoon bachcha janm day rahee hai?”

¹¹rabb jo israaeel ka quddoos aur usay tashkeel denay vaala hai farmaata hai, “tum kis tarah meray bachchon kay baaray men meree poochhgichh kar saktay ho? jo kuchh meray haathon nay banaaya us kay baaray men tum kaisay mujhay hukm day saktay ho? ¹²main hee nay zameen ko bana kar insaan ko us par khalaq kiya. meray apnay haathon nay aasmaan ko khaimay kee tarah us kay oopar taan liya aur main hee nay us kay sitaaron kay pooray lashkar ko tarteeb diya. ¹³main hee nay khoras ko insaaf say jaga diya, aur main hee us kay tamaam raastay seedhay bana deta hoon. vah meray shaher ko naay siray say taameer karega aur meray jilaavatanon ko aazaad karega. aur yah sab kuchh muft men hoga, na vah paisay lega, na tuhfay.” yah rabb-ul-afwaaj ka farmaan hai.

rabb vaahid khuda hai

¹⁴rabb farmaata hai, “misr kee daulat, ethopiya ka tijaartee maal aur siba kay daraazaqad afraad teray ma-tahet ho kar teree milkiyat ban jaaengay. vah teray peechhay chalengay, zanjeeron men jakday teray taabay ho jaaengay. teray saamnay jhuk kar vah iltimaas karkay kahengay, ‘yaqeenan allaah teray saath hai. us kay siva koee aur khuda hai naheen’.” ¹⁵ai israaeel kay khuda aur najaatadihanda, yaqeenan too apnay aap ko chhupaaay rakhnay vaala khuda hai. ¹⁶but banaanay vaalay sab sharminda ho jaaengay. un kay munh kaalay ho jaaengay, aur vah mil kar sharmasaar haalat men chalay jaaengay. ¹⁷lekin israaeel ko chhutkaara milega, rabb usay abdee najaat dega. tab tumhaaree rusvaaee kabhee naheen hogee, tum hamesha tak sharminda honay say mahfooz rahogay.

¹⁸kyoonki rabb farmaata hai, “main hee rabb hoon, aur meray siva koee aur naheen hai! jo yah farmaata hai vah khuda hai, jis nay aasmaan ko khalaq kiya aur zameen ko tashkeel day kar mahfooz bunyaad par rakha. aur zameen sunsaan biyaabaan na rahee balki us nay usay basnay kay qaabil bana diya taaki jaandaar us men rah saken. ¹⁹main nay posheedgee men ya duniya kay kisee taareek konay say baat naheen kee. main nay yaaqoob kee aulaad say yah bhee naheen kaha, ‘beshak mujhay talaash karo, lekin tum mujhay naheen paaogay.’ naheen, main rabb hee hoon, jo insaaf bayaan karta, sachchaaee ka elaan karta hai.

²⁰tum jo deegar aqvaam say bach niklay ho aao, jama ho jaao. mil kar meray huzoor haazir ho jaao! jo lakdee kay but utha kar apnay saath liyay phirtay hain vah kuchh naheen jaantay! jo devta chhutkaara naheen day saktay un say vah kyoon iltija kartay hain? ²¹aao, apna muaamala sunaao, apnay dalaail pesh karo! beshak pahelay ek doosray say mashvra karo. kis nay badee der pahelay yah kuchh sunaaya tha? kya main, rabb nay taveel arsa pahelay is ka elaan naheen kiya tha? kyoonki meray siva koee aur khuda naheen hai. main raast khuda aur najaatadihanda hoon. meray siva koee aur naheen hai.

²²ai zameen kee intihaao, sab meree taraf rujoo karkay najaat paao! kyoonki main hee khuda hoon, meray siva koee aur naheen hai. ²³main nay apnay naam kee qasam kha kar farmaaya hai, aur mera farmaan raast hai, vah kabhee mansookh naheen hoga. farmaan yah hai ki meray saamnay har ghutna jhukega aur har zabaan meree qasam kha kar ²⁴kahegee, ‘rabb hee raastee aur quvvat ka mamba hai’!”

jo pahelay taish men a kar rabb kee mukhaalafat kartay thay vah bhee sab sharminda ho kar us kay huzoor aaengay. ²⁵lekin israaeel kee tamaam aulaad rabb men raastbaaz thaher kar us par fakhar karegee.