Yashaayaah 44
rabb kee qaum kay liyay naee zindagee
1lekin ab sun, ai yaaqoob meray khaadim! meree baat par tavajjuh day, ai israaeel jisay main nay chun liya hai. 2rabb jis nay tujhay banaaya aur maan kay pet say hee tashkeel day kar teree madad karta aaya hai vah farmaata hai, ‘ai yaaqoob meray khaadim, mat dar! ai yasooroon jisay main nay chun liya hai, khauf na kha. 3kyoonki main piyaasee zameen par paanee daaloonga aur khushkee par nadiyaan bahenay doonga. main apna rooh teree aulaad par naazil karoonga, apnee barkat teray bachchon ko bakhshoonga. 4tab vah paanee kay darmiyaan kee hariyaalee kee tarah phoot nikalengay, naheron par safeda kay darakhton kee tarah phalen phoolengay.’
5ek kahega, ‘main rabb ka hoon,’ doosra yaaqoob ka naam lay kar pukaarega aur teesra apnay haath par ‘rabb ka banda’ likh kar israaeel ka ezaazee naam rakhega.”
6rabb-ul-afwaaj jo israaeel ka baadshaah aur chhudaanay vaala hai farmaata hai, “main avval aur aakhir hoon. meray siva koee aur khuda naheen hai. 7kaun meree maanind hai? vah aavaaz day kar bataaay aur apnay dalaail pesh karay. vah tarteeb say sab kuchh sunaaay jo us qadeem vaqt say hua hai jab main nay apnee qaum ko qaaim kiya. vah aanay vaalee baaton ka elaan karkay bataaay ki aainda kya kuchh pesh aaega.
8ghabra kar dahshatzada na ho. kya main nay bahut der pahelay tujhay ittila naheen dee thee ki yah kuchh pesh aaega? tum khud meray gavaah ho. kya meray siva koee aur khuda hai? hargiz naheen! aur koee chataan naheen hai, main kisee aur ko naheen jaanta.”
khudsaakhta devtaa
9but banaanay vaalay sab hech hee hain, aur jo cheezen unhen piyaaree lagtee hain vah befaaida hain. un kay gavaah na dekh aur na jaan saktay hain, lihaaza aakhirkaar sharminda ho jaaengay.
10yah kis tarah kay log hain jo apnay liyay devta banaatay aur befaaida but dhaal letay hain? 11un kay tamaam saathee sharminda ho jaaengay. aakhir but banaanay vaalay insaan hee to hain. aao, vah sab jama ho kar khuda kay huzoor khaday ho jaaen. kyoonki vah dahshat kha kar sakht sharminda ho jaaengay.
12lohaar auzaar lay kar usay jaltay huay koilon men istemaal karta hai. phir vah apnay hathauday say thonk thonk kar but ko tashkeel deta hai. pooray zor say kaam kartay kartay vah taaqat ka javaab denay tak bhooka ho jaata, paanee na peenay kee vajah say nidhaal ho jaata hai. 13jab but ko lakdee say banaana hai to kaareegar feetay say naap kar painsil say lakdee par khaaka khainchta hai. parkaar bhee kaam a jaata hai. phir kaareegar lakdee ko chhuree say taraash taraash kar aadmee kee shakl banaata hai. yoon shaandaar aadmee ka mujassma kisee kay ghar men lagnay kay liyay tayyaar ho jaata hai.
14kaareegar but banaanay kay liyay deodaar ka darakht kaat leta hai. kabhee kabhee vah baloot ya kisee aur qism ka darakht chun kar usay jangal kay deegar darakhton kay beech men ugnay deta hai. ya vah sanobar [a] shaayad ibraanee lafz say muraad sanobar naheen balki laurel ho, ek chhota sadaabahaar kaafooree darakht. ka darakht lagaata hai, aur baarish usay phalnay phoolnay detee hai. 15dhyaan do ki insaan lakdee ko eendhan kay liyay bhee istemaal karta, kuchh lay kar aag taapta, kuchh jala kar rotee pakaata hai. baaqee hissay say vah but bana kar usay sijda karta, devta ka mujassma tayyaar karkay us kay saamnay jhuk jaata hai. 16vah lakdee ka aadha hissa jala kar us par apna gosht bhoonta, phir jee bhar kar khaana khaata hai. saath saath vah aag senk kar kaheta hai, “vaah, aag kee garmee kitnee achchhee lag rahee hai, ab garmee mahsoos ho rahee hai.” 17lekin baaqee lakdee say vah apnay liyay devta ka but banaata hai jis kay saamnay vah jhuk kar pooja karta hai. us say vah iltimaas karta hai, “mujhay bacha, kyoonki too mera devta hai.”
18yah log kuchh naheen jaantay, kuchh naheen samajhtay. un kee aankhon aur dilon par parda pada hai, is liyay na vah dekh saktay, na samajh saktay hain. 19vah is par ghaur naheen kartay, unhen fahem aur samajh tak naheen ki sochen, “main nay lakdee ka aadha hissa aag men jhonk kar us kay koilon par rotee pakaaee aur gosht bhoon liya. yah cheezen khaanay kay baad main baaqee lakdee say qaabil-ay-ghin but kyoon banaaoon, lakdee kay tukday kay saamnay kyoon jhuk jaaoon?” 20jo yoon raakh men mulavvas ho jaaay us nay dhoka khaaya, us kay dil nay usay fareb diya hai. vah apnee jaan chhuda kar naheen maan sakta ki jo but main dahenay haath men thaamay huay hoon vah jhoot hai.
rabb apnee qaum ko aazaad karta hai
21“ai yaaqoob kee aulaad, ai israaeel, yaad rakh ki too mera khaadim hai. main nay tujhay tashkeel diya, too mera hee khaadim hai. ai israaeel, main tujhay kabhee naheen bhooloonga. 22main nay teray jaraaim aur gunaahon ko mita daala hai, vah dhoop men dhund ya tez hava say bikhray baadlon kee tarah ojhal ho gaay hain. ab meray paas vaapas a, kyoonki main nay ivzaana day kar tujhay chhudaaya hai.”
23ai aasmaan, khushee kay naaray laga, kyoonki rabb nay sab kuchh kiya hai. ai zameen kee gaheraaiyo, shaadiyaana bajaao! ai pahaado aur janglo, apnay tamaam darakhton samet khushee kay geet gaao, kyoonki rabb nay ivzaana day kar yaaqoob ko chhudaaya hai, israaeel men us nay apna jalaal zaahir kiya hai.
24rabb tera chhudaanay vaala jis nay tujhay maan kay pet say hee tashkeel diya farmaata hai, “main rabb hoon. main hee sab kuchh vujood men laaya, main nay akelay hee aasmaan ko zameen kay oopar taan liya aur zameen ko bichhaaya. 25main hee qismat ka haal bataanay vaalon kay ajeeb-o-ghareeb nishaan naakaam honay deta, faal kholnay vaalon ko ahemaq saabit karta aur daanaaon ko peechhay hata kar un kay ilm kee hamaaqat zaahir karta hoon. 26main hee apnay khaadim ka kalaam poora honay deta aur apnay paighambaron ka mansooba takmeel tak pahunchaata hoon, main hee yarooshalam kay baaray men farmaata hoon, ‘vah dubaara aabaad ho jaaega,’ aur yahoodaah kay shaheron kay baaray men, ‘vah naay siray say taameer ho jaaengay, main un kay khandaraat dubaara khaday karoonga.’ 27main hee gaheray samundar ko hukm deta hoon, ‘sookh ja, main teree gaheraaiyon ko khushk karta hoon.’ 28aur main hee nay khoras kay baaray men farmaaya, ‘yah mera gallaabaan hai! yahee meree marzee pooree karkay kahega ki yarooshalam dubaara taameer kiya jaaay, rabb kay ghar kee bunyaad naay siray say rakhee jaaay’!”