Yashaayaah 43

rabb qaum ko vatan men vaapas laaegaa

¹lekin ab rabb jis nay tujhay ai yaaqoob khalaq kiya aur tujhay ai israaeel tashkeel diya farmaata hai, “khauf mat kha, kyoonki main nay ivzaana day kar tujhay chhudaaya hai, main nay tera naam lay kar tujhay bulaaya hai, too mera hee hai. ²paanee kee gaheraaiyon men say guzartay vaqt main teray saath hoonga, daryaaon ko paar kartay vaqt too naheen doobega. aag men say guzartay vaqt na too jhulas jaaega, na sholon say bhasm ho jaaega. ³kyoonki main rabb tera khuda hoon, main israaeel ka quddoos aur tera najaatadihanda hoon. tujhay chhudaanay kay liyay main ivzaana kay taur par misr deta, teree jagah ethopiya aur siba ada karta hoon. ⁴too meree nazar men qeemtee aur azeez hai, too mujhay piyaara hai, is liyay main teray badlay men log aur teree jaan kay ivz qaumen ada karta hoon.

⁵chunaanchay mat darna, kyoonki main teray saath hoon. main teree aulaad ko mashriq aur maghrib say jama karkay vaapas laaoonga. ⁶shimaal ko main hukm doonga, ‘mujhay do!’ aur junoob ko, ‘unhen mat rokna!’ meray betay-betiyon ko duniya kee intiha say vaapas lay aao, ⁷un sab ko jo mera naam rakhtay hain aur jinhen main nay apnay jalaal kee khaatir khalaq kiya, jinhen main nay tashkeel day kar banaaya hai.”

⁸us qaum ko nikaal laao jo aankhen rakhnay kay baavujood dekh naheen saktee, jo kaan rakhnay kay baavujood sun naheen saktee. ⁹tamaam ghairqaumen jama ho jaaen, tamaam ummaten ikatthee ho jaaen. un men say kaun is kee peshgoee kar sakta, kaun maazee kee baaten suna sakta hai? vah apnay gavaahon ko pesh karen jo unhen durust saabit karen, taaki log sun kar kahen, “un kee baat bilkul saheeh hai.” ¹⁰lekin rabb farmaata hai, “ai israaeelee qaum, tum hee meray gavaah ho, tum hee mera khaadim ho jisay main nay chun liya taaki tum jaan lo, mujh par eemaan laao aur pahechaan lo ki main hee hoon. na mujh say pahelay koee khuda vujood men aaya, na meray baad koee aaega. ¹¹main, sirf main rabb hoon, aur meray siva koee aur najaatadihanda naheen hai. ¹²main hee nay is ka elaan karkay tumhen chhutkaara diya, main hee tumhen apna kalaam pahunchaata raha. aur yah tumhaaray darmiyaan kay kisee ajnabee maabood say kabhee naheen hua balki sirf mujh hee say. tum hee meray gavaah ho ki main hee khuda hoon.” yah rabb ka farmaan hai. ¹³“azal say main vahee hoon. koee naheen hai jo meray haath say chhuda sakay. jab main kuchh amal men laata hoon to kaun isay badal sakta hai?”

¹⁴rabb jo tumhaara chhudaanay vaala aur israaeel ka quddoos hai farmaata hai, “tumhaaree khaatir main baabal kay khilaaf fauj bhej kar tamaam kunday tudva doonga. tab baabal kee shaadmaanee girya-o-zaaree men badal jaaegee. ¹⁵main rabb hoon, tumhaara quddoos jo israaeel ka khaaliq aur tumhaara baadshaah hai.”

¹⁶rabb farmaata hai, “main hee nay samundar men say guzarnay kee raah aur gaheray paanee men say raasta bana diya. ¹⁷meray kahenay par misr kee fauj apnay soormaaon, rathon aur ghodon samet ladnay kay liyay nikal aaay. ab vah mil kar samundar kee tah men paday huay hain aur dubaara kabhee naheen uthengay. vah battee kee tarah bujh gaay. ¹⁸lekin maazee kee baaten chhod do, jo kuchh guzar gaya hai us par dhyaan na do. ¹⁹kyoonki dekho, main ek naya kaam vujood men la raha hoon jo abhee phoot nikalnay ko hai. kya yah tumhen nazar naheen a raha? main registaan men raasta aur biyaabaan men naheren bana raha hoon. ²⁰janglee jaanvar, geedad aur uqaabee ulloo mera ehatiraam karengay, kyoonki main registaan men paanee muhayya karoonga, biyaabaan men naheren banaaoonga taaki apnee barguzeeda qaum ko paanee pilaaoon. ²¹jo qaum main nay apnay liyay tashkeel dee hai vah meray kaam suna kar meree tamjeed karay.

rabb israaeel kay gunaahon say tang a gaya hai

²²ai yaaqoob kee aulaad, ai israaeel, baat yah naheen ki too nay mujh say faryaad kee, ki too meree marzee darayaaft karnay kay liyay koshaan raha. ²³kyoonki na too nay meray liyay apnee bhed-bakriyaan bhasm keen, na apnee zabah kee qurbaaniyon say mera ehatiraam kiya. na main nay ghalla kee nazron say tujh par bojh daala, na bakhoor kee qurbaanee say tang kiya. ²⁴too nay na meray liyay qeemtee masaala khareeda, na mujhay apnee qurbaaniyon kee charbee say khush kiya. is kay bar’aks too nay apnay gunaahon say mujh par bojh daala aur apnee buree harkaton say mujhay tang kiya. ²⁵taaham main, haan main hee apnee khaatir teray jaraaim ko mita deta aur teray gunaahon ko zahen say nikaal deta hoon.

²⁶ja, kachaheree men meray khilaaf muqaddma daair kar! a, ham donon adaalat men haazir ho jaaen! apna muaamala pesh kar taaki too bequsoor saabit ho. ²⁷shuroo men teray khaandaan kay baanee nay gunaah kiya, aur us vaqt say lay kar aaj tak teray numaainday mujh say bevafa hotay aaay hain. ²⁸is liyay main maqdis kay buzurgon ko yoon rusva karoonga ki un kee muqaddas haalat jaatee rahegee, main yaaqoob kee aulaad israaeel ko mukammal tabaahee aur laan-taan kay liyay makhsoos karoonga.