Yashaayaah 42

allaah ka paighambar aqvaam kay liyay mash’al-ay-raah hai

¹dekho, mera khaadim jisay main qaaim rakhta hoon, mera barguzeeda jo mujhay pasand hai. main apnay rooh ko us par daaloonga, aur vah aqvaam men insaaf qaaim karega. ²vah na to cheekhega, na chillaaega, galiyon men us kee aavaaz sunaaee naheen degee. ³na vah kuchlay huay sarkanday ko todega, na bujhtee huee battee ko bujhaaega. vafaadaaree say vah insaaf qaaim karega. ⁴aur jab tak us nay duniya men insaaf qaaim na kar liya ho tab tak na us kee battee bujhegee, na usay kuchla jaaega. jazeeray us kee hidaayat say ummeed rakhengay.”

⁵rabb khuda nay aasmaan ko khalaq karkay khaimay kee tarah zameen kay oopar taan liya. usee nay zameen ko aur jo kuchh us men say phoot nikalta hai tashkeel diya, aur usee nay roo-ay-zameen par basnay aur chalnay vaalon men dam phoonk kar jaan daalee. ab yahee khuda apnay khaadim say farmaata hai, ⁶“main, rabb nay insaaf say tujhay bulaaya hai. main teray haath ko pakad kar tujhay mahfooz rakhoonga. kyoonki main tujhay qaum ka ahd aur deegar aqvaam kee raushnee bana doongaa ⁷taaki too andhon kee aankhen kholay, qaidiyon ko kothdee say riha karay aur taareekee kee qaid men basnay vaalon ko chhutkaara day. ⁸main rabb hoon, yahee mera naam hai! main bardaasht naheen karoonga ki jo jalaal mujhay milna hai vah kisee aur ko day diya jaaay, ki log buton kee tamjeed karen jabki unhen meree tamjeed karnee chaahiay. ⁹dekho, jis kee bhee peshgoee main nay kee thee vah vuqoo men aaya hai. ab main naee baaton ka elaan karta hoon. is say pahelay ki vah vujood men aaen main unhen tumhen suna deta hoon.”

rabb kee tamjeed men geet gaao!

¹⁰rabb kee tamjeed men geet gaao, duniya kee intiha tak us kee madahsaraaee karo! ai samundar kay musaafiro aur jo kuchh us men hai, us kee sitaaish karo! ai jazeero, apnay baashindon samet us kee taareef karo! ¹¹biyaabaan aur us kay qasbay khushee kay naaray lagaaen, jin aabaadiyon men qeedaar basta hai vah shaadmaan hon. sila kay baashinday baagh baagh ho kar pahaadon kee chotiyon par zor say shaadiyaana bajaaen. ¹²sab rabb ko jalaal den aur jazeeron tak us kee taareef phailaaen.

¹³rabb soormay kee tarah ladnay kay liyay niklega, faujee kee tarah josh men aaega aur jang kay naaray laga laga kar apnay dushmanon par ghaalib aaega.

¹⁴vah farmaata hai, “main badee der say khaamosh raha hoon. main chup raha aur apnay aap ko rokta raha. lekin ab main dard-ay-zah men mubtala aurat kee tarah karaahata hoon. mera saans phool jaata aur main betaabee say haampta raheta hoon. ¹⁵main pahaadon aur pahaadiyon ko tabaah karkay un kee tamaam hariyaalee jhulsa doonga. darya khushk zameen ban jaaengay, aur johad sookh jaaengay. ¹⁶main andhon ko aisee raahon par lay chaloonga jin say vah vaaqif naheen hongay, ghairmaanoos raaston par un kee raahanumaaee karoonga. un kay aagay main andheray ko raushan aur naahamvaar zameen ko hamvaar karoonga. yah sab kuchh main sar’anjaam doonga, ek baat bhee adhooree naheen rah jaaegee.

¹⁷lekin jo buton par bharosa rakh kar un say kahetay hain, ‘tum hamaaray devta ho’ vah sakht sharm kha kar peechhay hat jaaengay.

saza ka sabab andhaapan hai

¹⁸ai bahero, suno! ai andho, nazar uthaao taaki dekh sako! ¹⁹kaun meray khaadim jaisa andha hai? kaun meray paighambar jaisa bahera hai, us jaisa jisay main bhej raha hoon? go main nay us kay saath ahd baandha to bhee rabb kay khaadim jaisa andha aur naabeena koee naheen hai. ²⁰go too nay bahut kuchh dekha hai too nay tavajjuh naheen dee, go teray kaan har baat sun letay hain too sunta naheen.” ²¹rabb nay apnee raastee kee khaatir apnee shareeat kee azmat aur jalaal ko badhaaya hai, kyoonki yah us kee marzee thee. ²²lekin ab us kee qaum ko ghaarat kiya gaya, sab kuchh loot liya gaya hai. sab kay sab gadhon men jakday ya jelon men chhupaaay huay hain. vah loot ka maal ban gaay hain, aur koee naheen hai jo unhen bachaaay. unhen chheen liya gaya hai, aur koee naheen hai jo kahay, “unhen vaapas karo!”

²³kaash tum men say koee dhyaan day, koee aainda kay liyay tavajjuh day. ²⁴soch lo! kis nay ijaazat dee ki yaaqoob kee aulaad ko ghaarat kiya jaaay? kis nay israaeel ko luteron kay havaalay kar diya? kya yah rabb kee taraf say naheen hua, jis kay khilaaf ham nay gunaah kiya hai? log to us kee raahon par chalna hee naheen chaahatay thay, vah us kee shareeat kay taabay rahenay kay liyay tayyaar hee na thay. ²⁵isee vajah say us nay un par apna sakht ghazab naazil kiya, unhen shadeed jang kee zad men aanay diya. lekin afsos, go aag nay qaum ko gher kar jhulsa diya taaham usay samajh naheen aaee, go vah bhasm huee to bhee us nay dil say sabaq naheen seekha.