Yashaayaah 41

dushman kay hamlay rabb hee kee taraf say hain

¹“ai jazeero, khaamosh rah kar meree baat suno! aqvaam az sar-ay-nau taqviyat paaen aur meray huzoor aaen, phir baat karen. aao, ham ek doosray say mil kar adaalat men haazir ho jaaen!

²kaun us aadmee ko jaga kar mashriq say laaya hai jis kay daaman men insaaf hai? kaun deegar qaumon ko is shakhs kay havaalay karkay baadshaahon ko khaak men milaata hai? us kee talvaar say vah gard ho jaatay hain, us kee kamaan say log hava men bhoosay kee tarah ud kar bikhar jaatay hain. ³vah un ka taaqqub karkay saheeh-salaamat aagay nikalta hai, bhaagtay huay us kay paaon raastay ko naheen chhootay. ⁴kis nay yah sab kuchh kiya, kis nay yah anjaam diya? usee nay jo ibtida hee say naslon ko bulaata aaya hai. main, rabb avval hoon, aur aakhir men aanay vaalon kay saath bhee main vahee hoon.”

⁵jazeeray yah dekh kar dar gaay, duniya kay doordaraaz ilaaqay kaamp uthay hain. vah qareeb aatay hue ⁶ek doosray ko sahaara day kar kahetay hain, “hausla rakh!” ⁷dastakaar sunaar kee hausalaaafzaaee karta hai, aur jo but kee naahamvaariyon ko hathauday say theek karta hai vah aheran par kaam karnay vaalay kee himmat badhaata aur taankay ka muaaina karkay kaheta hai, “ab theek hai!” phir mil kar but ko keelon say mazboot kartay hain taaki hilay na.

mat darna, kyoonki main tera khuda hoon

⁸“lekin too meray khaadim israaeel, too farq hai. ai yaaqoob kee qaum, main nay tujhay chun liya, aur too meray dost ibraaheem kee aulaad hai. ⁹main tujhay pakad kar duniya kee intiha say laaya, us kay doordaraaz konon say bulaaya. main nay farmaaya, ‘too mera khaadim hai.’ main nay tujhay radd naheen kiya balki tujhay chun liya hai. ¹⁰chunaanchay mat dar, kyoonki main teray saath hoon. dahshat mat kha, kyoonki main tera khuda hoon. main tujhay mazboot karta, teree madad karta, tujhay apnay dahenay haath kay insaaf say qaaim rakhta hoon. ¹¹dekh, jitnay bhee teray khilaaf taish men a gaay hain vah sab sharminda ho jaaengay, un ka munh kaala ho jaaega. tujh say jhagadnay vaalay hech hee saabit ho kar halaak ho jaaengay. ¹²tab too apnay mukhaalifon ka pata karega lekin un ka naam-o-nishaan tak naheen milega. tujh say ladnay vaalay khatm hee hongay, aisa hee lagega ki vah kabhee thay naheen. ¹³kyoonki main rabb tera khuda hoon. main teray dahenay haath ko pakad kar tujhay bataata hoon, ‘mat darna, main hee teree madad karta hoon.’

¹⁴ai keeday yaaqoob mat dar, ai chhotee qaum israaeel khauf mat kha. kyoonki main hee teree madad karoonga, aur jo ivzaana day kar tujhay chhuda raha hai vah israaeel ka quddoos hai.” yah hai rabb ka farmaan. ¹⁵“meray haath say too gaahanay ka naya aur mut’addid tez noken rakhnay vaala aala banega. tab too pahaadon ko gaah kar reza reza kar dega, aur pahaadiyaan bhoosay kee maanind ho jaaengee. ¹⁶too unhen uchhaal uchhaal kar udaaega to hava unhen lay jaaegee, aandhee unhen door tak bikher degee. lekin too rabb kee khushee manaaega aur israaeel kay quddoos par fakhar karega.

allaah registaan men paanee muhayya karta hai

¹⁷ghareeb aur zarooratmand paanee kee talaash men hain, lekin befaaida, un kee zabaanen piyaas kay maaray khushk ho gaee hain. lekin main, rabb un kee sunoonga, main jo israaeel ka khuda hoon unhen tark naheen karoonga. ¹⁸main banjar bulandiyon par nadiyaan jaaree karoonga aur vaadiyon men chashmay phootnay doonga. main registaan ko johad men aur sookhee sookhee zameen ko paanee kay soton men badal doonga. ¹⁹meray haath say registaan men deodaar, keekar, mehandee aur zaitoon kay darakht lagengay, biyaabaan men jooneepar, sanobar aur sarv kay darakht mil kar ugengay. ²⁰main yah is liyay karoonga ki log dhyaan day kar jaan len ki rabb kay haath nay yah sab kuchh kiya hai, ki israaeel kay quddoos nay yah paida kiya hai.”

devta bekaar hain

²¹rabb jo yaaqoob ka baadshaah hai farmaata hai, “aao, adaalat men apna muaamala pesh karo, apnay dalaail bayaan karo. ²²aao, apnay buton ko lay aao taaki vah hamen bataaen ki kya kya pesh aana hai. maazee men kya kya hua? bataao, taaki ham dhyaan den. ya hamen mustaqbil kee baaten sunaao, ²³vah kuchh jo aanay vaalay dinon men hoga, taaki hamen maaloom ho jaaay ki tum devta ho. kam az kam kuchh na kuchh karo, khwaah achchha ho ya bura, taaki ham ghabra kar dar jaaen. ²⁴tum to kuchh bhee naheen ho, aur tumhaara kaam bhee bekaar hai. jo tumhen chun leta hai vah qaabil-ay-ghin hai.

²⁵ab main nay shimaal say ek aadmee ko jaga diya hai, aur vah mera naam lay kar mashriq say a raha hai. yah shakhs hukmaraanon ko mittee kee tarah kuchal deta hai, unhen gaaray ko narm karnay vaalay kumhaar kee tarah raund deta hai. ²⁶kis nay ibtida say is ka elaan kiya taaki hamen ilm ho? kis nay pahelay say is kee peshgoee kee taaki ham kahen, ‘us nay bilkul saheeh kaha hai’? koee naheen tha jis nay pahelay say is ka elaan karkay is kee peshgoee kee. koee naheen tha jis nay tumhaaray munh say is kay baaray men ek lafz bhee suna. ²⁷kis nay siyyoon ko pahelay bata diya, ‘vah dekho, tera sahaara aanay ko hai!’ main hee nay yah farmaaya, main hee nay yarooshalam ko khushkhabaree ka paighambar ata kiya.

²⁸lekin jab main apnay ird-gird dekhta hoon to koee naheen hai jo mujhay mashvra day, koee naheen jo meray savaal ka javaab day. ²⁹dekho, yah sab dhoka hee dhoka hain. un kay kaam hech aur un kay dhaalay huay mujassmay khaalee hava hee hain.