Yashaayaah 40

allaah kee qaum ko tasallee

¹tumhaara rabb farmaata hai, “tasallee do, meree qaum ko tasallee do! ²narmee say yarooshalam say baat karo, buland aavaaz say usay bataao ki teree ghulaamee kay din pooray ho gaay hain, tera qusoor muaaf ho gaya hai. kyoonki tujhay rabb kay haath say tamaam gunaahon kee dugnee saza mil gaee hai.”

³ek aavaaz pukaar rahee hai, “registaan men rabb kee raah tayyaar karo! biyaabaan men hamaaray khuda ka raasta seedha banaao. ⁴laazim hai ki har vaadee bhar dee jaaay, zarooree hai ki har pahaad aur buland jagah maidaan ban jaaay. jo tedha hai usay seedha kiya jaaay, jo naahamvaar hai usay hamvaar kiya jaaay. ⁵tab allaah ka jalaal zaahir ho jaaega, aur tamaam insaan mil kar usay dekhengay. yah rabb kay apnay munh ka farmaan hai.”

⁶ek aavaaz nay kaha, “zor say aavaaz day!” main nay poochha, “main kya kahoon?” “yah ki tamaam insaan ghaas hee hain, un kee tamaam shaan-o-shaukat janglee phool kee maanind hai. ⁷jab rabb ka saans un par say guzray to ghaas murjha jaatee aur phool gir jaata hai, kyoonki insaan ghaas hee hai. ⁸ghaas to murjha jaatee aur phool gir jaata hai, lekin hamaaray khuda ka kalaam abad tak qaaim raheta hai.”

⁹ai siyyoon, ai khushkhabaree kay paighambar, bulandiyon par chadh ja! ai yarooshalam, ai khushkhabaree kay paighambar, zor say aavaaz day! pukaar kar kah aur khauf mat kha. yahoodaah kay shaheron ko bata, “vah dekho, tumhaara khuda!”

¹⁰dekho, rabb qaadir-ay-mutlaq badee qudrat kay saath a raha hai, vah badee taaqat kay saath hukoomat karega. dekho, us ka ajr us kay paas hai, aur us ka in’aam us kay aagay aagay chalta hai. ¹¹vah charvaahay kee tarah apnay gallay kee gallaabaanee karega. vah bhed kay bachchon ko apnay baazooon men mahfooz rakh kar seenay kay saath lagaaay phirega aur un kee maaon ko baday dhyaan say apnay saath lay chalega.

allaah kee naaqaabil-ay-bayaan azmat

¹²kis nay apnay haath say duniya ka paanee naap liya hai? kis nay apnay haath say aasmaan kee paimaaish kee hai? kis nay zameen kee mittee kee miqdaar maaloom kee ya taraazoo say pahaadon ka kul vazan mut’ayyin kiya hai? ¹³kis nay rabb kay rooh kee tahqeeq kar paaee? kya us ka koee musheer hai jo usay taaleem day? ¹⁴kya usay kisee say mashvra lenay kee zaroorat hai taaki usay samajh a kar raast raah kee taaleem mil jaaay? hargiz naheen! kya kisee nay kabhee usay ilm-o-irfaan ya samajhdaar zindagee guzaarnay ka fan sikhaaya hai? hargiz naheen!

¹⁵yaqeenan tamaam aqvaam rabb kay nazdeek baaltee kay ek qatray ya taraazoo men gard kee maanind hain. jazeeron ko vah ret kay zarron kee tarah utha leta hai. ¹⁶khwaah lubnaan kay tamaam darakht aur jaanvar rabb kay liyay qurbaan kyoon na hotay to bhee munaasib qurbaanee kay liyay kaafee na hotay. ¹⁷us kay saamnay tamaam aqvaam kuchh bhee naheen hain. us kee nazar men vah hech aur naacheez hain.

¹⁸allaah ka muvaazna kis say ho sakta hai? us ka muqaabla kis tasveer ya mujassmay say ho sakta hai? ¹⁹but to yoon banta hai ki pahelay dastakaar usay dhaal deta hai, phir sunaar us par sona chadha kar usay chaandee kee zanjeeron say saja deta hai. ²⁰jo ghurbat kay baais yah naheen karva sakta vah kam az kam koee aisee lakdee chun leta hai jo gal sad naheen jaatee. phir vah kisee maahir dastakaar say but ko yoon banvaata hai ki vah apnee jagah say na hilay.

²¹kya tum ko maaloom naheen? kya tum nay baat naheen sunee? kya tumhen ibtida say sunaaya naheen gaya? kya tumhen duniya kay qiyaam say lay kar aaj tak samajh naheen aaee? ²²rabb roo-ay-zameen kay oopar bulandiyon par takhtnasheen hai jahaan say insaan tiddiyon jaisay lagtay hain. vah aasmaan ko parday kee tarah taan kar aur har taraf khainch kar rahenay kay qaabil khaima bana deta hai. ²³vah sardaaron ko naacheez aur duniya kay qaaziyon ko hech bana deta hai. ²⁴vah naay paudon kee maanind hain jin kee paneeree abhee abhee lagee hai, beej abhee abhee boay gaay hain, paudon nay abhee abhee jad pakdee hai ki rabb un par phoonk maarta hai aur vah murjha jaatay hain. tab aandhee unhen bhoosay kee tarah uda lay jaatee hai.

²⁵quddoos khuda farmaata hai, “tum mera muvaazna kis say karna chaahatay ho? kaun meray baraabar hai?” ²⁶apnee nazar utha kar aasmaan kee taraf dekho. kis nay yah sab kuchh khalaq kiya? vah jo aasmaanee lashkar kee pooree taadaad baahar la kar har ek ko naam lay kar bulaata hai. us kee qudrat aur zabardast taaqat itnee azeem hai ki ek bhee door naheen raheta.

²⁷ai yaaqoob kee qaum, too kyoon kahetee hai ki meree raah rabb kee nazar say chhupee rahetee hai? ai israaeel, too kyoon shikaayat karta hai ki mera muaamala meray khuda kay ilm men naheen aata?

²⁸kya tujhay maaloom naheen, kya too nay naheen suna ki rabb laazvaal khuda aur duniya kee intiha tak ka khaaliq hai? vah kabhee naheen thakta, kabhee nidhaal naheen hota. koee bhee us kee samajh kee gaheraaiyon tak naheen pahunch sakta. ²⁹vah thakemaandon ko taazgee aur bebason ko taqviyat deta hai. ³⁰go naujavaan thak kar nidhaal ho jaaen aur javaan aadmee thokar kha kar gir jaaen, ³¹lekin rabb say ummeed rakhnay vaalay naee taaqat paaengay aur uqaab kay say par phaila kar bulandiyon tak udengay. na vah daudtay huay thakengay, na chaltay huay nidhaal ho jaaengay.