Yashaayaah 38

allaah hizaqiyaah ko shifa deta hai

¹un dinon men hizaqiyaah itna beemaar hua ki marnay kee naubat a pahunchee. aamoos ka beta yasaayaah nabee us say milnay aaya aur kaha, “rabb farmaata hai ki apnay ghar ka band-o-bast kar lay, kyoonki tujhay marna hai. too is beemaaree say shifa naheen paaega.”

²yah sun kar hizaqiyaah nay apna munh deevaar kee taraf pher kar dua kee, ³“ai rabb, yaad kar ki main vafaadaaree aur khuloosdilee say teray saamnay chalta raha hoon, ki main vah kuchh karta aaya hoon jo tujhay pasand hai.” phir vah phoot phoot kar ronay laga.

⁴tab yasaayaah nabee ko rabb ka kalaam mila, ⁵“hizaqiyaah kay paas ja kar usay bata dena ki rabb teray baap daaood ka khuda farmaata hai, ‘main nay teree dua sun lee aur teray aansoo dekhay hain. main teree zindagee men 15 saal ka izaafa karoonga. ⁶saath saath main tujhay aur is shaher ko asoor kay baadshaah say bacha loonga. main hee is shaher ka difa karoonga’.”

⁷yah paighaam hizaqiyaah ko suna kar yasaayaah nay mazeed kaha, “rabb tujhay ek nishaan dega jis say too jaan lega ki vah apna vaada poora karega. ⁸meray kahenay par aakhaz kee banaaee huee dhoopaghdee ka saaya das darjay peechhay jaaega.” aur aisa hee hua. saaya das darjay peechhay hat gaya.

shifa paanay par hizaqiyaah ka geet

⁹yahoodaah kay baadshaah hizaqiyaah nay shifa paanay par zail ka geet qalamband kiya,

¹⁰“main bola, kya mujhay zindagee kay urooj par paataal kay darvaazon men daakhil hona hai? baaqeemaanda saal mujh say chheen liyay gaay hain.

¹¹main bola, aainda main rabb ko zindon kay mulk men naheen dekhoonga. ab say main paataal kay baashindon kay saath rah kar is duniya kay logon par nazar naheen daaloonga.

¹²meray ghar ko gallaabaanon kay khaimay kee tarah utaara gaya hai, vah meray oopar say chheen liya gaya hai. main nay apnee zindagee ko joolaahay kee tarah ikhtitaam tak bun liya hai. ab us nay mujhay kaat kar taant kay dhaagon say alag kar diya hai. ek din kay andar andar too nay mujhay khatm kiya.

¹³subah tak main cheekh kar faryaad karta raha, lekin us nay sherbabar kee tarah meree tamaam haddiyaan tod deen. ek din kay andar andar too nay mujhay khatm kiya.

¹⁴main bejaan ho kar abaabeel ya bulbul kee tarah cheen cheen karnay laga, ghoon ghoon karkay kabootar kee see aahen bharnay laga. meree aankhen nidhaal ho kar aasmaan kee taraf taktee raheen. ai rabb, mujh par zulm ho raha hai. meree madad kay liyay a!

¹⁵lekin main kya kahoon? us nay khud mujh say hamkalaam ho kar yah kiya hai. main talkhiyon say maghloob ho kar zindagee kay aakhir tak dabee huee haalat men phiroonga.

¹⁶ai rabb, in hee cheezon kay sabab say insaan zinda raheta hai, meree rooh kee zindagee bhee in hee par mabnee hai. too mujhay bahaal karkay jeenay dega.

¹⁷yaqeenan yah talkh tajriba meree barkat ka baais ban gaya. teree muhabbat nay meree jaan ko qabr say mahfooz rakha, too nay meray tamaam gunaahon ko apnee peeth peechhay phaink diya hai.

¹⁸kyoonki paataal teree hamd-o-sana naheen karta, aur maut teree sitaaish men geet naheen gaatee, zameen kee gaheraaiyon men utray huay teree vafaadaaree kay intizaar men naheen rahetay.

¹⁹naheen, jo zinda hai vahee teree taareef karta, vahee teree tamjeed karta hai, jis tarah main aaj kar raha hoon. pusht-dar-pusht baap apnay bachchon ko teree vafaadaaree kay baaray men bataatay hain.

²⁰rabb mujhay bachaanay kay liyay tayyaar tha. aao, ham umr bhar rabb kay ghar men taardaar saaz bajaaen.”

ilaaj ka tareeq-ay-kaar

²¹yasaayaah nay hidaayat dee thee, “anjeer kee tikkee la kar baadshaah kay naasoor par baandh do! tab usay shifa milegee.” ²²pahelay hizaqiyaah nay poochha tha, “rabb kaun sa nishaan dega jis say mujhay yaqeen aaay ki main dubaara rabb kay ghar kee ibaadat men shareek hoonga?”