Yashaayaah 35
qaum kee rihaaee
1registaan aur piyaasee zameen baagh baagh hongay, biyaabaan khushee mana kar khil uthega. us kay phool sosan kee tarah 2phoot nikalengay, aur vah zor say shaadiyaana baja kar khushee kay naaray lagaaega. usay lubnaan kee shaan, karmil aur shaaroon ka poora husn-o-jamaal diya jaaega. log rabb ka jalaal aur hamaaray khuda kee shaan-o-shaukat dekhengay.
3nidhaal haathon ko taqviyat do, daanvaandol ghutnon ko mazboot karo! 4dhadaktay huay dilon say kaho, “hausla rakho, mat daro. dekho, tumhaara khuda intiqaam lenay kay liyay a raha hai. vah har ek ko jaza-o-saza day kar tumhen bachaanay kay liyay a raha hai.”
5tab andhon kee aankhon ko aur baheron kay kaanon ko khola jaaega.
6langday hiran kee see chhalaangen lagaaengay, aur goongay khushee kay naaray lagaaengay. registaan men chashmay phoot nikalengay, aur biyaabaan men say nadiyaan guzarengee.
7jhulastee huee ret kee jagah johad banega, aur piyaasee zameen kee jagah paanee kay sotay phoot nikalengay. jahaan pahelay geedad aaraam kartay thay vahaan haree ghaas, sarkanday aur aabee narsal kee nashv-o-numa hogee.
8mulk men say shaaharaah guzregee jo ‘shaaharaah-ay-muqaddas’ kahelaaegee. naapaak log us par safar naheen karengay, kyoonki vah saheeh raah par chalnay vaalon kay liyay makhsoos hai. ahemaq us par bhataknay naheen paaengay.
9us par na sherbabar hoga, na koee aur vaheshee jaanvar aaega ya paaya jaaega. sirf vah us par chalengay jinhen allaah nay ivzaana day kar chhuda liya hai.
10jitnon ko rabb nay fidya day kar riha kiya hai vah vaapas aaengay aur geet gaatay huay siyyoon men daakhil hongay. un kay sar par abdee khushee ka taaj hoga, aur vah itnay masroor aur shaadmaan hongay ki maatam aur girya-o-zaaree un kay aagay aagay bhaag jaaegee.