Yashaayaah 34

adom par adaalat ka elaan

¹ai qaumo, qareeb a kar sun lo! ai ummato, dhyaan do! duniya aur jo bhee us men hai kaan lagaaay, zameen aur jo kuchh us men say phoot nikla hai tavajjuh day! ²kyoonki rabb ko tamaam ummaton par ghussa a gaya hai, aur us ka ghazab un kay tamaam lashkaron par naazil ho raha hai. vah unhen mukammal taur par tabaah karega, inhen saffaak kay havaalay karega. ³un kay maqtoolon ko baahar phainka jaaega, aur laashon kee badboo chaaron taraf phailegee. pahaad un kay khoon say sharaabor hongay. ⁴tamaam sitaaray gal jaaengay, aur aasmaan ko toomaar kee tarah lapeta jaaega. sitaaron ka poora lashkar angoor kay murjhaaay huay patton kee tarah jhad jaaega, vah anjeer kay darakht kee sookhee hariyaalee kee tarah gir jaaega.

⁵kyoonki aasmaan par meree talvaar khoon pee pee kar mast ho gaee hai. dekho, ab vah adom par naazil ho rahee hai taaki us kee adaalat karay, us qaum kee jis kee mukammal tabaahee ka faisla main kar chuka hoon. ⁶rabb kee talvaar khoon’aalooda ho gaee hai, aur us say charbee tapaktee hai. bhed-bakriyon ka khoon aur mendhon kay gurdon kee charbee us par lagee hai, kyoonki rabb busra shaher men qurbaanee kee eed aur mulk-ay-adom men qatl-ay-aam ka tahevaar manaaega. ⁷us vaqt janglee bail un kay saath gir jaaengay, aur bachhday taaqatvar saandon samet khatm ho jaaengay. un kee zameen khoon say mast aur khaak charbee say sharaabor hogee.

⁸kyoonki vah din a gaya hai jab rabb badla lega, vah saal jab vah adom say israaeel ka intiqaam lega. ⁹adom kee nadiyon men taarkol hee bahega, aur gandhak zameen ko dhaampegee. mulk bhadaktee huee raal say bhar jaaega, ¹⁰jis kee aag na din aur na raat bujhegee balki hamesha tak dhuaan chhodtee rahegee. mulk nasal-dar-nasal veeraan-o-sunsaan rahega, yahaan tak ki musaafir bhee hamesha tak us men say guzarnay say gurez karengay. ¹¹dashtee ulloo aur khaarapusht us par qabza karengay, chinghaadanay vaalay ulloo aur kavvay us men basera karengay. kyoonki rabb feetay aur saahool say adom ka poora mulk naap naap kar ujaad aur veeraanee kay havaalay karega. ¹²us kay shurfa ka naam-o-nishaan tak naheen rahega. kuchh naheen rahega jo baadshaahee kahelaaay, mulk kay tamaam raees jaatay rahengay. ¹³kaantedaar pauday us kay mahelon par chha jaaengay, khudrau pauday aur oontkataaray us kay qil’aaband shaheron men phail jaaengay. mulk geedad aur uqaabee ulloo ka ghar banega. ¹⁴vahaan registaan kay jaanvar janglee kutton say milengay, aur bakraanuma jin ek doosray say mulaaqaat karengay. leeleet naamee aaseb bhee us men thaherega, vahaan usay bhee aaraamgaah milegee. ¹⁵maada saamp us kay saay men bil bana kar us men apnay anday degee aur unhen say kar paalegee. shikaaree parinday bhee do do ho kar vahaan jama hongay.

¹⁶rabb kee kitaab men padh kar is kee tahqeeq karo! adom men yah tamaam cheezen mil jaaengee. mulk ek say bhee maheroom naheen rahega balki sab mil kar us men paaee jaaengee. kyoonki rabb hee kay munh nay is ka hukm diya hai, aur usee ka rooh inhen ikattha karega. ¹⁷vahee saaree zameen kee paimaaish karega aur phir qur’a daal kar mazkoora jaandaaron men taqseem karega. tab mulk abad tak un kee milkiyat men aaega, aur vah nasal-dar-nasal us men aabaad hongay.