Yashaayaah 33
ya rabb, madad!
1tujh par afsos, jo doosron ko barbaad karnay kay baavujood barbaad naheen hua. tujh par afsos, jo doosron say bevafa tha, haalaanki teray saath bevafaaee naheen huee. lekin teree baaree bhee aaegee. barbaadee ka kaam takmeel tak pahunchaanay par too khud barbaad ho jaaega. bevafaaee ka kaam takmeel tak pahunchaanay par teray saath bhee bevafaaee kee jaaegee.
2ai rabb, ham par meharbaanee kar! ham tujh say ummeed rakhtay hain. har subah hamaaree taaqat ban, museebat kay vaqt hamaaree rihaaee ka baais ho.
3teree garajtee aavaaz sun kar qaumen bhaag jaatee hain, teray uth khaday honay par vah chaaron taraf bikhar jaatee hain. 4ai qaumo, jo maal tum nay loot liya vah doosray chheen lengay. jis tarah tiddiyon kay ghol faslon par jhapat kar sab kuchh chat kar jaatay hain usee tarah doosray tumhaaree pooree milkiyat par toot padengay.
5rabb sarfaraaz hai aur bulandiyon par sukoonat karta hai. vahee siyyoon ko insaaf aur sadaaqat say maalaamaal karega. 6un dinon men vah teree hifaazat kee zamaanat hoga. tujhay najaat, hikmat aur daanaaee ka zakheera haasil hoga, aur rabb ka khauf tera khazaana hoga.
dushman say dhoka, rabb say rihaaee
7suno, un kay soormay galiyon men cheekh rahay hain, amn kay safeer talkh aahen bhar rahay hain. 8sadken veeraan-o-sunsaan hain, aur musaafir un par nazar hee naheen aatay. muaahaday ko toda gaya hai, logon nay us kay gavaahon ko radd karkay insaan ko haqeer jaana hai. 9zameen khushk ho kar murjha gaee hai, lubnaan kamla kar sharminda ho gaya hai. shaaroon ka maidaan beshajar biyaabaan sa ban gaya hai, basan aur karmil apnay pattay jhaad rahay hain.
10lekin rabb farmaata hai, “ab main uth khada hoonga, ab main sarfaraaz ho kar apnee quvvat ka izhaar karoonga. 11tum ummeed say ho, lekin pet men sookhee ghaas hee hai, aur janm detay vaqt bhoosa hee paida hoga. jab tum phoonk maarogay to tumhaara dam aag ban kar tum hee ko raakh kar dega. 12aqvaam yoon bhasm ho jaaengee ki choona hee rah jaaega, vah khaardaar jhaadiyon kee tarah kat kar jal jaaengee. 13ai doordaraaz ilaaqon kay baashindo, vah kuchh suno jo main nay kiya hai. ai qareeb kay basnay vaalo, meree qudrat jaan lo.”
14siyyoon men gunaahgaar ghabra gaay hain, bedeen pareshaanee kay aalam men thartharaatay huay chilla rahay hain, “ham men say kaun bhasm karnay vaalee is aag kay saamnay zinda rah sakta hai? ham men say kaun hamesha tak bhadaknay vaalee is angeethee kay qareeb qaaim rah sakta hai?” 15lekin vah shakhs qaaim rahega jo raast zindagee guzaaray aur sachchaaee bolay, jo ghairqaanoonee nafa aur rishvat lenay say inkaar karay, jo qaatilaana saazishon aur ghalat kaam say gurez karay. 16vahee bulandiyon par basega aur pahaad kay qilaay men mahfooz rahega. usay rotee miltee rahegee, aur paanee kee kabhee kamee na hogee.
purjalaal baadshaah ka mulk
17teree aankhen baadshaah aur us kee pooree khoobsoortee ka mushaahada karengee, vah ek vasee aur door door tak phaila hua mulk dekhengee. 18tab too guzray huay haulnaak vaqt par ghaur-o-khauz karkay poochhega, “dushman kay baday afsar kidhar hain? taiks lenay vaala kahaan ghaaib hua? vah afsar kidhar hai jo burjon ka hisaab-kitaab karta tha?” 19aainda tujhay yah gustaakh qaum nazar naheen aaegee, yah log jo naaqaabil-ay-fahem zabaan boltay aur haklaatay huay aisee baaten kartay hain jo samajh men naheen aateen.
20hamaaree eedon kay shaher siyyoon par nazar daal! teree aankhen yarooshalam ko dekhengee. us vaqt vah mahfooz sukoonatgaah hoga, ek khaima jo aainda kabhee naheen hatega, jis kee mekhen kabhee naheen nikalengee, aur jis ka ek rassa bhee naheen tootega.
21vahaan rabb hee hamaara zoraavar aaqa hoga, aur shaher daryaaon ka maqaam hoga, aisee chaudee nadiyon ka maqaam jin par na chappoo vaalee kashtee, na shaandaar jahaaz chalega. 22kyoonki rabb hee hamaara qaazee, rabb hee hamaara sardaar aur rabb hee hamaara baadshaah hai. vahee hamen chhutkaara dega. 23dushman ka beda gharq honay vaala hai. baadbaan kay rassay dheelay hain, aur na vah mastool ko mazboot rakhnay, na baadbaan ko phailaaay rakhnay men madad detay hain. us vaqt kasrat ka loota hua maal batega, balki itna maal hoga ki langday bhee lootnay men shirkat karengay. 24siyyoon ka koee bhee fard naheen kahega, “main kamzor hoon,” kyoonki us kay baashindon kay gunaah bakhshay gaay hongay.