Yashaayaah 32

raast baadshaah kee aamad

¹ek baadshaah aanay vaala hai jo insaaf say hukoomat karega. us kay afsar bhee sadaaqat say hukmraanee karengay. ²har ek aandhee aur toofaan say panaah dega, har ek registaan men nadiyon kee tarah tar-o-taaza karega, har ek taptee dhoop men badee chataan ka sa saaya dega.

³tab dekhnay vaalon kee aankhen andhee naheen rahengee, aur sunnay vaalon kay kaan dhyaan dengay. ⁴jaldbaazon kay dil samajhdaar ho jaaengay, aur haklon kee zabaan ravaanee say saaf baat karegee. ⁵us vaqt na ahemaq shareef kahelaaega, na badam’aash ko mumtaaz qaraar diya jaaega. ⁶kyoonki ahemaq hamaaqat bayaan karta hai, aur us ka zahen shareer mansoobay baandhta hai. vah bedeen harkaten karkay rabb kay baaray men kufr bakta hai. bhookay ko vah bhooka chhodta aur piyaasay ko paanee peenay say rokta hai. ⁷badam’aash kay tareeq-ay-kaar shareer hain. vah zarooratmand ko jhoot say tabaah karnay kay mansoobay baandhta raheta hai, khwaah ghareeb haq par kyoon na ho. ⁸us kay muqaablay men shareef aadmee shareef mansoobay baandhta aur shareef kaam karnay men saabitqadam raheta hai.

beparva zindagee khatm honay vaalee hai

⁹ai beparva aurto, uth kar meree baat suno! ai betiyo jo apnay aap ko mahfooz samajhtee ho, meray alfaaz par dhyaan do! ¹⁰ek saal aur chand ek dinon kay baad tum jo apnay aap ko mahfooz samajhtee ho kaamp uthogee. kyoonki angoor kee fasal zaaay ho jaaegee, aur phal kee fasal paknay naheen paaegee. ¹¹ai beparva aurto, laraz utho! ai betiyo jo apnay aap ko mahfooz samajhtee ho, tharatharaao! apnay achchhay kapdon ko utaar kar taat kay libaas pahen lo. ¹²apnay seenon ko peet peet kar apnay khushgavaar kheton aur angoor kay phaldaar baaghon par maatam karo. ¹³meree qaum kee zameen par aah-o-zaaree karo, kyoonki us par khaardaar jhaadiyaan chha gaee hain. rangraliyaan manaanay vaalay shaher kay tamaam khushbaash gharon par gham khaao. ¹⁴mahel veeraan hoga, raunaqdaar shaher sunsaan hoga. qil’a aur burj hamesha kay liyay ghaar banengay jahaan janglee gadhay apnay dil bahelaaengay aur bhed-bakriyaan charengee.

allaah kay rooh say bahaalee

¹⁵jab tak allaah apna rooh ham par naazil na karay us vaqt tak haalaat aisay hee rahengay. lekin phir registaan baagh men tabdeel ho jaaega, aur baagh kay phaldaar darakht jangal jaisay ghanay ho jaaengay. ¹⁶tab insaaf registaan men basega, aur sadaaqat phaltay phooltay baagh men sukoonat karegee. ¹⁷insaaf ka phal amn-o-amaan hoga, aur sadaaqat ka asar abdee sukoon aur hifaazat hogee.

¹⁸meree qaum pursukoon aur mahfooz aabaadiyon men basegee, us kay ghar aaraamdih aur pur’amn hongay. ¹⁹go jangal tabaah aur shaher zameenabos kyoon na ho, ²⁰lekin tum mubaarak ho jo har nadee kay paas beej bo sakogay aur aazaadee say apnay gaay-bailon aur gadhon ko chara sakogay.