Yashaayaah 31
misr kee madad bekaar hai
1un par afsos jo madad kay liyay misr jaatay hain. un kee pooree ummeed ghodon say hai, aur vah apnay mut’addid rathon aur taaqatvar ghudasavaaron par etimaad rakhtay hain. afsos, na vah israaeel kay quddoos kee taraf nazar uthaatay, na rabb kee marzee darayaaft kartay hain. 2lekin allaah bhee daana hai. vah tum par aafat laaega aur apna farmaan mansookh naheen karega balki shareeron kay ghar aur un kay muaavinon kay khilaaf uth khada hoga. 3misree to khuda naheen balki insaan hain. aur un kay ghoday aalam-ay-arvaah kay naheen balki faanee duniya kay hain. jahaan bhee rabb apna haath badhaaay vahaan madad karnay vaalay madad milnay vaalon samet thokar kha kar gir jaatay hain, sab mil kar halaak ho jaatay hain.
4rabb mujh say hamkalaam hua, “siyyoon par utartay vaqt main us javaan sherbabar kee tarah hoonga jo bakree maar kar us kay oopar khada ghurraata hai. go mut’addid gallaabaanon ko usay bhagaanay kay liyay bulaaya jaaay to bhee vah un kee cheekhon say dahshat naheen khaata, na un kay shor-sharaaba say dar kar dabak jaata hai. rabb-ul-afwaaj isee tarah hee koh-ay-siyyoon par utar kar ladega. 5rabb-ul-afwaaj par phailaaay huay parinday kee tarah yarooshalam ko panaah dega, vah usay mahfooz rakh kar chhutkaara dega, usay saza denay kay bajaay riha karega.”
6ai israaeeliyo, jis say tum sarkash ho kar itnay door ho gaay ho us kay paas vaapas a jaao. 7ab tak tum apnay haathon say banay huay sonay-chaandee kay buton kee pooja kartay ho, ab tak tum is gunaah men mulavvas ho. lekin vah din aanay vaala hai jab har ek apnay buton ko radd karega.
8“asoor talvaar kee zad men a kar gir jaaega. lekin yah kisee mard kee talvaar naheen hogee. jo talvaar asoor ko kha jaaegee vah faanee insaan kee naheen hogee. asoor talvaar kay aagay aagay bhaagega, aur us kay javaanon ko begaar men kaam karna padega. 9us kee chataan dar kay maaray jaatee rahegee, us kay afsar lashkree jhanday ko dekh kar dahshat khaaengay.” yah rabb ka farmaan hai jis kee aag siyyoon men bhadaktee aur jis ka tanoor yarooshalam men tapta hai.