Yashaayaah 30

misr kay vaaday bekaar hain

¹rabb farmaata hai, “ai ziddee bachcho, tum par afsos! kyoonki tum meray baghair mansoobay baandhtay aur meray rooh kay baghair muaahaday kar letay ho. gunaahon men izaafa kartay karte ²tum nay mujh say mashvra liyay baghair misr kee taraf rujoo kiya taaki firaaun kee aad men panaah lo aur misr kay saay men hifaazat paao. ³lekin khabardaar! firaaun ka taheffuz tumhaaray liyay sharm ka baais banega, misr kay saay men panaah lenay say tumhaaree rusvaaee ho jaaegee. ⁴kyoonki go us kay afsar zuan men hain aur us kay elchee hanees tak pahunch gaay hain ⁵to bhee sab is qaum say sharminda ho jaaengay, kyoonki is kay saath muaahada bekaar hoga. is say na madad aur na faaida haasil hoga balki yah sharm aur khajaalat ka baais hee hogee.”

⁶dasht-ay-najab kay jaanvaron kay baaray men rabb ka farmaan :

yahoodaah kay safeer ek takleefdih aur pareshaanakun mulk men say guzar rahay hain jis men sherbabar, shernee, zahereelay aur udanasaamp bastay hain. un kay gadhay aur oont yahoodaah kee daulat aur khazaanon say laday huay hain, aur vah sab kuchh misr kay paas pahuncha rahay hain, go is qaum ka koee faaida naheen. ⁷misr kee madad fuzool hee hai! is liyay main nay misr ka naam ‘raheb ajhdaha jis ka munh band kar diya gaya hai’ rakha hai.

⁸ab doosron kay paas ja kar sab kuchh takhtay par likh. usay kitaab kee soorat men qalamband kar taaki meray alfaaz aanay vaalay dinon men hamesha tak gavaahee den. ⁹kyoonki yah qaum sarkash hai, yah log dhokebaaz bachchay hain jo rabb kee hidaayaat ko maannay kay liyay tayyaar hee naheen. ¹⁰ghaibbeenon ko vah kahetay hain, “roya say baaz aao.” aur roya dekhnay vaalon ko vah hukm detay hain, “hamen sachchee roya mat bataana balki hamaaree khushaamad karnay vaalee baaten. farebdih roya dekh kar hamaaray aagay bayaan karo! ¹¹saheeh raastay say hat jaao, seedhee raah ko chhod do. hamaaray saamnay israaeel kay quddoos ka zikr karnay say baaz aao!”

¹²javaab men israaeel ka quddoos farmaata hai, “tum nay yah kalaam radd karkay zulm aur chaalaakee par bharosa balki poora etimaad kiya hai. ¹³ab yah gunaah tumhaaray liyay us oonchee deevaar kee maanind hoga jis men daraaden pad gaee hain. daraaden phailtee hain aur deevaar baithee jaatee hai. phir achaanak ek hee lamhay men vah dhadaam say zameenabos ho jaatee hai. ¹⁴vah tukday tukday ho jaatee hai, bilkul mittee kay us bartan kee tarah jo berahemee say chikna-choor kiya jaata hai aur jis ka ek tukda bhee aag say koilay utha kar lay jaanay ya hauz say thoda bahut paanee nikaalnay kay qaabil naheen rah jaata.”

sabr kay saath rabb par bharosa rakho

¹⁵rabb qaadir-ay-mutlaq jo israaeel ka quddoos hai farmaata hai, “vaapas a kar sukoon paao, tab hee tumhen najaat milegee. khaamosh rah kar mujh par bharosa rakho, tab hee tumhen taqviyat milegee. lekin tum is kay liyay tayyaar hee naheen thay.

¹⁶choonki tum javaab men bolay, ‘hargiz naheen, ham apnay ghodon par savaar ho kar bhaagengay’ is liyay tum bhaag jaaogay. choonki tum nay kaha, ‘ham tez ghodon par savaar ho kar bach nikalengay’ is liyay tumhaara taaqqub karnay vaalay kaheen ziyaada tez hongay. ¹⁷tumhaaray hazaar mard ek hee aadmee kee dhamkee par bhaag jaaengay. aur jab dushman kay paanch afraad tumhen dhamakaaengay to tum sab kay sab faraar ho jaaogay. aakhirkaar jo bachengay vah pahaad kee chotee par parcham kay danday kee tarah tanha rah jaaengay, pahaadee par jhanday kee tarah akelay hongay.”

¹⁸lekin rabb tumhen meharbaanee dikhaanay kay intizaar men hai, vah tum par rahem karnay kay liyay uth khada hua hai. kyoonki rabb insaaf ka khuda hai. mubaarak hain vah jo us kay intizaar men rahetay hain.

¹⁹ai siyyoon kay baashindo jo yarooshalam men rahetay ho, aainda tum naheen roogay. jab tum faryaad karogay to vah zaroor tum par meharbaanee karega. tumhaaree suntay hee vah javaab dega. ²⁰go maazee men rabb nay tumhen tangee kee rotee khilaaee aur zulm ka paanee pilaaya, lekin ab tera ustaad chhupa naheen rahega balki teree apnee hee aankhen usay dekhengee. ²¹agar daaeen ya baaeen taraf mudna hai to tumhen peechhay say hidaayat milegee, “yahee raasta saheeh hai, isee par chalo!” tumhaaray apnay kaan yah sunengay. ²²us vaqt tum chaandee aur sonay say sajay huay apnay buton kee behuramtee karogay. tum “uf, gandee cheez!” kah kar unhen naapaak kachray kee tarah baahar phainkogay.

²³beej botay vaqt rabb teray kheton par baarish bhej kar behtareen faslen paknay dega, ghizaaiyatabakhsh khuraak muhayya karega. us din teree bhed-bakriyaan aur gaay-bail vasee charaagaahon men charengay. ²⁴kheteebaadee kay liyay mustaamal bailon aur gadhon ko chhaaj aur doshaakhay kay zareeay saaf kee gaee behtareen khuraak milegee. ²⁵us din jab dushman halaak ho jaaega aur us kay burj gir jaaengay to har oonchay pahaad say naheren aur har bulandee say naalay bahengay. ²⁶chaand sooraj kee maanind chamkega jabki sooraj kee raushnee sau guna ziyaada tez hogee. ek din kee raushnee saat aam dinon kee raushnee kay baraabar hogee. us din rabb apnee qaum kay zakhmon par marham-pattee karkay usay shifa dega.

rabb asooriyon kee adaalat karta hai

²⁷vah dekho, rabb ka naam doordaraaz ilaaqay say a raha hai. vah ghaiz-o-ghazab say aur baday rob kay saath qareeb pahunch raha hai. us kay hont qaher say hil rahay hain, us kee zabaan kay aagay aagay sab kuchh raakh ho raha hai. ²⁸us ka dam kinaaron say baahar aanay vaalee nadee hai jo sab kuchh galay tak dubo detee hai. vah aqvaam ko halaakat kee chhalnee men chhaan chhaankar un kay munh men dahaana daalta hai taaki vah bhatak kar tabaahakun raah par aaen.

²⁹lekin tum geet gaaogay, aisay geet jaisay muqaddas eed kee raat gaaay jaatay hain. itnee raunaq hogee ki tumhaaray dil phoolay na samaaengay. tumhaaree khushee un zaaireen kee maanind hogee jo baansree bajaatay huay rabb kay pahaad par chadhtay aur israaeel kee chataan kay huzoor aatay hain.

³⁰tab rabb apnee baarob aavaaz say logon par apnee qudrat ka izhaar karega. us ka sakht ghazab aur bhasm karnay vaalee aag naazil hogee, saath saath baarish kee tez bauchhaad aur olon ka toofaan un par toot padega. ³¹rabb kee aavaaz asoor ko paash paash kar degee, us kee laathee usay maartee rahegee. ³²aur joon joon rabb saza kay lath say asoor ko zarb lagaaega toon toon daf aur sarod bajengay. apnay zoraavar baazoo say vah asoor say ladega. ³³kyoonki badee der say vah gadha tayyaar hai jahaan asooree baadshaah kee laash ko jalaana hai. usay gahera aur chauda banaaya gaya hai, aur us men lakdee ka bada dher hai. rabb ka dam hee usay gandhak kee tarah jalaaega.