Yashaayaah 3

yahoodaah kee tabaahee

¹qaadir-ay-mutlaq rabb-ul-afwaaj yarooshalam aur yahoodaah say sab kuchh chheennay ko hai jis par log inhisaar kartay hain. rotee ka har luqma aur paanee ka har qatra, ²soormay aur faujee, qaazee aur nabee, qismat ka haal bataanay vaalay aur buzurg, ³faujee afsar aur asar-o-rasookh vaalay, musheer, jaadoogar aur mantr phoonknay vaalay, sab kay sab chheen liyay jaaengay. ⁴main ladkay un par muqarrar karoonga, aur mutalavvinamizaaj zaalim un par hukoomat karengay. ⁵avaam ek doosray par zulm karengay, aur har ek apnay padosee ko dabaaega. naujavaan buzurgon par aur kameenay, izzatdaaron par hamla karengay.

⁶tab koee apnay baap kay ghar men apnay bhaaee ko pakad kar us say kahega, “teray paas ab tak chaadar hai, is liyay a, hamaara sarbaraah ban ja! khandaraat kay is dher ko sambhaalnay kee zimmaadaaree utha lay!”

⁷lekin vah cheekh kar inkaar karega, “naheen, main tumhaara muaalaja kar hee naheen sakta! meray ghar men na rotee hai, na chaadar. mujhay avaam ka sarbaraah mat banaana!”

⁸yarooshalam dagamga raha hai, yahoodaah dhadaam say gir gaya hai. aur vajah yah hai ki vah apnee baaton aur harkaton say rabb kee mukhaalafat kartay hain. us kay jalaalee huzoor hee men vah sarkashee ka izhaar kartay hain. ⁹un kee jaanibdaaree un kay khilaaf gavaahee detee hai. aur vah sadoom kay baashindon kee tarah alaaniya apnay gunaahon par fakhar kartay hain, vah unhen chhupaanay kee koshish hee naheen kartay. un par afsos! vah to apnay aap ko museebat men daal rahay hain.

¹⁰raastbaazon ko mubaarakabaad do, kyoonki vah apnay aamaal kay achchhay phal say lutf’andoz hongay. ¹¹lekin bedeenon par afsos! un ka anjaam bura hoga, kyoonki unhen ghalat kaam kee munaasib saza milegee.

¹²haay, meree qaum! mutalavvinamizaaj tujh par zulm kartay aur aurten tujh par hukoomat kartee hain.

ai meree qaum, teray raahanuma tujhay gumraah kar rahay hain, vah tujhay uljha kar saheeh raah say bhatka rahay hain.

rabb apnee qaum kee adaalat karta hai

¹³rabb adaalat men muqaddma ladnay kay liyay khada hua hai, vah qaumon kee adaalat karnay kay liyay utha hai. ¹⁴rabb apnee qaum kay buzurgon aur raeeson ka faisla karnay kay liyay saamnay a kar farmaata hai, “tum hee angoor kay baagh men chartay huay sab kuchh kha gaay ho, tumhaaray ghar zarooratmandon kay lootay huay maal say bharay paday hain. ¹⁵yah tum nay kaisee gustaakhee kar dikhaaee? yah meree hee qaum hai jisay tum kuchal rahay ho. tum museebatazadon kay chiharon ko chakkee men pees rahay ho.” qaadir-ay-mutlaq rabb-ul-afwaaj yoon farmaata hai.

yarooshalam kee khavaateen kee adaalat

¹⁶rabb nay farmaaya, “siyyoon kee betiyaan kitnee maghroor hain. jab aankh maar maar kar chaltee hain to apnee gardanon ko kitnee shokhee say idhar udhar ghumaatee hain. aur jab matak matak kar qadam uthaatee hain to paaon par bandhay huay ghunghroo boltay hain tan tan, tan tan.”

¹⁷javaab men rabb un kay saron par phoday paida karkay un kay maathon ko ganja honay dega. ¹⁸us din rabb un ka tamaam singaar utaar dega : un kay ghunghroo, sooraj aur chaand kay zevraat, ¹⁹aavezay, kaday, dopattay, ²⁰sajeelee topiyaan, paayal, khushboo kee botlen, taaveez, ²¹angoothiyaan, nath, ²²shaandaar kapday, chaadren, batvay, ²³aaeenay, nafees libaas, sarband aur shaal. ²⁴khushboo kee bajaay badboo hogee, kamarband kay bajaay rassee, suljhay huay baalon kay bajaay ganjaapan, shaandaar libaas kay bajaay taat, khoobsoortee kee bajaay sharmindagee.

²⁵haay, yarooshalam! teray mard talvaar kee zad men a kar marengay, teray soormay ladtay ladtay shaheed ho jaaengay. ²⁶shaher kay darvaazay aahen bhar bhar kar maatam karengay, siyyoon betee tanha rah kar khaak men baith jaaegee.