Yashaayaah 29
yarooshalam khabardaar rahe
1ai areeel, areeel [a] muraad hai yarooshalam. areeel ka ek matlab allaah ka sherbabar aur doosra bhasm honay vaalee qurbaaniyon kee qurbaangaah hai. yahaan donon matlab mumkin hain. , tujh par afsos! ai shaher jis men daaood khaimaazan tha, tujh par afsos! chalo, saal-ba-saal apnay tahevaar manaatay raho. 2lekin main areeel ko yoon gher kar tang karoonga ki us men aah-o-zaaree sunaaee degee. tab yarooshalam meray nazdeek saheeh maanon men areeel saabit hoga. 3kyoonki main tujhay har taraf say pushtaabandee say gher kar band rakhoonga, teray muhaasaray ka poora band-o-bast karoonga. 4tab too itna past hoga ki khaak men say bolega, teree dabee dabee aavaaz gard men say niklegee. jis tarah murda rooh zameen kay andar say sargoshee kartee hai usee tarah teree dheemee dheemee aavaaz zameen men say niklegee.
5lekin achaanak teray mut’addid dushman baareek dhool kee tarah ud jaaengay, zaalimon ka ghol hava men bhoosay kee tarah tittar-bittar ho jaaega. kyoonki achaanak, ek hee lamhay men 6rabb-ul-afwaaj un par toot padega. vah bijlee kee kadaktee aavaazen, zalzla, bada shor, tez aandhee, toofaan aur bhasm karnay vaalee aag kay sholay apnay saath lay kar shaher kee madad karnay aaega. 7tab areeel say ladnay vaalee tamaam qaumon kay ghol khwaab jaisay lagengay. jo yarooshalam par hamla karkay us ka muhaasara kar rahay aur usay tang kar rahay thay vah raat men roya jaisay ghairhaqeeqee lagengay. 8tumhaaray dushman us bhookay aadmee kee maanind hongay jo khwaab men dekhta hai ki main khaana kha raha hoon, lekin phir jaag kar jaan leta hai ki main vaisay ka vaisa bhooka hoon. tumhaaray mukhaalif us piyaasay aadmee kee maanind hongay jo khwaab men dekhta hai ki main paanee pee raha hoon, lekin phir jaag kar jaan leta hai ki main vaisay ka vaisa nidhaal aur piyaasa hoon. yahee un tamaam bain-ul-aqvaamee gholon ka haal hoga jo koh-ay-siyyoon say jang karengay.
allaah ka kalaam qaum kee samajh say baahar hai
9hairatzada ho kar hakka-bakka rah jaao! andhay ho kar naabeena ho jaao! matwaalay ho jaao, lekin mai say naheen. ladkhadaatay jaao, lekin sharaab say naheen. 10kyoonki rabb nay tumhen gaheree neend sula diya hai, us nay tumhaaree aankhon yaanee nabiyon ko band kiya aur tumhaaray saron yaanee roya dekhnay vaalon par parda daal diya hai.
11is liyay jo bhee kalaam naazil hua hai vah tumhaaray liyay sar-ba-muhar kitaab hee hai. agar usay kisee padhay-likhay aadmee ko diya jaaay taaki padhay to vah javaab dega, “yah padha naheen ja sakta, kyoonki is par muhar hai.” 12aur agar usay kisee anpadh aadmee ko diya jaaay to vah kahega, “main anpadh hoon.”
13rabb farmaata hai, “yah qaum meray huzoor a kar apnee zabaan aur honton say to mera ehatiraam kartee hai, lekin us ka dil mujh say door hai. un kee khudaatarasee sirf insaan hee kay ratay-rataaay ahkaam par mabnee hai. 14is liyay aainda bhee mera is qaum kay saath sulook hairat’angez hoga. haan, mera sulook ajeeb-o-ghareeb hoga. tab us kay daanishmandon kee daanish jaatee rahegee, aur us kay samajhdaaron kee samajh ghaaib ho jaaegee.”
15un par afsos jo apna mansooba zameen kee gaheraaiyon men daba kar rabb say chhupaanay kee koshish kartay hain, jo taareekee men apnay kaam karkay kahetay hain, “kaun hamen dekh lega, kaun hamen pahechaan lega?” 16tumhaaree kajarvee par laanat! kya kumhaar ko us kay gaaray kay baraabar samjha jaata hai? kya banee huee cheez banaanay vaalay kay baaray men kahetee hai, “us nay mujhay naheen banaaya”? ya kya jis ko tashkeel diya gaya hai vah tashkeel denay vaalay kay baaray men kaheta hai, “vah kuchh naheen samajhta”? hargiz naheen!
badee tabdeeliyaan aanay vaalee hain
17thodee hee der kay baad lubnaan ka jangal phaltay phooltay baagh men tabdeel hoga jabki phalta phoolta baagh jangal sa lagega. 18us din baheray kitaab kee tilaavat sunengay, aur andhon kee aankhen andheray aur taareekee men say nikal kar dekh sakengee. 19ek baar phir farotan rabb kee khushee manaaengay, aur muhtaaj israaeel kay quddoos kay baais shaadiyaana bajaaengay. 20zaalim ka naam-o-nishaan naheen rahega, taanaazan khatm ho jaaengay, aur doosron kee taak men baithnay vaalay sab kay sab roo-ay-zameen par say mit jaaengay. 21yahee un ka anjaam hoga jo adaalat men doosron ko qusoorvaar thaheraatay, shaher kay darvaazay men adaalat karnay vaalay qaazee ko phansaanay kee koshish kartay aur jhootee gavaahiyon say bequsoor ka haq maartay hain.
22chunaanchay rabb jis nay pahelay ibraaheem ka bhee fidya day kar usay chhudaaya tha yaaqoob kay gharaanay say farmaata hai, “ab say yaaqoob sharminda naheen hoga, ab say israaeeliyon ka rang faq naheen pad jaaega. 23jab vah apnay darmiyaan apnay bachchon ko jo meray haathon ka kaam hain dekhengay to vah meray naam ko muqaddas maanengay. vah yaaqoob kay quddoos ko muqaddas jaanengay aur israaeel kay khuda ka khauf maanengay. 24us vaqt jin kee rooh aavaara hai vah samajh haasil karengay, aur budbudaanay vaalay taaleem qabool karengay.”