Yashaayaah 28

maghroor shaher saamriya murjhaanay vaala phool hai

¹saamriya par afsos jo israaeelee sharaabiyon ka shaandaar taaj hai. us shaher par afsos jo israaeel kee shaan-o-shaukat tha lekin ab murjhaanay vaala phool hai. us aabaadee par afsos jo nashay men dhut logon kee zarkhez vaadee kay oopar takhtnasheen hai. ²dekho, rabb ek zabardast soorma bhejega jo olon kay toofaan, tabaahakun aandhee aur sailaab paida karnay vaalee mooslaadhaar baarish kee tarah saamriya par toot padega aur zor say usay zameen par patakh dega. ³tab israaeelee sharaabiyon ka shaandaar taaj saamriya paaon talay raunda jaaega. ⁴tab yah murjhaanay vaala phool jo zarkhez vaadee kay oopar takhtnasheen hai aur us kee shaan-o-shaukat khatm ho jaaegee. us ka haal fasal say pahelay paknay vaalay anjeer jaisa hoga. kyoonki joon hee koee usay dekhay vah usay tod kar hadap kar lega.

⁵us din rabb-ul-afwaaj khud israaeel ka shaandaar taaj hoga, vah apnee qaum kay bachay huon ka jalaalee sihara hoga. ⁶vah adaalat karnay vaalay ko insaaf kee rooh dilaaega aur shaher kay darvaazay par dushman ko peechhay dhakelnay vaalon kay liyay taaqat ka baais hoga.

yarooshalam kay matwaalay nabee

⁷lekin yah log bhee mai kay asar say dagamga rahay aur sharaab pee pee kar ladakhda rahay hain. imaam aur nabee nashay men jhoom rahay hain. mai peenay say un kay dimaaghon men khalal a gaya hai, sharaab pee pee kar vah chakkar kha rahay hain. roya dekhtay vaqt vah jhoomtay, faislay kartay vaqt jhooltay hain. ⁸tamaam mezen un kee qai say gandee hain, un kee ghilaazat har taraf nazar aatee hai.

⁹vah aapas men kahetay hain, “yah shakhs hamaaray saath is qism kee baaten kyoon karta hai? hamen taaleem detay aur ilaahee paighaam ka matlab sunaatay vaqt vah hamen yoon samjhaata hai goya ham chhotay bachchay hon jin ka doodh abhee abhee chhudaaya gaya ho. ¹⁰kyoonki yah kaheta hai, ‘sav laasav sav laasav, qav laaqav qav laaqav, thoda sa is taraf thoda sa us taraf’.”

¹¹chunaanchay ab allaah haklaatay huay honton aur ghairzabaanon kee maarifat is qaum say baat karega. ¹²go us nay un say farmaaya tha, “yah aaraam kee jagah hai. thakemaandon ko aaraam do, kyoonki yaheen vah sukoon paaengay.” lekin vah sunnay kay liyay tayyaar naheen thay. ¹³is liyay aainda rabb un say in hee alfaaz say hamkalaam hoga, “sav laasav sav laasav, qav laaqav kav laaqav, thoda sa is taraf, thoda sa us taraf.” kyoonki laazim hai ki vah chal kar thokar khaaen, aur dhadaam say apnee pusht par gir jaaen, ki vah zakhmee ho jaaen aur phanday men phans kar giriftaar ho jaaen.

allaah ka vaazih paighaam

¹⁴chunaanchay ab rabb ka kalaam sun lo, ai mazaaq udaanay vaalo, jo yarooshalam men basnay vaalee is qaum par hukoomat kartay ho. ¹⁵tum shekhee maar kar kahetay ho, “ham nay maut say ahd baandha aur paataal say muaahada kiya hai. is liyay jab saza ka sailaab ham par say guzray to hamen nuqsaan naheen pahunchaaega. kyoonki ham nay jhoot men panaah lee aur dhokay men chhup gaay hain.” ¹⁶is kay javaab men rabb qaadir-ay-mutlaq farmaata hai, “dekho, main siyyoon men ek patthar rakh deta hoon, konay ka ek aazmooda aur qeemtee patthar jo mazboot bunyaad par laga hai. jo eemaan laaega vah kabhee naheen hilega. ¹⁷insaaf mera feeta aur raastee meree saahool kee doree hogee. in say main sab kuchh parkhoonga.

olay us jhoot ka safaaya karengay jis men tum nay panaah lee hai, aur sailaab teree chhupnay kee jagah uda kar apnay saath baha lay jaaega. ¹⁸tab tera maut kay saath ahd mansookh ho jaaega, aur tera paataal kay saath muaahada qaaim naheen rahega. saza ka sailaab tum par say guzar kar tumhen paamaal karega. ¹⁹vah subah-ba-subah aur din raat guzrega, aur jab bhee guzrega to tumhen apnay saath baha lay jaaega. us vaqt log dahshatzada ho kar kalaam ka matlab samjhengay.” ²⁰chaarpaaee itnee chhotee hogee ki tum paaon phaila kar so naheen sakogay. bistar kee chaudaaee itnee kam hogee ki tum usay lapet kar aaraam naheen kar sakogay.

²¹kyoonki rabb uth kar yoon tum par jhapat padega jis tarah paraazeem pahaad kay paas filistiyon par jhapat pada. jis tarah vaadee-ay-jibaoon men amoriyon par toot pada usee tarah vah tum par toot padega. aur jo kaam vah karega vah ajeeb hoga, jo qadam vah uthaaega vah maamool say hat kar hoga. ²²chunaanchay apnee taanaaznee say baaz aao, varna tumhaaree zanjeeren mazeed zor say kas dee jaaengee. kyoonki mujhay qaadir-ay-mutlaq rabb-ul-afwaaj say paighaam mila hai ki tamaam duniya kee tabaahee mut’ayyin hai.

maahir kisaan kee tamseel

²³ghaur say meree baat suno! dhyaan say us par kaan dharo jo main kah raha hoon! ²⁴jab kisaan khet ko beej bonay kay liyay tayyaar karta hai to kya vah poora din hal chalaata raheta hai? kya vah apna poora vaqt zameen khodnay aur dhelay todnay men sarf karta hai? ²⁵hargiz naheen! jab pooray khet kee satah hamvaar aur tayyaar hai to vah apnee apnee jagah par siyaah zeera aur safed zeera, gandum, baajra aur jo ka beej bota hai. aakhir men vah kinaaray par chaaray ka beej bota hai. ²⁶kisaan ko khoob maaloom hai ki kya kya karna hota hai, kyoonki us kay khuda nay usay taaleem day kar saheeh tareeqa sikhaaya. ²⁷chunaanchay siyaah zeera aur safed zeera ko anaaj kee tarah gaaha naheen jaata. daanay nikaalnay kay liyay un par vaznee cheez naheen chalaaee jaatee balki unhen danday say maara jaata hai. ²⁸aur kya anaaj ko gaah gaah kar peesa jaata hai? hargiz naheen! kisaan usay hadd say ziyaada naheen gaahata. go us kay ghoday koee vaznee cheez khainchtay huay baaliyon par say guzartay hain taaki daanay niklen taaham kisaan dhyaan deta hai ki daanay pis na jaaen. ²⁹usay yah ilm bhee rabb-ul-afwaaj say mila hai jo zabardast mashvaron aur kaamil hikmat ka mamba hai.