Yashaayaah 27

¹us din rabb us bhaagnay aur pech-o-taab khaanay vaalay saamp ko saza dega jo liviyaataan kahelaata hai. apnee sakht, azeem aur taaqatvar talvaar say vah samundar kay ajhdahay ko maar daalega.

angoor kay baagh ka naya geet

²us din kaha jaaega,

“angoor ka kitna khoobsoorat baagh hai! us kee taareef men geet gaao! ³main, rabb khud hee usay sambhaalta, usay musalsal paanee deta raheta hoon. din raat main us kee paheraadaaree karta hoon taaki koee usay nuqsaan na pahunchaaay.

⁴ab mera ghussa thanda ho gaya hai. lekin agar baagh men oontkataaray aur khaardaar jhaadiyaan mil jaaen to main un say nipat loonga, main un say jang karkay sab ko jala doonga. ⁵lekin agar vah maan jaaen to meray paas a kar panaah len. vah meray saath sulah karen, haan meray saath sulah karen.”

saza kay baavujood israaeel par rahem

⁶ek vaqt aaega ki yaaqoob jad pakdega. israaeel ko phool lag jaaengay, us kee komplen nikalengee aur duniya us kay phal say bhar jaaegee. ⁷kya rabb nay apnee qaum ko yoon maara jis tarah us nay israaeel ko maarnay vaalon ko maara hai? hargiz naheen! ya kya israaeel ko yoon qatl kiya gaya jis tarah us kay qaatilon ko qatl kiya gaya hai? ⁸naheen, balki too nay usay dara kar aur bhaga kar us say javaab talab kiya, too nay us kay khilaaf mashriq say tez aandhee bhej kar usay apnay huzoor say nikaal diya.

⁹is tarah yaaqoob kay qusoor ka kaffaara diya jaaega. aur jab israaeel ka gunaah door ho jaaega to nateejay men vah tamaam ghalat qurbaanagaahon ko choonay kay pattharon kee tarah chikna-choor karega. na yaseerat devee kay khambay, na bakhoor jalaanay kee ghalat qurbaangaahen khadee rahengee. ¹⁰kyoonki qil’aaband shaher tanha rah gaya hai. logon nay usay veeraan chhod kar registaan kee tarah tark kar diya hai. ab say us men bachhday hee charengay. vahee us kee galiyon men aaraam karkay us kee taheniyon ko chaba lengay. ¹¹tab us kee shaakhen sookh jaaengee aur aurten unhen tod tod kar jalaaengee. kyoonki yah qaum samajh say khaalee hai, lihaaza us ka khaaliq us par taras naheen khaaega, jis nay usay tashkeel diya vah us par meharbaanee naheen karega.

¹²us din tum israaeelee ghalla jaisay hogay, aur rabb tumhaaree baaliyon ko darya-ay-furaat say lay kar misr kee shimaalee sarhadd par vaaqay vaadee-ay-misr tak kaatega. phir vah tumhen gaah kar daana-ba-daana tamaam ghalla ikattha karega. ¹³us din narsinga buland aavaaz say bajega. tab asoor men tabaah honay vaalay aur misr men bhagaaay huay log vaapas a kar yarooshalam kay muqaddas pahaad par rabb ko sijda karengay.