Yashaayaah 26

hamaara khuda mazboot chataan hai

¹us din mulk-ay-yahoodaah men geet gaaya jaaega,

“hamaara shaher mazboot hai, kyoonki ham allaah kee najaat denay vaalee chaardeevaaree aur pushton say ghiray huay hain.

²shaher kay darvaazon ko kholo taaki raast qaum daakhil ho, vah qaum jo vafaadaar rahee hai.

³ai rabb, jis ka iraada mazboot hai usay too mahfooz rakhta hai. usay pooree salaamatee haasil hai, kyoonki vah tujh par bharosa rakhta hai.

⁴rabb par abad tak etimaad rakho! kyoonki rabb khuda abdee chataan hai.

⁵vah bulandiyon par rahenay vaalon ko zer aur oonchay shaher ko neecha karkay khaak men mila deta hai.

⁶zarooratmand aur pastahaal usay paaon talay kuchal detay hain.”

duaa

⁷ai allaah, raastbaaz kee raah hamvaar hai, kyoonki too us ka raasta chalnay kay qaabil bana deta hai.

⁸ai rabb, ham teray intizaar men rahetay hain, us vaqt bhee jab too hamaaree adaalat karta hai. ham teray naam aur teree tamjeed kay aarzoomand rahetay hain.

⁹raat kay vaqt meree rooh teray liyay tadaptee, mera dil tera taalib raheta hai. kyoonki duniya kay baashinday us vaqt insaaf ka matlab seekhtay hain jab too duniya kee adaalat karta hai.

¹⁰afsos, jab bedeen par rahem kiya jaata hai to vah insaaf ka matlab naheen seekhta balki insaaf kay mulk men bhee ghalat kaam karnay say baaz naheen raheta, vahaan bhee rabb kee azmat ka lihaaz naheen karta.

¹¹ai rabb, go tera haath unhen maarnay kay liyay utha hua hai to bhee vah dhyaan naheen detay. lekin ek din un kee aankhen khul jaaengee, aur vah teree apnee qaum kay liyay ghairat ko dekh kar sharminda ho jaaengay. tab too apnee bhasm karnay vaalee aag un par naazil karega.

¹²ai rabb, too hamen amn-o-amaan muhayya karta hai balki hamaaree tamaam kaamyaabiyaan teray hee haath say haasil huee hain.

¹³ai rabb hamaaray khuda, go teray siva deegar maalik ham par hukoomat kartay aaay hain to bhee ham teray hee fazl say teray naam ko yaad kar paaay. ¹⁴ab yah log mar gaay hain aur aainda kabhee zinda naheen hongay, un kee roohen kooch kar gaee hain aur aainda kabhee vaapas naheen aaengee . kyoonki too nay unhen saza day kar halaak kar diya, un ka naam-o-nishaan mita daala hai.

¹⁵ai rabb, too nay apnee qaum ko farogh diya hai. too nay apnee qaum ko bada bana kar apnay jalaal ka izhaar kiya hai. teray haath say us kee sarhadden chaaron taraf badh gaee hain.

¹⁶ai rabb, vah museebat men phans kar tujhay talaash karnay lagay, teree taadeeb kay baais mantr phoonknay lagay.

¹⁷ai rabb, teray huzoor ham dard-ay-zah men mubtala aurat kee tarah tadaptay aur cheekhtay chillaatay rahay. ¹⁸jannay ka dard mahsoos karkay ham pech-o-taab kha rahay thay. lekin afsos, hava hee paida huee. na ham nay mulk ko najaat dee, na duniya kay naay baashinday paida huay.

¹⁹lekin teray murday dubaara zinda hongay, un kee laashen ek din jee uthengee. ai khaak men basnay vaalo, jaag utho aur khushee kay naaray lagaao! kyoonki teree os nooron kee shabnam hai, aur zameen murda roohon ko janm degee.

rabb israaeel kay dushmanon say badla legaa

²⁰ai meree qaum, ja aur thodee der kay liyay apnay kamron men chhup kar kundee laga lay. jab tak rabb ka ghazab thanda na ho vahaan thaheree rah. ²¹kyoonki dekh, rabb apnee sukoonatgaah say nikalnay ko hai taaki duniya kay baashindon ko saza day. tab zameen apnay aap par bahaaya hua khoon faash karegee aur apnay maqtoolon ko mazeed chhupaaay naheen rakhegee.