Yashaayaah 25

najaat kay liyay allaah kee taareef

¹ai rabb, too mera khuda hai, main teree taazeem aur teray naam kee taareef karoonga. kyoonki too nay badee vafaadaaree say anokha kaam karkay qadeem zamaanay men bandhay huay mansoobon ko poora kiya hai.

²too nay shaher ko malbay ka dher bana kar hamlon say mahfooz aabaadee ko khandaraat men tabdeel kar diya. ghairmulkiyon ka qil’aaband mahel yoon khaak men milaaya gaya ki aainda kabhee shaher naheen kahelaaega, kabhee az sar-ay-nau taameer naheen hoga.

³yah dekh kar ek zoraavar qaum teree taazeem karegee, zabardast aqvaam kay shaher tera khauf maanengay. ⁴kyoonki too pastahaalon kay liyay qil’a aur museebatzada ghareebon kay liyay panaahgaah saabit hua hai. teree aad men insaan toofaan aur garmee kee shiddat say mahfooz raheta hai. go zabaradaston kee phoonken baarish kee bauchhaad ⁵ya registaan men tapish jaisee kyoon na hon, taaham too ghairmulkiyon kee garaj ko rok deta hai. jis tarah baadal kay saay say jhulastee garmee jaatee rahetee hai, usee tarah zabaradaston kee shekhee ko too band kar deta hai.

yarooshalam men bain-ul-aqvaamee ziyaafat

⁶yaheen koh-ay-siyyoon par rabb-ul-afwaaj tamaam aqvaam kee zabardast ziyaafat karega. behtareen qism kee qadeem aur saaf-shaffaaf mai pee jaaegee, umda aur lazeeztareen khaana khaaya jaaega.

⁷isee pahaad par vah tamaam ummaton par ka niqaab utaarega aur tamaam aqvaam par ka parda hata dega. ⁸maut ilaahee fatah ka luqma ho kar abad tak nest-o-naabood rahegee. tab rabb qaadir-ay-mutlaq har chiharay kay aansoo ponchh kar tamaam duniya men say apnee qaum kee rusvaaee door karega. rabb hee nay yah sab kuchh farmaaya hai. ⁹us din log kahengay, “yahee hamaara khuda hai jis kee najaat kay intizaar men ham rahay. yahee hai rabb jis say ham ummeed rakhtay rahay. aao, ham shaadiyaana baja kar us kee najaat kee khushee manaaen.”

rabb moaab kay qilaon ko dha degaa

¹⁰rabb ka haath is pahaad par thahera rahega. lekin moaab ko vah yoon raundega jis tarah bhoosa gobar men milaanay kay liyay raunda jaata hai. ¹¹aur go moaab haath phaila kar us men tairnay kee koshish karay to bhee rabb us ka gharoor gobar men dabaaay rakhega, chaahay vah kitnee mahaarat say haath-paaon maarnay kee koshish kyoon na karay. ¹²ai moaab, vah teree buland aur qil’aaband deevaaron ko giraaega, unhen dha kar khaak men milaaega.