Yashaayaah 24
rabb tamaam duniya kee adaalat karta hai
1dekho, rabb duniya ko veeraan-o-sunsaan kar dega, roo-ay-zameen ko ulat-palat karkay us kay baashindon ko muntashir kar dega. 2kisee ko bhee chhoda naheen jaaega, khwaah imaam ho ya aam shakhs, maalik ya naukar, maalikan ya naukraanee, bechanay vaala ya khareedaar, udhaar lenay ya denay vaala, qarzdaar ya qarzakhwaah. 3zameen mukammal taur par ujad jaaegee, usay saraasar loota jaaega. rabb hee nay yah sab kuchh farmaaya hai. 4zameen sookh sookh kar sukad jaaegee, duniya khushk ho kar murjha jaaegee. us kay baday baday log bhee nidhaal ho jaaengay. 5zameen kay apnay baashindon nay us kee behuramtee kee hai, kyoonki vah shareeat kay taabay na rahay balki us kay ahkaam ko tabdeel karkay allaah kay saath ka abdee ahd tod diya hai.
6isee liyay zameen laanat ka luqma ban gaee hai, us par basnay vaalay apnee saza bhugat rahay hain. isee liyay duniya kay baashinday bhasm ho rahay hain aur kam hee baaqee rah gaay hain. 7angoor ka taaza ras sookh kar khatm ho raha, angoor kee belen murjha rahee hain. jo pahelay khushbaash thay vah aahen bharnay lagay hain. 8dafon kee khushkun aavaazen band, rangraliyaan manaanay vaalon ka shor band, sarodon kay sureelay naghmay band ho gaay hain. 9ab log geet ga ga kar mai naheen peetay balki sharaab unhen kadvee hee lagtee hai. 10veeraan-o-sunsaan shaher tabaah ho gaya hai, har ghar kay darvaazay par kundee lagee hai taaki andar ghusnay vaalon say mahfooz rahay. 11galiyon men log girya-o-zaaree kar rahay hain ki mai khatm hai. har khushee door ho gaee hai, har shaadmaanee zameen say ghaaib hai. 12shaher men malbay kay dher hee rah gaay hain, us kay darvaazay tukday tukday ho gaay hain.
13kyoonki mulk kay darmiyaan aur aqvaam kay beech men yahee soorat-ay-haal hogee ki chand ek hee bach paaengay, bilkul un do chaar zaitoonon kee maanind jo darakht ko jhaadnay kay baavujood us par rah jaatay hain, ya un do chaar angooron kee tarah jo fasal chunnay kay baavujood belon par lagay rahetay hain. 14lekin yah chand ek hee pukaar kar khushee kay naaray lagaaengay. maghrib say vah rabb kee azmat kee sitaaish karengay. 15chunaanchay mashriq men rabb ko jalaal do, jazeeron men israaeel kay khuda kay naam kee taazeem karo. 16hamen duniya kee intiha say geet sunaaee day rahay hain, “raast khuda kee taareef ho!”
lekin main bol utha, “haay, main ghul ghul kar mar raha hoon, main ghul ghul kar mar raha hoon! mujh par afsos, kyoonki bevafa apnee bevafaaee dikha rahay hain, bevafa khulay taur par apnee bevafaaee dikha rahay hain!” 17ai duniya kay baashindo, tum dahshatanaak museebat, gadhon aur phandon men phans jaaogay. 18tab jo haulnaak aavaazon say bhaag kar bach jaaay vah gadhay men gir jaaega, aur jo gadhay say nikal jaaay vah phanday men phans jaaega. kyoonki aasmaan kay dareechay khul rahay aur zameen kee bunyaaden hil rahee hain. 19zameen kadak say fut rahee hai. vah dagamga rahee, jhoom rahee, 20nashay men aaay sharaabee kee tarah ladakhda rahee aur kachchee jhompdee kee tarah jhool rahee hai. aakhirkaar vah apnee bevafaaee kay bojh talay itnay dhadaam say giregee ki aainda kabhee naheen uthnay kee.
21us din rabb aasmaan kay lashkar aur zameen kay baadshaahon say javaab talab karega. 22tab vah giriftaar ho kar gadhay men jama hongay, unhen qaidkhaanay men daal kar mut’addid dinon kay baad saza milegee. 23us vaqt chaand naadim hoga aur sooraj sharm khaaega, kyoonki rabb-ul-afwaaj koh-ay-siyyoon par takhtnasheen hoga. vahaan yarooshalam men vah badee shaan-o-shaukat kay saath apnay buzurgon kay saamnay hukoomat karega.