Yashaayaah 22
yarooshalam ka anjaam
1roya kee vaadee yarooshalam kay baaray men rabb ka farmaan :
kya hua hai? sab chhaton par kyoon chadh gaay hain? 2har taraf shor-sharaaba mach raha hai, poora shaher baghlen baja raha hai. yah kaisee baat hai? teray maqtool na talvaar say, na maidaan-ay-jang men maray. 3kyoonki teray tamaam leedar mil kar faraar huay aur phir teer chalaaay baghair pakday gaay. baaqee jitnay log tujh men thay vah bhee door door bhaagna chaahatay thay, lekin unhen bhee qaid kiya gaya.
4is liyay main nay kaha, “apna munh mujh say pher kar mujhay zaar zaar ronay do. mujhay tasallee denay par bazid na raho jabki meree qaum tabaah ho rahee hai.” 5kyoonki qaadir-ay-mutlaq rabb-ul-afwaaj roya kee vaadee par haulnaak din laaya hai. har taraf ghabaraahat, kuchlay huay log aur abtaree nazar aatee hai. shaher kee chaardeevaaree tootnay lagee hai, pahaadon men cheekhen goonj rahee hain.
6ailaam kay faujee apnay tarkash utha kar rathon, aadmiyon aur ghodon kay saath a gaay hain. qeer kay mard bhee apnee dhaalen ghilaaf say nikaal kar tujh say ladnay kay liyay nikal aaay hain. 7yarooshalam kay gird-o-navaah kee behtareen vaadiyaan dushman kay rathon say bhar gaee hain, aur us kay ghudsavaar shaher kay darvaazay par hamla karnay kay liyay us kay saamnay khaday ho gaay hain. 8jo bhee band-o-bast yahoodaah nay apnay taheffuz kay liyay kar liya tha vah khatm ho gaya hai.
us din tum logon nay kya kiya? tum ‘jangalaghar’ naamee silaahkhaanay men ja kar asaliha ka muaaina karnay lagay. 9-11 tum nay un mut’addid daraadon ka jaaiza liya jo daaood kay shaher kee faseel men pad gaee theen. usay mazboot karnay kay liyay tum nay yarooshalam kay makaanon ko gin kar un men say kuchh gira diay. saath saath tum nay nichlay taalaab ka paanee jama kiya. oopar kay puraanay taalaab say nikalnay vaala paanee jama karnay kay liyay tum nay androonee aur bairoonee faseel kay darmiyaan ek aur taalaab bana liya. lekin afsos, tum us kee parva naheen kartay jo yah saara silsila amal men laaya. us par tum tavajjuh hee naheen detay jis nay badee der pahelay isay tashkeel diya tha.
12us vaqt qaadir-ay-mutlaq rabb-ul-afwaaj nay hukm diya ki girya-o-zaaree karo, apnay baalon ko mundva kar taat ka libaas pahen lo. 13lekin kya hua? tamaam log shaadiyaana baja kar khushee mana rahay hain. har taraf bailon aur bhed-bakriyon ko zabah kiya ja raha hai. sab gosht aur mai say lutf’andoz ho kar kah rahay hain, “aao, ham khaaen pien, kyoonki kal to mar hee jaana hai.”
14lekin rabb-ul-afwaaj nay meree maujoodgee men hee zaahir kiya hai ki yaqeenan yah qusoor tumhaaray martay dam tak muaaf naheen kiya jaaegaa [a] lafzee tarjuma : yaqeenan is qusoor ka kaffaara tumhaaray martay dam tak naheen diya jaaega. . yah qaadir-ay-mutlaq rabb-ul-afwaaj ka farmaan hai.
rabb shabnaah kee jagah iliyaaqeem ko mahel ka nigraan muqarrar karegaa
15qaadir-ay-mutlaq rabb-ul-afwaaj farmaata hai, “us nigraan shabnaah kay paas chal jo mahel ka inchaarj hai. usay paighaam pahuncha day, 16too yahaan kya kar raha hai? kis nay tujhay yahaan apnay liyay maqbra taraashnay kee ijaazat dee? too kaun hai ki bulandee par apnay liyay mazaar banvaaay, chataan men aaraamgaah khudvaaay? 17ai mard, khabardaar! rabb tujhay zor say door door tak phainknay vaala hai. vah tujhay pakad legaa 18aur marod marod kar gend kee tarah ek vasee mulk men phaink dega. vaheen too marega, vaheen teray shaandaar rath paday rahengay. kyoonki too apnay maalik kay gharaanay kay liyay sharm ka baais bana hai. 19main tujhay barataraf karoonga, aur too zabardastee apnay uhday aur mansab say faarigh kar diya jaaega.
20us din main apnay khaadim iliyaaqeem bin khilaqiyaah ko bulaaoonga. 21main usay tera hee sarkaaree libaas aur kamarband pahena kar tera ikhtiyaar usay day doonga. us vaqt vah yahoodaah kay gharaanay aur yarooshalam kay tamaam baashindon ka baap banega. 22main us kay kandhay par daaood kay gharaanay kee chaabee rakh doonga. jo darvaaza vah kholega usay koee band naheen kar sakega, aur jo darvaaza vah band karega usay koee khol naheen sakega. 23vah khoontee kee maanind hoga jis ko main zor say thonk kar mazboot deevaar men laga doonga. us say us kay baap kay gharaanay ko sharaafat ka ooncha maqaam haasil hoga.
24lekin phir aabaaee gharaanay ka poora vazan us kay saath latak jaaega. tamaam aulaad aur rishtedaar, tamaam chhotay bartan piyaalon say lay kar martabaanon tak us kay saath latak jaaengay. 25rabb-ul-afwaaj farmaata hai ki us vaqt mazboot deevaar men lagee yah khoontee nikal jaaegee. usay toda jaaega to vah gir jaaegee, aur us kay saath latka saara saamaan toot jaaega.” yah rabb ka farmaan hai.