Yashaayaah 20

yasaayaah kee barahenagee aur misr aur ethopiya ka anjaam

¹ek din asooree baadshaah sarjoon nay apnay kamaandar ko ashdood say ladnay bheja. jab asooriyon nay us filistee shaher par hamla kiya to vah un kay qabzay men a gaya.

²teen saal pahelay rabb yasaayaah bin aamoos say hamkalaam hua tha, “ja, taat ka jo libaas too pahenay raha hai utaar. apnay jooton ko bhee utaar.” nabee nay aisa hee kiya aur isee haalat men phirta raha tha. ³jab ashdood asooriyon kay qabzay men a gaya to rabb nay farmaaya, “meray khaadim yasaayaah ko barahena aur nangay paaon phirtay teen saal ho gaay hain. is say us nay alaamtee taur par is kee nishaandihee kee hai ki misr aur ethopiya ka kya anjaam hoga. ⁴shaah-ay-asoor misree qaidiyon aur ethopiya kay jilaavatanon ko isee haalat men apnay aagay aagay haankega. naujavaan aur buzurg sab barahena aur nangay paaon phirengay, vah kamar say lay kar paaon tak barahena hongay. misr kitna sharminda hoga.

⁵yah dekh kar filistee dahshat khaaengay. unhen sharm aaegee, kyoonki vah ethopiya say ummeed rakhtay aur apnay misree ittihaadee par fakhar kartay thay. ⁶us vaqt is saahilee ilaaqay kay baashinday kahengay, ‘dekho un logon kee haalat jin say ham ummeed rakhtay thay. un hee kay paas ham bhaag kar aaay taaki madad aur asooree baadshaah say chhutkaara mil jaaay. agar un kay saath aisa hua to ham kis tarah bachengay’?”