Yashaayaah 2

yarooshalam abdee amn-o-amaan ka markaz hogaa

¹yasaayaah bin aamoos nay yahoodaah aur yarooshalam kay baaray men zail kee roya dekhee,

²aakhiree ayyaam men rabb kay ghar ka pahaad mazbootee say qaaim hoga. sab say bada yah pahaad deegar tamaam bulandiyon say kaheen ziyaada sarfaraaz hoga. tab tamaam qaumen jauq-dar-jauq us kay paas pahunchengee, ³aur beshumaar ummaten a kar kahengee, “aao, ham rabb kay pahaad par chadh kar yaaqoob kay khuda kay ghar kay paas jaaen taaki vah hamen apnee marzee kee taaleem day aur ham us kee raahon par chalen.”

kyoonki siyyoon pahaad say rabb kee hidaayat niklegee, aur yarooshalam say us ka kalaam saadir hoga. ⁴rabb bain-ul-aqvaamee jhagdon ko nipataaega aur beshumaar qaumon ka insaaf karega. tab vah apnee talvaaron ko koot kar phaalay banaaengee aur apnay nezon ko kaant-chhaant kay auzaar men tabdeel karengee. ab say na ek qaum doosree par hamla karegee, na log jang karnay kee tarbiyat haasil karengay.

⁵ai yaaqoob kay gharaanay, aao ham rabb kay noor men chalen!

allaah kee haibtanaak adaalat

⁶ai allaah, too nay apnee qaum, yaaqoob kay gharaanay ko tark kar diya hai. aur kya ajab! kyoonki vah mashriqee jaadoogree say bhar gaay hain. filistiyon kee tarah hamaaray log bhee qismat ka haal poochhtay hain, vah pardesiyon kay saath baghalgeer rahetay hain. ⁷israaeel sonay-chaandee say bhar gaya hai, us kay khazaanon kee hadd hee naheen rahee. har taraf ghoday hee ghoday nazar aatay hain, aur un kay rath ginay naheen ja saktay. ⁸lekin saath saath un ka mulk buton say bhee bhar gaya hai. jo cheezen un kay haathon nay banaaeen un kay saamnay vah jhuk jaatay hain, jo kuchh un kee ungaliyon nay tashkeel diya usay vah sijda kartay hain. ⁹chunaanchay ab unhen khud jhukaaya jaaega, unhen past kiya jaaega. ai rabb, unhen muaaf na kar!

¹⁰chataanon men ghus jaao! khaak men chhup jaao! kyoonki rabb ka dahshat’angez aur shaandaar jalaal aanay ko hai. ¹¹tab insaan kee maghroor aankhon ko neecha kiya jaaega, mardon ka takabbur khaak men milaaya jaaega. us din sirf rabb hee sarfaraaz hoga. ¹²kyoonki rabb-ul-afwaaj nay ek khaas din thaheraaya hai jis men sab kuchh jo maghroor, buland ya sarfaraaz ho zer kiya jaaega. ¹³lubnaan men deodaar kay tamaam buland-o-baala darakht, basan kay kul baloot, ¹⁴tamaam aalee pahaad aur oonchee pahaadiyaan, ¹⁵har azeem burj aur qil’aaband deevaar, ¹⁶samundar ka har azeem tijaartee aur shaandaar jahaaz zer ho jaaega. ¹⁷chunaanchay insaan ka gharoor khaak men milaaya jaaega aur mardon ka takabbur neecha kar diya jaaega. us din sirf rabb hee sarfaraaz hoga, ¹⁸aur but sab kay sab fana ho jaaengay.

¹⁹jab rabb zameen ko dahshatzada karnay kay liyay uth khada hoga to log mittee kay gadhon men khisak jaaengay. rabb kee maheeb aur shaandaar tajallee ko dekh kar vah chataanon kay ghaaron men chhup jaaengay. ²⁰us din insaan sonay-chaandee kay un buton ko phaink dega jinhen us nay sijda karnay kay liyay bana liya tha. unhen choohon aur chamagaadadon kay aagay phaink kar ²¹vah chataanon kay shigaafon aur daraadon men ghus jaaengay taaki rabb kee maheeb aur shaandaar tajallee say bach jaaen jab vah zameen ko dahshatzada karnay kay liyay uth khada hoga. ²²chunaanchay insaan par etimaad karnay say baaz aao jis kee zindagee dam bhar kee hai. us kee qadar hee kya hai