Yashaayaah 19
misr kee adaalat
1misr kay baaray men allaah ka farmaan :
rabb tezrau baadal par savaar ho kar misr a raha hai. us kay saamnay misr kay but tharathra rahay hain aur misr kee himmat toot gaee hai. 2“main misriyon ko ek doosray kay saath ladnay par uksa doonga. bhaaee bhaaee kay saath, padosee padosee kay saath, shaher shaher kay saath, aur baadshaahee baadshaahee kay saath jang karegee. 3misr kee rooh muztarib ho jaaegee, aur main un kay mansoobon ko darham-barham kar doonga. go vah buton, murdon kee roohon, un say raabita karnay vaalon aur qismat ka haal bataanay vaalon say mashvra karengay, 4lekin main unhen ek zaalim maalik kay havaalay kar doonga, aur ek sakht baadshaah un par hukoomat karega.” yah hai qaadir-ay-mutlaq rabb-ul-afwaaj ka farmaan.
5darya-ay-neel ka paanee khatm ho jaaega, vah bilkul sookh jaaega. 6misr kee naheron say badboo phailegee balki misr kay naalay ghattay ghattay khushk ho jaaengay. narsal aur sarkanday murjha jaaengay. 7darya-ay-neel kay dahaanay tak jitnee bhee hariyaalee aur faslen kinaaray par ugtee hain vah sab pajhmurda ho jaaengee aur hava men bikhar kar ghaaib ho jaaengee. 8machheray aah-o-zaaree karengay, darya men kaanta aur jaal daalnay vaalay ghattay jaaengay. 9san kay reshon say dhaaga banaanay vaalon ko sharm aaegee, aur joolaahon ka rang faq pad jaaega. 10kapda banaanay vaalay sakht maayoos hongay, tamaam mazdoor dil-bardaashta hongay.
11zuan kay afsar naasamajh hee hain, firaaun kay daana musheer usay ahemaq mashvray day rahay hain. tum misree baadshaah kay saamnay kis tarah daava kar saktay ho, “main daanishmandon kay halqay men shaamil aur qadeem baadshaahon ka vaaris hoon”? 12ai firaaun, ab teray daanishmand kahaan hain? vah maaloom karkay tujhay bataaen ki rabb-ul-afwaaj misr kay saath kya kuchh karnay ka iraada rakhta hai. 13zuan kay afsar ahemaq ban baithay hain, memfis kay buzurgon nay dhoka khaaya hai. us kay qabaailee sardaaron kay fareb say misr dagmagaanay laga hai. 14kyoonki rabb nay un men abtaree kee rooh daal dee hai. jis tarah nashay men dhut sharaabee apnee qai men ladkhadaata raheta hai usee tarah misr un kay mashvaron say daanvaandol ho gaya hai, khwaah vah kya kuchh kyoon na karay. 15us kee koee baat naheen bantee, khwaah sar ho ya dum, kompal ho ya tana.
16misree us din aurton jaisay kamzor hongay. jab rabb-ul-afwaaj unhen maarnay kay liyay apna haath uthaaega to vah ghabra kar kaamp uthengay. 17mulk-ay-yahoodaah misriyon kay liyay sharm ka baais banega. jab bhee us ka zikr hoga to vah dahshat khaaengay, kyoonki unhen vah mansooba yaad aaega jo rabb nay un kay khilaaf baandha hai.
misr, asoor aur israaeel mil kar ibaadat karenge
18us din misr kay paanch shaher kan’aan kee zabaan apna kar rabb-ul-afwaaj kay naam par qasam khaaengay. un men say ek ‘tabaahee ka shaher’ kahelaaegaa [a] ghaaliban is say muraad sooraj ka shaher yaanee Heliopolis hai. .
19us din mulk-ay-misr kay beech men rabb kay liyay qurbaangaah makhsoos kee jaaegee, aur us kee sarhadd par rabb kee yaad men satoon khada kiya jaaega. 20yah donon rabb-ul-afwaaj kee huzooree kee nishaandihee karengay aur gavaahee dengay ki vah maujood hai. chunaanchay jab un par zulm kiya jaaega to vah chilla kar us say faryaad karengay, aur rabb un kay paas najaatadihanda bhej dega jo un kee khaatir lad kar unhen bachaaega. 21yoon rabb apnay aap ko misriyon par zaahir karega. us din vah rabb ko jaan lengay, aur zabah aur ghalla kee qurbaaniyaan chadha kar us kee parastish karengay. vah rabb kay liyay mannaten maan kar un ko poora karengay. 22rabb misr ko maarega bhee aur usay shifa bhee dega. misree rabb kee taraf rujoo karengay to vah un kee iltijaaon kay javaab men unhen shifa dega.
23us din ek pakkee sadak misr ko asoor kay saath munsalik kar degee. asooree aur misree aazaadee say ek doosray kay mulk men aaengay, aur donon mil kar allaah kee ibaadat karengay. 24us din israaeel bhee misr aur asoor kay ittihaad men shareek ho kar tamaam duniya kay liyay barkat ka baais hoga. 25kyoonki rabb-ul-afwaaj unhen barkat day kar faramaaega, “meree qaum misr par barkat ho, meray haathon say banay mulk asoor par meree barkat ho, meree meeraas israaeel par barkat ho.”