Yashaayaah 17

shaam aur israaeel kee tabaahee

¹damishq shaher kay baaray men allaah ka farmaan :

“damishq mit jaaega, malbay ka dher hee rah jaaega. ²aroeer kay shaher bhee veeraan-o-sunsaan ho jaaengay. tab revad hee un kee galiyon men charengay aur aaraam karengay. koee naheen hoga jo unhen bhagaaay. ³israaeel kay qil’aaband shaher nest-o-naabood ho jaaengay, aur damishq kee saltanat jaatee rahegee. shaam kay jo log bach nikalengay un ka aur israaeel kee shaan-o-shaukat ka ek hee anjaam hoga.” yah hai rabb-ul-afwaaj ka farmaan.

⁴us din yaaqoob kee shaan-o-shaukat kam aur us ka mota-taaza jism laaghar hota jaaega. ⁵fasal kee kataaee kee see haalat hogee. jis tarah kaatnay vaala ek haath say gandum kay danthal ko pakad kar doosray say baalon ko kaatta hai usee tarah israaeeliyon ko kaata jaaega. aur jis tarah vaadee-ay-rafaaeem men ghareeb log fasal kaatnay vaalon kay peechhay peechhay chal kar bachee huee baaliyon ko chuntay hain usee tarah israaeel kay bachay huon ko chuna jaaega. ⁶taaham kuchh na kuchh bacha rahega, un do chaar zaitoonon kee tarah jo chuntay vaqt darakht kee chotee par rah jaatay hain. darakht ko danday say jhaadnay kay baavujood kaheen na kaheen chand ek lagay rahengay.” yah hai rabb, israaeel kay khuda ka farmaan.

⁷tab insaan apnee nazar apnay khaaliq kee taraf uthaaega, aur us kee aankhen israaeel kay quddoos kee taraf dekhengee. ⁸aainda na vah apnay haathon say banee huee qurbaanagaahon ko takega, na apnee ungaliyon say banay huay yaseerat devee kay khambon aur bakhoor kee qurbaanagaahon par dhyaan dega.

⁹us vaqt israaeelee apnay qil’aaband shaheron ko yoon chhodengay jis tarah kan’aaniyon nay apnay jangalon aur pahaadon kee chotiyon ko israaeeliyon kay aagay aagay chhoda tha. sab kuchh veeraan-o-sunsaan hoga. ¹⁰afsos, too apnee najaat kay khuda ko bhool gaya hai. tujhay vah chataan yaad na rahee jis par too panaah lay sakta hai. chunaanchay apnay piyaaray devtaaon kay baagh lagaata ja, aur un men pardesee angoor kee qalmen lagaata ja. ¹¹shaayad hee vah lagaatay vaqt tezee say ugnay lagen, shaayad hee un kay phool usee subah khilnay lagen. to bhee teree mehanat abas hai. too kabhee bhee un kay phal say lutf’andoz naheen hoga balki mahez beemaaree aur laailaaj dard kee fasal kaatega.

deegar qaumon kay bekaar hamle

¹²beshumaar qaumon ka shor-sharaaba suno jo toofaanee samundar kee see thaathen maar rahee hain. ummaton ka ghul-ghapaada suno jo thapeday maarnay vaalee maujon kee tarah garaj rahee hain. ¹³kyoonki ghairqaumen pahaadanuma laheron kee tarah mutlaatim hain. lekin rabb unhen daantega to vah door door bhaag jaaengee. jis tarah pahaadon par bhoosa hava kay jhonkon say ud jaata aur ludhakbootee aandhee men chakkar khaanay lagtee hai usee tarah vah faraar ho jaaengee. ¹⁴shaam ko israaeel sakht ghabra jaaega, lekin pau phatnay say pahelay pahelay us kay dushman mar gaay hongay. yahee hamen lootnay vaalon ka naseeb, hamaaree ghaaratagaree karnay vaalon ka anjaam hoga.