Yashaayaah 15

moaab kay anjaam ka elaan

¹moaab kay baaray men rabb ka farmaan :

ek hee raat men moaab ka shaher aar tabaah ho gaya hai. ek hee raat men moaab ka shaher qeer barbaad ho gaya hai. ²ab deebon kay baashinday maatam karnay kay liyay apnay mandir aur pahaadee qurbaanagaahon kee taraf chadh rahay hain. moaab apnay shaheron naboo aur meedba par vaavaila kar raha hai. har sar munda hua aur har daadhee kat gaee hai. ³galiyon men vah taat say mulabbas phir rahay hain, chhaton par aur chaukon men sab ro ro kar aah-o-buka kar rahay hain. ⁴hasbon aur ileeaalee madad kay liyay pukaar rahay hain, aur un kee aavaazen yahez tak sunaaee day rahee hain. is liyay moaab kay musallah mard jang kay naaray laga rahay hain, go vah andar hee andar kaamp rahay hain.

⁵mera dil moaab ko dekh kar ro raha hai. us kay muhaajireen bhaag kar zughar aur ijlat-shaleeshiyaah tak pahunch rahay hain. log ro ro kar looheet kee taraf chadh rahay hain, vah horonaaim tak jaanay vaalay raastay par chaltay huay apnee tabaahee par girya-o-zaaree kar rahay hain. ⁶nimreem ka paanee sookh gaya hai, ghaas jhulas gaee hai, tamaam hariyaalee khatm ho gaee hai, sabzaazaaron ka naam-o-nishaan tak naheen raha. ⁷is liyay log apna saara jamaashuda saamaan samet kar vaadee-ay-safeda ko uboor kar rahay hain. ⁸cheekhen moaab kee hudood tak goonj rahee hain, haay haay kee aavaazen ijlaaim aur bair-eleem tak sunaaee day rahee hain. ⁹lekin go deemon kee naher khoon say surkh ho gaee hai, taaham main us par mazeed museebat laaoonga. main sherbabar bhejoonga jo un par bhee dhaava bolengay jo moaab say bach niklay hongay aur un par bhee jo mulk men peechhay rah gaay hongay.