Yashaayaah 14
israaeelee vaapas aaenge
1kyoonki rabb yaaqoob par taras khaaega, vah dubaara israaeeliyon ko chun kar unhen un kay apnay mulk men basa dega. pardesee bhee un kay saath mil jaaengay, vah yaaqoob kay gharaanay say munsalik ho jaaengay. 2deegar qaumen israaeeliyon ko lay kar un kay vatan men vaapas pahuncha dengee. tab israaeel ka gharaana in pardesiyon ko virsay men paaega, aur yah rabb kay mulk men un kay naukar-naukraaniyaan ban kar un kee khidmat karengay. jinhon nay unhen jilaavatan kiya tha un hee ko vah jilaavatan kiay rakhengay, jinhon nay un par zulm kiya tha un hee par vah hukoomat karengay. 3jis din rabb tujhay museebat, bechainee aur zaalimaana ghulaamee say aaraam degaa 4us din too baabal kay baadshaah par tanz ka geet gaaega,
baabal par tanz ka geet
“yah kaisee baat hai? zaalim nest-o-naabood aur us kay hamlay khatm ho gaay hain. 5rabb nay bedeenon kee laathee tod kar hukmaraanon ka vah shaahee asa tukday tukday kar diya hai 6jo taish men a kar qaumon ko musalsal maarta raha aur ghussay say un par hukoomat karta, berahemee say un kay peechhay pada raha. 7ab pooree duniya ko aaraam-o-sukoon haasil hua hai, ab har taraf khushee kay naaray sunaaee day rahay hain. 8jooneepar kay darakht aur lubnaan kay deodaar bhee teray anjaam par khush ho kar kahetay hain, ‘shukr hai! jab say too gira diya gaya koee yahaan chadh kar hamen kaatnay naheen aata.’
9paataal teray utarnay kay baais hil gaya hai. teray intizaar men vah murda roohon ko harkat men la raha hai. vahaan duniya kay tamaam raees aur aqvaam kay tamaam baadshaah apnay takhton say khaday ho kar tera istiqbaal karengay. 10sab mil kar tujh say kahengay, ‘ab too bhee ham jaisa kamzor ho gaya hai, too bhee hamaaray baraabar ho gaya hai!’ 11teree tamaam shaan-o-shaukat paataal men utar gaee hai, teray sitaar khaamosh ho gaay hain. ab keeday tera gadda aur kechvay tera kambal hongay.
12ai sitaara-ay-subah, ai ibn-ay-saher, too aasmaan say kis tarah gir gaya hai! jis nay deegar mamaalik ko shikast dee thee vah ab khud paash paash ho gaya hai. 13dil men too nay kaha, ‘main aasmaan par chadh kar apna takht allaah kay sitaaron kay oopar laga loonga, main intihaaee shimaal men us pahaad par jahaan devta jama hotay hain takhtnasheen hoonga. 14main baadlon kee bulandiyon par chadh kar qaadir-ay-mutlaq kay bilkul baraabar ho jaaoonga.’ 15lekin tujhay to paataal men utaara jaaega, us kay sab say gaheray gadhay men giraaya jaaega.
16jo bhee tujh par nazar daalega vah ghaur say dekh kar poochhega, ‘kya yahee vah aadmee hai jis nay zameen ko hila diya, jis kay saamnay deegar mamaalik kaamp uthay? 17kya isee nay duniya ko veeraan kar diya aur us kay shaheron ko dha kar qaidiyon ko ghar vaapas jaanay kee ijaazat na dee?’
18deegar mamaalik kay tamaam baadshaah badee izzat kay saath apnay apnay maqbaron men paday huay hain. 19lekin tujhay apnee qabr say door kisee bekaar kompal kee tarah phaink diya jaaega. tujhay maqtoolon say dhaanka jaaega, un say jin ko talvaar say chheda gaya hai, jo pathreelay gadhon men utar gaay hain. too paaon talay raundee huee laash jaisa hoga, 20aur tadfeen kay vaqt too deegar baadshaahon say ja naheen milega. kyoonki too nay apnay mulk ko tabaah aur apnee qaum ko halaak kar diya hai. chunaanchay ab say abad tak in bedeenon kee aulaad ka zikr tak naheen kiya jaaega. 21is aadmee kay beton ko phaansee denay kee jagah tayyaar karo! kyoonki un kay baapdaada ka qusoor itna sangeen hai ki unhen marna hee hai. aisa na ho ki vah dubaara uth kar duniya par qabza kar len, ki roo-ay-zameen un kay shaheron say bhar jaaay.”
rabb kay haathon baabal ka anjaam
22rabb-ul-afwaaj farmaata hai, “main un kay khilaaf yoon uthoonga ki baabal ka naam-o-nishaan tak naheen rahega. main us kee aulaad ko roo-ay-zameen par say mita doonga, aur ek bhee naheen bachnay ka. 23baabal khaarapusht ka maskan aur daldal ka ilaaqa ban jaaega, kyoonki main khud us men tabaahee ka jhaadoo pher doonga.” yah rabb-ul-afwaaj ka farmaan hai.
asooree fauj kee tabaahee
24rabb-ul-afwaaj nay qasam kha kar farmaaya hai, “yaqeenan sab kuchh meray mansoobay kay mutaabiq hee hoga, mera iraada zaroor poora ho jaaega. 25main asoor ko apnay mulk men chikna-choor kar doonga aur usay apnay pahaadon par kuchal daaloonga. tab us ka jooa meree qaum par say door ho jaaega, aur us ka bojh us kay kandhon par say utar jaaega.” 26pooree duniya kay baaray men yah mansooba atal hai, aur rabb apna haath tamaam qaumon kay khilaaf badha chuka hai. 27rabb-ul-afwaaj nay faisla kar liya hai, to kaun isay mansookh karega? us nay apna haath badha diya hai, to kaun usay rokega?
filistiyon ka anjaam qareeb hai
28zail ka kalaam us saal naazil hua jab aakhaz baadshaah nay vafaat paaee.
29ai tamaam filistee mulk, is par khushee mat mana ki hamen maarnay vaalee laathee toot gaee hai. kyoonki saamp kee bachee huee jad say zahereela saamp phoot niklega, aur us ka phal sholaafishaan udan’ajhdaha hoga. 30tab zarooratmandon ko charaagaah milegee, aur ghareeb mahfooz jagah par aaraam karengay. lekin teree jad ko main kaal say maar doonga, aur jo bach jaaen unhen bhee halaak kar doonga.
31ai shaher kay darvaazay, vaavaila kar! ai shaher, zor say cheekhen maar! ai filistiyo, himmat haar kar ladkhadaatay jaao. kyoonki shimaal say tumhaaree taraf dhuaan badh raha hai, aur us kee safon men peechhay rahenay vaala koee naheen hai. 32to phir hamaaray paas bhejay huay qaasidon ko ham kya javaab den? yah ki rabb nay siyyoon ko qaaim rakha hai, ki us kee qaum kay mazloom usee men panaah lengay.