Yashaayaah 13

baabal kay khilaaf elaan

¹darj-ay-zail baabal kay baaray men vah elaan hai jo yasaayaah bin aamoos nay roya men dekha.

²nangay pahaad par jhanda gaad do. unhen buland aavaaz do, haath hila kar unhen shurfa kay darvaazon men daakhil honay ka hukm do. ³main nay apnay muqaddaseen ko kaam par laga diya hai, main nay apnay soormaaon ko jo meree azmat kee khushee manaatay hain bula liya hai taaki meray ghazab ka aala-ay-kaar banen.

⁴suno! pahaadon par baday hujoom ka shor mach raha hai. suno! mut’addid mamaalik aur jama honay vaalee qaumon ka ghul-ghapaada sunaaee day raha hai. rabb-ul-afwaaj jang kay liyay fauj jama kar raha hai. ⁵us kay faujee doordaraaz ilaaqon balki aasmaan kee intiha say a rahay hain. kyoonki rabb apnay ghazab kay aalaat kay saath a raha hai taaki tamaam mulk ko barbaad kar day.

⁶vaavaila karo, kyoonki rabb ka din qareeb hee hai, vah din jab qaadir-ay-mutlaq kee taraf say tabaahee machegee. ⁷tab tamaam haath behiss-o-harkat ho jaaengay, aur har ek ka dil himmat haar dega. ⁸dahshat un par chha jaaegee, aur vah jaanaknee aur dard-ay-zah kee see girift men a kar janm denay vaalee aurat kee tarah tadpengay. ek doosray ko dar kay maaray ghoor ghoor kar un kay chiharay aag kee tarah tamatma rahay hongay.

⁹dekho, rabb ka berahem din a raha hai jab us ka qaher aur shadeed ghazab naazil hoga. us vaqt mulk tabaah ho jaaega aur gunaahgaar ko us men say mita diya jaaega. ¹⁰aasmaan kay sitaaray aur un kay jhurmat naheen chamkengay, sooraj tuloo hotay vaqt taareek hee rahega, aur chaand kee raushnee khatm hogee.

¹¹main duniya ko us kee badkaaree ka ajr aur bedeenon ko un kay gunaahon kee saza doonga, main shokhon ka ghamand khatm kar doonga aur zaalimon ka gharoor khaak men mila doonga. ¹²log khaalis sonay say kaheen ziyaada naayaab hongay, insaan ofeer kay qeemtee sonay kee nisbat kaheen ziyaada kamyaab hoga.

¹³kyoonki aasmaan rabb-ul-afwaaj kay qaher kay saamnay kaamp uthega, us kay shadeed ghazab kay naazil honay par zameen laraz kar apnee jagah say khisak jaaegee. ¹⁴baabal kay tamaam baashinday shikaaree kay saamnay daudnay vaalay ghazaal aur charvaahay say maheroom bhed-bakriyon kee tarah idhar udhar bhaag kar apnay mulk aur apnee qaum men vaapas aanay kee koshish karengay. ¹⁵jo bhee dushman kay qaaboo men aaega usay chheda jaaega, jisay bhee pakda jaaega usay talvaar say maara jaaega. ¹⁶un kay dekhtay dekhtay dushman un kay bachchon ko zameen par patakh dega aur un kay gharon ko loot kar un kee aurton kee ismatdaree karega.

¹⁷main maadiyon ko un par chadha laaoonga, aisay logon ko jinhen rishvat say naheen aazmaaya ja sakta, jo sonay-chaandee kee parva hee naheen kartay. ¹⁸un kay teer naujvaanon ko maar dengay. na vah sheerakhwaaron par taras khaaengay, na bachchon par rahem karengay.

baabal janglee jaanvaron ka ghar ban jaaegaa

¹⁹allaah baabal ko jo tamaam mamaalik ka taaj aur baabliyon ka khaas fakhar hai roo-ay-zameen par say mita daalega. us din vah sadoom aur amoora kee tarah tabaah ho jaaega. ²⁰aainda usay kabhee dubaara basaaya naheen jaaega, nasal-dar-nasal vah veeraan hee rahega. na badoo apna tamboo vahaan lagaaega, aur na gallaabaan apnay revad us men thaheraaega. ²¹sirf registaan kay jaanvar khandaraat men ja basengay. shaher kay ghar un kee aavaazon say goonj uthengay, uqaabee ulloo vahaan thaherengay, aur bakraanuma jin us men raqs karengay. ²²janglee kuttay us kay mahelon men roengay, aur geedad aish-o-ishrat kay qasron men apnee dard bharee aavaazen nikaalengay. baabal ka khaatma qareeb hee hai, ab der naheen lagegee.