Yashaayaah 11
maseeh kee pur’amn saltanat
1yassee [a] yassee say muraad hazrat daaood kee nasal hai (yassee hazrat daaood ka baap tha). kay mudh men say kompal phoot niklegee, aur us kee bachee huee jadon say shaakh nikal kar phal laaegee. 2rabb ka rooh us par thaherega yaanee hikmat aur samajh ka rooh, mashvarat aur quvvat ka rooh, irfaan aur rabb kay khauf ka rooh. 3rabb ka khauf usay azeez hoga. na vah dikhaavay kee bina par faisla karega, na sunee-sunaaee baaton kee bina par fatwa degaa 4balki insaaf say bebason kee adaalat karega aur ghairjaanibdaaree say mulk kay museebatazadon ka faisla karega. apnay kalaam kee laathee say vah zameen ko maarega aur apnay munh kee phoonk say bedeen ko halaak karega. 5vah raastbaazee kay patkay aur vafaadaaree kay zerjaamay say mulabbas rahega.
6bhediya us vaqt bhed kay bachchay kay paas thaherega, aur cheeta bhed kay bachchay kay paas aaraam karega. bachhda, javaan sherbabar aur mota-taaza bail mil kar rahengay, aur chhota ladka unhen haank kar sambhaalega . 7gaay reechh kay saath charegee, aur un kay bachchay ek doosray kay saath aaraam karengay. sherbabar bail kee tarah bhoosa khaaega. 8sheerakhwaar bachcha naag kee baambee kay qareeb khelega, aur javaan bachcha apna haath zahereelay saamp kay bil men daalega.
9meray tamaam muqaddas pahaad par na ghalat aur na tabaahakun kaam kiya jaaega. kyoonki mulk rabb kay irfaan say yoon maamoor hoga jis tarah samundar paanee say bhara raheta hai. 10us din yassee [b] yassee say muraad hazrat daaood kee nasal hai (yassee hazrat daaood ka baap tha). kee jad say phootee huee kompal ummaton kay liyay jhanda hoga. qaumen us kee taalib hongee, aur us kee sukoonatgaah jalaalee hogee.
rabb apnee qaum ko vaapas laaegaa
11us din rabb ek baar phir apna haath badhaaega taaki apnee qaum ka vah bacha khacha hissa dubaara haasil karay jo asoor, shimaalee aur junoobee misr, ethopiya, ailaam, baabal, hamaat aur saahilee ilaaqon men muntashir hoga. 12vah qaumon kay liyay jhanda gaad kar israaeel kay jilaavatanon ko ikattha karega. haan, vah yahoodaah kay bikhray afraad ko duniya kay chaaron konon say la kar jama karega. 13tab israaeel ka hasad khatm ho jaaega, aur yahoodaah kay dushman nest-o-naabood ho jaaengay. na israaeel yahoodaah say hasad karega, na yahoodaah israaeel say dushmanee rakhega. 14phir donon maghrib men filistee mulk par jhapat padengay aur mil kar mashriq kay baashindon ko loot lengay. adom aur moaab un kay qabzay men aaengay, aur ammon un kay taabay ho jaaega. 15rabb baher-ay-qulzum ko khushk karega aur saath saath darya-ay-furaat kay oopar haath hila kar us par zordaar hava chalaaega. tab darya saat aisee naheron men bat jaaega jo paidal hee paar kee ja sakengee. 16ek aisa raasta banega jo rabb kay bachay huay afraad ko asoor say israaeel tak pahunchaaega, bilkul us raastay kee tarah jis nay israaeeliyon ko misr say nikaltay vaqt israaeel tak pahunchaaya tha.