Yashaayaah 10
1tum par afsos jo ghalat qavaaneen saadir kartay aur zaalim fatway detay ho 2taaki ghareebon ka haq maaro aur mazloomon kay huqooq paamaal karo. bevaaen tumhaara shikaar hotee hain, aur tum yateemon ko loot letay ho. 3lekin adaalat kay din tum kya karogay, jab door door say zabardast toofaan tum par aan padega to tum madad kay liyay kis kay paas bhaagogay aur apna maal-o-daulat kahaan mahfooz rakh chhodogay? 4jo jhuk kar qaidee na banay vah gir kar halaak ho jaaega. taaham rabb ka ghazab thanda naheen hoga balki us ka haath maarnay kay liyay utha hee rahega.
asooree kee bhee adaalat hogee
5asoor par afsos jo meray ghazab ka aala hai, jis kay haath men meray qaher kee laathee hai. 6main usay ek bedeen qaum kay khilaaf bhej raha hoon, ek qaum kay khilaaf jo mujhay ghussa dilaatee hai. main nay asoor ko hukm diya hai ki usay loot kar galee kee keechad kee tarah paamaal kar.
7lekin us ka apna iraada farq hai. vah aisee soch naheen rakhta balki sab kuchh tabaah karnay par tula hua hai, bahut qaumon ko nest-o-naabood karnay par aamaada hai. 8vah fakhar karta hai, “meray tamaam afsar to baadshaah hain. 9phir hamaaree futoohaat par ghaur karo. karkimees, kalno, arfaad, hamaat, damishq aur saamriya jaisay tamaam shaher yakay baad deegray meray qabzay men a gaay hain. 10main nay kaee saltanaton par qaaboo pa liya hai jin kay but yarooshalam aur saamriya kay buton say kaheen behatar thay. 11saamriya aur us kay buton ko main barbaad kar chuka hoon, aur ab main yarooshalam aur us kay buton kay saath bhee aisa hee karoonga!”
12lekin koh-ay-siyyoon par aur yarooshalam men apnay tamaam maqaasid pooray karnay kay baad rabb faramaaega, “main shaah-ay-asoor ko bhee saza doonga, kyoonki us kay maghroor dil say kitna bura kaam ubhar aaya hai, aur us kee aankhen kitnay gharoor say dekhtee hain. 13vah shekhee maar kar kaheta hai, ‘main nay apnay hee zor-ay-baazoo aur hikmat say yah sab kuchh kar liya hai, kyoonki main samajhdaar hoon. main nay qaumon kee hudood khatm karkay un kay khazaanon ko loot liya aur zabardast saand kee tarah un kay baadshaahon ko maar maar kar khaak men mila diya hai. 14jis tarah koee apna haath ghonslay men daal kar anday nikaal leta hai usee tarah main nay qaumon kee daulat chheen lee hai. aam aadmee parindon ko bhaga kar un kay chhoday huay anday ikatthay kar leta hai jabki main nay yahee sulook duniya kay tamaam mamaalik kay saath kiya. jab main unhen apnay qabzay men laaya to ek nay bhee apnay paron ko phadphadaanay ya chonch khol kar cheen cheen karnay kee jur’at na kee’.”
15lekin kya kulhaadee us kay saamnay shekhee baghaartee jo usay chalaata hai? kya aaree us kay saamnay apnay aap par fakhar kartee jo usay istemaal karta hai? yah utna hee naamumkin hai jitna yah ki laathee pakadnay vaalay ko ghumaaay ya danda aadmee ko uthaaay.
16chunaanchay qaadir-ay-mutlaq rabb-ul-afwaaj asoor kay motay-taazay faujiyon men ek marz phaila dega jo un kay jismon ko rafta rafta zaaay karega. asoor kee shaan-o-shaukat kay neechay ek bhadaktee huee aag lagaaee jaaegee. 17us vaqt israaeel ka noor aag aur israaeel ka quddoos shola ban kar asoor kee kaantedaar jhaadiyon aur oontakataaron ko ek hee din men bhasm kar dega. 18vah us kay shaandaar jangalon aur baaghon ko mukammal taur par tabaah kar dega, aur vah mareez kee tarah ghul ghul kar zaail ho jaaengay. 19jangalon kay itnay kam darakht bachengay ki bachcha bhee unhen gin kar kitaab men darj kar sakega.
israaeel ka chhota sa hissa bach jaaegaa
20us din say israaeel ka baqiya yaanee yaaqoob kay gharaanay ka bacha khacha hissa us par mazeed inhisaar naheen karega jo usay maarta raha tha, balki vah pooree vafaadaaree say israaeel kay quddoos, rabb par bharosa rakhega. 21baqiya vaapas aaega, yaaqoob ka bacha khacha hissa qavee khuda kay huzoor laut aaega. 22ai israaeel, go too saahil par kee ret jaisa beshumaar kyoon na ho to bhee sirf ek bacha hua hissa vaapas aaega. teray barbaad honay ka faisla ho chuka hai, aur insaaf ka sailaab mulk par aanay vaala hai. 23kyoonki is ka atal faisla ho chuka hai ki qaadir-ay-mutlaq rabb-ul-afwaaj pooray mulk par halaakat laanay ko hai.
24is liyay qaadir-ay-mutlaq rabb-ul-afwaaj farmaata hai, “ai siyyoon men basnay vaalee meree qaum, asoor say mat darna jo laathee say tujhay maarta hai aur teray khilaaf laathee yoon uthaata hai jis tarah pahelay misr kiya karta tha. 25mera tujh par ghussa jald hee thanda ho jaaega aur mera ghazab asooriyon par naazil ho kar unhen khatm karega.” 26jis tarah rabb-ul-afwaaj nay midiyaaniyon ko maara jab jidaaoon nay oreb kee chataan par unhen shikast dee usee tarah vah asooriyon ko bhee koday say maarega. aur jis tarah rabb nay apnee laathee moosa kay zareeay samundar kay oopar uthaaee aur nateejay men misr kee fauj us men doob gaee bilkul usee tarah vah asooriyon kay saath bhee karega. 27us din asoor ka bojh teray kandhon par say utar jaaega, aur us ka jooa teree gardan par say door ho kar toot jaaega.
yavarashalam kee taraf faatih kee taraqqee
faatih nay yasheemon kee taraf say chadh kar 28ayyaat par hamla kiya hai. us nay mijron men say guzar kar mikmaas men apna lashkree saamaan chhod rakha hai. 29darray ko paar karkay vah kahetay hain, “aaj ham raat ko jiba men guzaarengay.” raama tharathra raha aur saaool ka shaher jibia bhaag gaya hai. 30ai jalleem betee, zor say cheekhen maar! ai laisa, dhyaan day! ai antot, usay javaab day! 31madmeena faraar ho gaya aur jebeem kay baashindon nay doosree jagahon men panaah lee hai. 32aaj hee faatih nob kay paas ruk kar siyyoon betee kay pahaad yaanee koh-ay-yarooshalam kay oopar haath hilaaegaa [a] ek aur mumkina tarjuma : aaj hee faatih nob kay paas ruk kar koh-ay-yarooshalam kay oopar haath hilaaega taaki usay bada banaaay. .
33dekho, qaadir-ay-mutlaq rabb-ul-afwaaj baday zor say shaakhon ko todnay vaala hai. tab oonchay oonchay darakht kat kar gir jaaengay, aur jo sarfaraaz hain unhen khaak men milaaya jaaega. 34vah kulhaadee lay kar ghanay jangal ko kaat daalega balki lubnaan bhee zoraavar kay haathon gir jaaega.