Yashaayaah 1

¹zail men vah royaaen darj hain jo yasaayaah bin aamoos nay yahoodaah aur yarooshalam kay baaray men dekheen aur jo un saalon men munkashif hueen jab uzziyaah, yootaam, aakhaz aur hizaqiyaah yahoodaah kay baadshaah thay.

israaeelee apnay aaqa ko jaannay say inkaar kartay hain

²ai aasmaan, meree baat sun! ai zameen, meray alfaaz par kaan dhar! kyoonki rabb nay farmaaya hai,

“jin bachchon kee parvarish main nay kee hai aur jo meray zer-ay-nigraanee parvaan chadhay hain, unhon nay mujh say rishta tod liya hai. ³bail apnay maalik ko jaanta aur gadha apnay aaqa kee charnee ko pahechaanata hai, lekin israaeel itna naheen jaanta, meree qaum samajh say khaalee hai.”

⁴ai gunaahgaar qaum, tujh par afsos! ai sangeen qusoor men phansee huee ummat, tujh par afsos! shareer nasal, badachalan bachchay! unhon nay rabb ko tark kar diya hai. haan, unhon nay israaeel kay quddoos ko haqeer jaan kar radd kiya, apna munh us say pher liya hai. ⁵ab tumhen mazeed kahaan peeta jaaay? tumhaaree zid to mazeed badhtee ja rahee hai go poora sar zakhmee aur poora dil beemaar hai. ⁶chaand say lay kar talvay tak poora jism majrooh hai, har jagah choten, ghaao aur taaza taaza zarben lagee hain. aur na unhen saaf kiya gaya, na un kee marham-pattee kee gaee hai.

⁷tumhaara mulk veeraan-o-sunsaan ho gaya hai, tumhaaray shaher bhasm ho gaay hain. tumhaaray dekhtay dekhtay pardesee tumhaaray kheton ko loot rahay hain, unhen yoon ujaad rahay hain jis tarah pardesee hee kar saktay hain. ⁸sirf yarooshalam hee baaqee rah gaya hai, siyyoon betee angoor kay baagh men jhompdee kee tarah akelee rah gaee hai. ab dushman say ghira hua yah shaher kheeray kay khet men lagay chhappar kee maanind hai. ⁹agar rabb-ul-afwaaj ham men say chand ek ko zinda na chhodta to ham sadoom kee tarah mit jaatay, hamaara amoora kee tarah satyaanaas ho jaata.

¹⁰ai sadoom kay sardaaro, rabb ka farmaan sun lo! ai amoora kay logo, hamaaray khuda kee hidaayat par dhyaan do! ¹¹rabb farmaata hai, “agar tum beshumaar qurbaaniyaan pesh karo to mujhay kya? main to bhasm honay vaalay mendhon aur motay-taazay bachhdon kee charbee say ukta gaya hoon. bailon, lelon aur bakron ka jo khoon mujhay pesh kiya jaata hai vah mujhay pasand naheen. ¹²kis nay tum say taqaaza kiya ki meray huzoor aatay vaqt meree baargaahon ko paaon talay raundo? ¹³ruk jaao! apnee bemaanee qurbaaniyaan mat pesh karo! tumhaaray bakhoor say mujhay ghin aatee hai. naay chaand kee eed aur sabat ka din mat manaao, logon ko ibaadat kay liyay jama na karo! main tumhaaray bedeen ijtima bardaasht hee naheen kar sakta. ¹⁴jab tum naay chaand kee eed aur baaqee taqreebaat manaatay ho to meray dil men nafrat paida hotee hai. yah meray liyay bhaaree bojh ban gaee hain jin say main tang a gaya hoon.

¹⁵beshak apnay haathon ko dua kay liyay uthaatay jaao, main dhyaan naheen doonga. go tum bahut ziyaada namaaz bhee padho, main tumhaaree naheen sunoonga, kyoonki tumhaaray haath khoon’aalooda hain. ¹⁶pahelay naha kar apnay aap ko paak-saaf karo. apnee shareer harkaton say baaz aao taaki vah mujhay nazar na aaen. apnee ghalat raahon ko chhod kar ¹⁷nek kaam karna seekh lo. insaaf kay taalib raho, mazloomon ka sahaara bano, yateemon ka insaaf karo aur bevaaon kay haq men lado!”

allaah apnee qaum kee adaalat karta hai

¹⁸rabb farmaata hai, “aao ham adaalat men ja kar ek doosray say muqaddma laden. agar tumhaaray gunaahon ka rang qirmizee ho jaaay to kya vah dubaara barf jaisay ujlay ho jaaengay? agar un ka rang arghvaanee ho jaaay to kya vah dubaara oon jaisay safed ho jaaengay? ¹⁹agar tum sunnay kay liyay tayyaar ho to mulk kee behtareen paidaavaar say lutf’andoz hogay. ²⁰lekin agar inkaar karkay sarkash ho jaao to talvaar kee zad men a kar mar jaaogay. is baat ka yaqeen karo, kyoonki rabb nay yah kuchh farmaaya hai.”

²¹yah kaisay ho gaya hai ki jo shaher pahelay itna vafaadaar tha vah ab kasbee ban gaya hai? pahelay yarooshalam insaaf say maamoor tha, aur raastee us men sukoonat kartee thee. lekin ab har taraf qaatil hee qaatil hain! ²²ai yarooshalam, teree khaalis chaandee khaam chaandee men badal gaee hai, teree behtareen mai men paanee milaaya gaya hai. ²³teray buzurg hatdharm aur choron kay yaar hain. yah rishvatkhor sab logon kay peechhay paday rahetay hain taaki chaay-paanee mil jaaay. na vah parva kartay hain ki yateemon ko insaaf milay, na bevaaon kee faryaad un tak pahunchtee hai.

²⁴is liyay qaadir-ay-mutlaq rabb-ul-afwaaj jo israaeel ka zabardast soorma hai farmaata hai, “aao, main apnay mukhaalifon aur dushmanon say intiqaam lay kar sukoon paaoon. ²⁵main teray khilaaf haath uthaaoonga aur khaam chaandee kee tarah tujhay potaash kay saath pighla kar tamaam mail say paak-saaf kar doonga. ²⁶main tujhay dubaara qadeem zamaanay kay say qaazee aur ibtida kay say musheer ata karoonga. phir yarooshalam dubaara daar-ul-insaaf aur vafaadaar shaher kahelaaega.”

²⁷allaah siyyoon kee adaalat karkay us ka fidya dega, jo us men tauba karengay un ka vah insaaf karkay unhen chhudaaega. ²⁸lekin baaghee aur gunaahgaar sab kay sab paash paash ho jaaengay, rabb ko tark karnay vaalay halaak ho jaaengay.

²⁹baloot kay jin darakhton kee pooja say tum lutf’andoz hotay ho un kay baais tum sharmasaar hogay, aur jin baaghon ko tum nay apnee butparastee kay liyay chun liya hai un kay baais tumhen sharm aaegee. ³⁰tum us baloot kay darakht kee maanind hogay jis kay pattay murjha gaay hon, tumhaaree haalat us baagh kee see hogee jis men paanee naayaab ho. ³¹zabardast aadmee phoos aur us kee ghalat harkaten chingaaree jaisee hongee. donon mil kar yoon bhadak uthengay ki koee bhee bujha naheen sakega.