Ibraaniyon 9

duniyaavee aur aasmaanee ibaadat

¹jab pahela ahd baandha gaya to ibaadat karnay kay liyay hidaayaat dee gaeen. zameen par ek maqdis bhee banaaya gaya, ²ek khaima jis kay pahelay kamray men shamaadaan, mez aur us par padee makhsoos kee gaee rotiyaan theen. us ka naam “muqaddas kamra” tha. ³us kay peechhay ek aur kamra tha jis ka naam “muqaddastareen kamra” tha. pahelay aur doosray kamray kay darmiyaan vaaqay darvaazay par parda laga tha. ⁴is pichhlay kamray men bakhoor jalaanay kay liyay sonay kee qurbaangaah aur ahd ka sandooq tha. ahd kay sandooq par sona mandha hua tha aur us men teen cheezen theen : sonay ka martabaan jis men mann bhara tha, haaroon ka vah asa jis say komplen phoot niklee theen aur patthar kee vah do takhtiyaan jin par ahd kay ahkaam likhay thay. ⁵sandooq par ilaahee jalaal kay do karoobee farishtay lagay thay jo sandooq kay dhaknay ko saaya detay thay jis ka naam “kaffaara ka dhakna” tha. lekin is jagah par ham sab kuchh mazeed tafseel say bayaan naheen karna chaahatay.

⁶yah cheezen isee tarteeb say rakhee jaatee hain. jab imaam apnee khidmat kay faraaiz ada kartay hain to baaqaaidagee say pahelay kamray men jaatay hain. ⁷lekin sirf imaam-ay-aazam hee doosray kamray men daakhil hota hai, aur vah bhee saal men sirf ek dafa. jab bhee vah jaata hai vah apnay saath khoon lay kar jaata hai jisay vah apnay aur qaum kay liyay pesh karta hai taaki vah gunaah mit jaaen jo logon nay ghairiraadee taur par kiay hotay hain. ⁸is say rooh-ul-quds dikhaata hai ki muqaddastareen kamray tak rasaaee us vaqt tak zaahir naheen kee gaee thee jab tak pahela kamra istemaal men tha. ⁹yah majaazan maujooda zamaanay kee taraf ishaara hai. is ka matlab yah hai ki jo nazraanay aur qurbaaniyaan pesh kee ja rahee hain vah parastaar kay zameer ko paak-saaf karkay kaamil naheen bana sakteen. ¹⁰kyoonki in ka taalluq sirf khaanay-peenay vaalee cheezon aur ghusal kee mukhtalif rasmon say hota hai, aisee zaahiree hidaayaat jo sirf naay nizaam kay aanay tak laagoo hain.

¹¹lekin ab maseeh a chuka hai, un achchhee cheezon ka imaam-ay-aazam jo ab haasil huee hain. jis khaimay men vah khidmat karta hai vah kaheen ziyaada azeem aur kaamil hai. yah khaima insaanee haathon say naheen banaaya gaya yaanee yah is kaainaat ka hissa naheen hai. ¹²jab maseeh ek baar sada kay liyay khaimay kay muqaddastareen kamray men daakhil hua to us nay qurbaaniyaan pesh karnay kay liyay bakron aur bachhdon ka khoon istemaal na kiya. is kay bajaay us nay apna hee khoon pesh kiya aur yoon hamaaray liyay abdee najaat haasil kee. ¹³puraanay nizaam men bail-bakron ka khoon aur javaan gaay kee raakh naapaak logon par chhidkay jaatay thay taaki un kay jism paak-saaf ho jaaen. ¹⁴agar in cheezon ka yah asar tha to phir maseeh kay khoon ka kya zabardast asar hoga! azlee rooh kay zareeay us nay apnay aap ko bedaagh qurbaanee kay taur par pesh kiya. yoon us ka khoon hamaaray zameer ko maut tak pahunchaanay vaalay kaamon say paak-saaf karta hai taaki ham zinda khuda kee khidmat kar saken.

¹⁵yahee vajah hai ki maseeh ek naay ahd ka darmiyaanee hai. maqsad yah tha ki jitnay logon ko allaah nay bulaaya hai unhen allaah kee mauooda aur abdee meeraas milay. aur yah sirf is liyay mumkin hua hai ki maseeh nay mar kar fidya diya taaki log un gunaahon say chhutkaara paaen jo un say us vaqt sarzad huay jab vah pahelay ahd kay tahet thay.

¹⁶jahaan vasiyat hai vahaan zarooree hai ki vasiyat karnay vaalay kee maut kee tasdeeq kee jaaay. ¹⁷kyoonki jab tak vasiyat karnay vaala zinda ho vasiyat beasar hotee hai. is ka asar vasiyat karnay vaalay kee maut hee say shuroo hota hai. ¹⁸yahee vajah hai ki pahela ahd baandhtay vaqt bhee khoon istemaal hua. ¹⁹kyoonki pooree qaum ko shareeat ka har hukm sunaanay kay baad moosa nay bachhdon ka khoon paanee say mila kar usay zoofay kay guchchhay aur qirmizee rang kay dhaagay kay zareeay shareeat kee kitaab aur pooree qaum par chhidka. ²⁰us nay kaha, “yah khoon us ahd kee tasdeeq karta hai jis kee pairvee karnay ka hukm allaah nay tumhen diya hai.” ²¹isee tarah moosa nay yah khoon mulaaqaat kay khaimay aur ibaadat kay tamaam saamaan par chhidka. ²²na sirf yah balki shareeat taqaaza kartee hai ki taqreeban har cheez ko khoon hee say paak-saaf kiya jaaay balki allaah kay huzoor khoon pesh kiay baghair muaafee mil hee naheen saktee.

maseeh kee qurbaanee gunaahon ko mita detee hai

²³gharaz, laazim tha ki yah cheezen jo aasmaan kee aslee cheezon kee naqlee soorten hain paak-saaf kee jaaen. lekin aasmaanee cheezen khud aisee qurbaaniyon ka mutaalba kartee hain jo in say kaheen behatar hon. ²⁴kyoonki maseeh sirf insaanee haathon say banay maqdis men daakhil naheen hua jo aslee maqdis kee sirf naqlee soorat thee balki vah aasmaan men hee daakhil hua taaki ab say hamaaree khaatir allaah kay saamnay haazir ho. ²⁵duniya ka imaam-ay-aazam to saalaana kisee aur (yaanee jaanvar) ka khoon lay kar muqaddastareen kamray men daakhil hota hai. lekin maseeh is liyay aasmaan men daakhil na hua ki vah apnay aap ko baar baar qurbaanee kay taur par pesh karay. ²⁶agar aisa hota to usay duniya kee takhleeq say lay kar aaj tak bahut dafa dukh sahena padta. lekin aisa naheen hai balki ab vah zamaanon kay ikhtitaam par ek hee baar sada kay liyay zaahir hua taaki apnay aap ko qurbaan karnay say gunaah ko door karay. ²⁷ek baar marna aur allaah kee adaalat men haazir hona har insaan kay liyay muqarrar hai. ²⁸isee tarah maseeh ko bhee ek hee baar bahuton kay gunaahon ko utha kar lay jaanay kay liyay qurbaan kiya gaya. doosree baar jab vah zaahir hoga to gunaahon ko door karnay kay liyay zaahir naheen hoga balki unhen najaat denay kay liyay jo shiddat say us ka intizaar kar rahay hain.