Ibraaniyon 8

eesa hamaara imaam-ay-aazam

¹jo kuchh ham kah rahay hain us kee markzee baat yah hai, hamaara ek aisa imaam-ay-aazam hai jo aasmaan par jalaalee khuda kay takht kay dahenay haath baitha hai. ²vahaan vah maqdis men khidmat karta hai, us haqeeqee mulaaqaat kay khaimay men jisay insaanee haathon nay khada naheen kiya balki rabb nay.

³har imaam-ay-aazam ko nazraanay aur qurbaaniyaan pesh karnay kay liyay muqarrar kiya jaata hai. is liyay laazim hai ki hamaaray imaam-ay-aazam kay paas bhee kuchh ho jo vah pesh kar sakay. ⁴agar yah duniya men hota to imaam-ay-aazam na hota, kyoonki yahaan imaam to hain jo shareeat kay matlooba nazraanay pesh kartay hain. ⁵jis maqdis men vah khidmat kartay hain vah us maqdis kee sirf naqlee soorat aur saaya hai jo aasmaan par hai. yahee vajah hai ki allaah nay moosa ko mulaaqaat ka khaima banaanay say pahelay aagaah karkay yah kaha, “ghaur kar ki sab kuchh ain us namoonay kay mutaabiq banaaya jaaay jo main tujhay yahaan pahaad par dikhaata hoon.” ⁶lekin jo khidmat eesa ko mil gaee hai vah duniya kay imaamon kee khidmat say kaheen behatar hai, utnee behatar jitna vah ahd jis ka darmiyaanee eesa hai puraanay ahd say behatar hai. kyoonki yah ahd behatar vaadon kee bunyaad par baandha gaya.

⁷agar pahela ahd beilzaam hota to phir naay ahd kee zaroorat na hotee. ⁸lekin allaah ko apnee qaum par ilzaam lagaana pada. us nay kaha,

“rabb ka farmaan hai, aisay din a rahay hain

jab main israaeel kay gharaanay aur yahoodaah kay gharaanay say ek naya ahd baandhoonga.

⁹yah us ahd kee maanind naheen hogaa

jo main nay un kay baapdaada kay saath

us din baandha tha jab main un ka haath pakad kar

unhen misr say nikaal laaya.

kyoonki vah us ahd kay vafaadaar na rahe

jo main nay un say baandha tha.

nateejay men meree un kay liyay fikr na rahee.

¹⁰khudaavand farmaata hai ki

jo naya ahd main un dinon kay baad un say baandhoongaa

us kay tahet main apnee shareeat

un kay zahenon men daal kar

un kay dilon par kanda karoonga.

tab main hee un ka khuda hoonga, aur vah meree qaum hongay.

¹¹us vaqt say is kee zaroorat naheen rahegee

ki koee apnay padosee ya bhaaee ko taaleem day kar kahay,

‘rabb ko jaan lo.’

kyoonki chhotay say lay kar baday tak

sab mujhay jaanengay,

¹²kyoonki main un ka qusoor muaaf karoongaa

aur aainda un kay gunaahon ko yaad naheen karoonga.”

¹³in alfaaz men allaah ek naay ahd ka zikr karta hai aur yoon puraanay ahd ko matrook qaraar deta hai. aur jo matrook aur puraana hai us ka anjaam qareeb hee hai.