Ibraaniyon 7

malik-ay-sidq

¹yah malik-ay-sidq, saalim ka baadshaah aur allaah t’aala ka imaam tha. jab ibraaheem chaar baadshaahon ko shikast denay kay baad vaapas a raha tha to malik-ay-sidq us say mila aur usay barkat dee. ²is par ibraaheem nay usay tamaam loot kay maal ka dasvaan hissa day diya. ab malik-ay-sidq ka matlab “raastbaazee ka baadshaah” hai. doosray, “saalim ka baadshaah” ka matlab “salaamatee ka baadshaah” hai. ³na us ka baap ya maan hai, na koee nasabnaama. us kee zindagee ka na to aaghaaz hai, na ikhtitaam. allaah kay farzand kee tarah vah abad tak imaam raheta hai.

⁴ghaur karen ki vah kitna azeem tha. hamaaray baapdaada ibraaheem nay usay lootay huay maal ka dasvaan hissa day diya. ⁵ab shareeat talab kartee hai ki laavee kee vah aulaad jo imaam ban jaatee hai qaum yaanee apnay bhaaiyon say paidaavaar ka dasvaan hissa lay, haalaanki un kay bhaaee ibraaheem kee aulaad hain. ⁶lekin malik-ay-sidq laavee kee aulaad men say naheen tha. to bhee us nay ibraaheem say dasvaan hissa lay kar usay barkat dee jis say allaah nay vaada kiya tha. ⁷is men koee shak naheen ki kamaheisiyat shakhs ko us say barkat miltee hai jo ziyaada haisiyat ka ho. ⁸jahaan laavee imaamon ka taalluq hai faanee insaan dasvaan hissa letay hain. lekin malik-ay-sidq kay muaamalay men yah hissa us ko mila jis kay baaray men gavaahee dee gaee hai ki vah zinda raheta hai. ⁹yah bhee kaha ja sakta hai ki jab ibraaheem nay maal ka dasvaan hissa day diya to laavee nay us kay zareeay bhee yah hissa diya, haalaanki vah khud dasvaan hissa leta hai. ¹⁰kyoonki go laavee us vaqt paida naheen hua tha to bhee vah ek tarah say ibraaheem kay jism men maujood tha jab malik-ay-sidq us say mila.

¹¹agar laavee kee kahaanat (jis par shareeat mabnee thee) kaamiliyat paida kar saktee to phir ek aur qism kay imaam kee kya zaroorat hotee, us kee jo haaroon jaisa na ho balki malik-ay-sidq jaisa? ¹²kyoonki jab bhee kahaanat badal jaatee hai to laazim hai ki shareeat men bhee tabdeelee aaay. ¹³aur hamaara khudaavand jis kay baaray men yah bayaan kiya gaya hai vah ek farq qabeelay ka fard tha. us kay qabeelay kay kisee bhee fard nay imaam kee khidmat ada naheen kee. ¹⁴kyoonki saaf maaloom hai ki khudaavand maseeh yahoodaah qabeelay ka fard tha, aur moosa nay is qabeelay ko imaamon kee khidmat men shaamil na kiya.

malik-ay-sidq jaisa ek aur imaam

¹⁵muaamala mazeed saaf ho jaata hai. ek farq imaam zaahir hua hai jo malik-ay-sidq jaisa hai. ¹⁶vah laavee kay qabeelay ka fard honay say imaam na bana jis tarah shareeat taqaaza kartee thee, balki vah laafaanee zindagee kee quvvat hee say imaam ban gaya. ¹⁷kyoonki kalaam-ay-muqaddas farmaata hai,

“too abad tak imaam hai,

aisa imaam jaisa malik-ay-sidq tha.”

¹⁸yoon puraanay hukm ko mansookh kar diya jaata hai, kyoonki vah kamzor aur bekaar thaa ¹⁹(moosa kee shareeat to kisee cheez ko kaamil naheen bana saktee thee) aur ab ek behatar ummeed muhayya kee gaee hai jis say ham allaah kay qareeb a jaatay hain.

²⁰aur yah naya nizaam allaah kee qasam say qaaim hua. aisee koee qasam na khaaee gaee jab doosray imaam banay. ²¹lekin eesa ek qasam kay zareeay imaam ban gaya jab allaah nay farmaaya,

“rabb nay qasam khaaee hai

aur is say pachhataaega naheen,

‘too abad tak imaam hai’.”

²²is qasam kee vajah say eesa ek behatar ahd kee zamaanat deta hai.

²³ek aur farq, puraanay nizaam men bahut say imaam thay, kyoonki maut nay har ek kee khidmat mahdood kiay rakhee. ²⁴lekin choonki eesa abad tak zinda hai is liyay us kee kahaanat kabhee bhee khatm naheen hogee. ²⁵yoon vah unhen abdee najaat day sakta hai jo us kay vaseelay say allaah kay paas aatay hain, kyoonki vah abad tak zinda hai aur un kee shafaaat karta raheta hai.

²⁶hamen aisay hee imaam-ay-aazam kee zaroorat thee. haan, aisa imaam jo muqaddas, bequsoor, bedaagh, gunaahgaaron say alag aur aasmaanon say buland hua hai. ²⁷usay doosray imaamon kee tarah is kee zaroorat naheen ki har roz qurbaaniyaan pesh karay, pahelay apnay liyay phir qaum kay liyay. balki us nay apnay aap ko pesh karkay apnee is qurbaanee say un kay gunaahon ko ek baar sada kay liyay mita diya. ²⁸moosvee shareeat aisay logon ko imaam-ay-aazam muqarrar kartee hai jo kamzor hain. lekin shareeat kay baad allaah kee qasam farzand ko imaam-ay-aazam muqarrar kartee hai, aur yah farzand abad tak kaamil hai.