Ibraaniyon 6

¹is liyay aaen, ham maseeh kay baaray men bunyaadee taaleem ko chhod kar balooghat kee taraf aagay badhen. kyoonki aisee baaten duharaanay kee zaroorat naheen honee chaahiay jin say eemaan kee bunyaad rakhee jaatee hai, maslan maut tak pahunchaanay vaalay kaam say tauba, ²baptisma kya hai, kisee par haath rakhnay kee taaleem, murdon kay jee uthnay aur abdee saza paanay kee taaleem. ³chunaanchay allaah kee marzee huee to ham yah chhod kar aagay badhengay.

⁴naamumkin hai ki unhen bahaal karkay dubaara tauba tak pahunchaaya jaaay jinhon nay apna eemaan tark kar diya ho. unhen to ek baar allaah kay noor men laaya gaya tha, unhon nay aasmaan kee nemat chakh lee thee, vah rooh-ul-quds men shareek huay, ⁵unhon nay allaah kay kalaam kee bhalaaee aur aanay vaalay zamaanay kee kuvvaton ka tajriba kiya tha. ⁶aur phir unhon nay apna eemaan tark kar diya! aisay logon ko bahaal karkay dubaara tauba tak pahunchaana naamumkin hai. kyoonki aisa karnay say vah allaah kay farzand ko dubaara masloob karkay usay laan-taan ka nishaana bana detay hain.

⁷allaah us zameen ko barkat deta hai jo apnay par baar baar padnay vaalee baarish ko jazab karkay aisee fasal paida kartee hai jo kheteebaadee karnay vaalay kay liyay mufeed ho. ⁸lekin agar vah sirf khaardaar pauday aur oontkataaray paida karay to vah bekaar hai aur is khatray men hai ki us par laanat bhejee jaaay. anjaam-ay-kaar us par ka sab kuchh jalaaya jaaega.

⁹azeezo, go ham is tarah kee baaten kar rahay hain to bhee hamaara etimaad yah hai ki aap ko vah behtareen barkaten haasil hain jo najaat say miltee hain. ¹⁰kyoonki allaah beinsaaf naheen hai. vah aap ka kaam aur vah muhabbat naheen bhoolega jo aap nay us ka naam lay kar zaahir kee jab aap nay muqaddaseen kee khidmat kee balki aaj tak kar rahay hain. ¹¹lekin hamaaree badee khwaahish yah hai ki aap men say har ek isee sargarmee ka izhaar aakhir tak karta rahay taaki jin baaton kee ummeed aap rakhtay hain vah vaaqaee pooree ho jaaen. ¹²ham naheen chaahatay ki aap sust ho jaaen balki yah ki aap un kay namoonay par chalen jo eemaan aur sabr say vah kuchh meeraas men pa rahay hain jis ka vaada allaah nay kiya hai.

allaah ka yaqeenee vaadaa

¹³jab allaah nay qasam kha kar ibraaheem say vaada kiya to us nay apnee hee qasam kha kar yah vaada kiya. kyoonki koee aur naheen tha jo us say bada tha jis kee qasam vah kha sakta. ¹⁴us vaqt us nay kaha, “main zaroor tujhay bahut barkat doonga, aur main yaqeenan tujhay kasrat kee aulaad doonga.” ¹⁵is par ibraaheem nay sabr say intizaar karkay vah kuchh paaya jis ka vaada kiya gaya tha. ¹⁶qasam khaatay vaqt log us kee qasam khaatay hain jo un say bada hota hai. is tarah say qasam men bayaanakarada baat kee tasdeeq bahs-mubaahasa kee har gunjaaish ko khatm kar detee hai. ¹⁷allaah nay bhee qasam kha kar apnay vaaday kee tasdeeq kee. kyoonki vah apnay vaaday kay vaarison par saaf zaahir karna chaahata tha ki us ka iraada kabhee naheen badlega. ¹⁸gharaz, yah do baaten qaaim rahee hain, allaah ka vaada aur us kee qasam. vah inhen na to badal sakta na in kay baaray men jhoot bol sakta hai. yoon ham jinhon nay us kay paas panaah lee hai badee tasallee pa kar us ummeed ko mazbootee say thaamay rakh saktay hain jo hamen pesh kee gaee hai. ¹⁹kyoonki yah ummeed hamaaree jaan kay liyay mazboot langar hai. aur yah aasmaanee bait-ul-muqaddas kay muqaddastareen kamray kay parday men say guzar kar us men daakhil hotee hai. ²⁰vaheen eesa hamaaray aagay aagay ja kar hamaaree khaatir daakhil hua hai. yoon vah malik-ay-sidq kee maanind hamesha kay liyay imaam-ay-aazam ban gaya hai.