Ibraaniyon 5
1ab insaanon men say chunay gaay imaam-ay-aazam ko is liyay muqarrar kiya jaata hai ki vah un kee khaatir allaah kee khidmat karay, taaki vah gunaahon kay liyay nazraanay aur qurbaaniyaan pesh karay. 2vah jaahil aur aavaara logon kay saath narm sulook rakh sakta hai, kyoonki vah khud kaee tarah kee kamzoriyon kee girift men hota hai. 3yahee vajah hai ki usay na sirf qaum kay gunaahon kay liyay balki apnay gunaahon kay liyay bhee qurbaaniyaan chadhaanee padtee hain. 4aur koee apnee marzee say imaam-ay-aazam ka purvaqaar uhda naheen apna sakta balki laazim hai ki allaah usay haaroon kee tarah bula kar muqarrar karay.
5isee tarah maseeh nay bhee apnee marzee say imaam-ay-aazam ka purvaqaar uhda naheen apnaaya. is kay bajaay allaah nay us say kaha,
“too mera farzand hai,
aaj main tera baap ban gaya hoon.”
6kaheen aur vah farmaata hai,
“too abad tak imaam hai,
aisa imaam jaisa malik-ay-sidq tha.”
7jab eesa is duniya men tha to us nay zor zor say pukaar kar aur aansoo baha baha kar usay duaaen aur iltijaaen pesh keen [a] yaanee imaam kee haisiyat say us nay yah duaaen aur iltijaaen qurbaanee kay taur par pesh keen. jo usay maut say bacha sakta tha. aur allaah nay us kee sunee, kyoonki vah khuda ka khauf rakhta tha. 8vah allaah ka farzand to tha, to bhee us nay dukh uthaanay say faramaambardaaree seekhee. 9jab vah kaamiliyat tak pahunch gaya to vah un sab kee abdee najaat ka sarchashma ban gaya jo us kee suntay hain. 10us vaqt allaah nay usay imaam-ay-aazam bhee mut’ayyin kiya, aisa imaam jaisa malik-ay-sidq tha.
eemaan tark karnay kee baabat aagaahee
11is kay baaray men ham mazeed bahut kuchh kah saktay hain, lekin ham mushkil say is kee tashreeh kar saktay hain, kyoonki aap sunnay men sust hain. 12asal men itna vaqt guzar gaya hai ki ab aap ko khud ustaad hona chaahiay. afsos ki aisa naheen hai balki aap ko is kee zaroorat hai ki koee aap kay paas a kar aap ko allaah kay kalaam kee bunyaadee sachchaaiyaan dubaara sikhaaay. aap ab tak thos khaana naheen kha saktay balki aap ko doodh kee zaroorat hai. 13jo doodh hee pee sakta hai vah abhee chhota bachcha hee hai aur vah raastbaazee kee taaleem say naavaaqif hai. 14is kay muqaablay men thos khaana baalighon kay liyay hai jinhon nay apnee balooghat kay baais apnee ruhaanee basaarat ko itnee tarbiyat dee hai ki vah bhalaaee aur buraaee men imtiyaaz kar saktay hain.