Ibraaniyon 4
1dekhen, ab tak allaah ka yah vaada qaaim hai, aur ab tak ham sukoon kay mulk men daakhil ho saktay hain. is liyay aaen, ham khabardaar rahen. aisa na ho ki aap men say koee peechhay rah kar us men daakhil na honay paaay. 2kyoonki hamen bhee un kee tarah ek khushkhabaree sunaaee gaee. lekin yah paighaam un kay liyay befaaida tha, kyoonki vah usay sun kar eemaan na laaay. 3un kee nisbat ham jo eemaan laaay hain sukoon kay is mulk men daakhil ho saktay hain.
gharaz, yah aisa hee hai jis tarah allaah nay farmaaya,
“apnay ghazab men main nay qasam khaaee,
‘yah kabhee us mulk men daakhil naheen honge
jahaan main unhen sukoon deta’.”
ab ghaur karen ki us nay yah kaha agarchi us ka kaam duniya kee takhleeq par ikhtitaam tak pahunch gaya tha. 4kyoonki kalaam-ay-muqaddas men saatven din kay baaray men likha hai, “saatven din allaah ka saara kaam takmeel tak pahunch gaya. is say faarigh ho kar us nay aaraam kiya.” 5ab is ka muqaabla mazkoora aayat say karen,
“yah kabhee us mulk men daakhil naheen honge
jahaan main unhen sukoon deta.”
6jinhon nay pahelay allaah kee khushkhabaree sunee unhen naaframaan honay kee vajah say yah sukoon na mila. to bhee yah baat qaaim rahee ki kuchh to sukoon kay is mulk men daakhil ho jaaengay. 7yah madd-ay-nazar rakh kar allaah nay ek aur din muqarrar kiya, mazkoora “aaj” ka din. kaee saalon kay baad hee us nay daaood kee maarifat vah baat kee jis par ham ghaur kar rahay hain,
“agar tum aaj allaah kee aavaaz suno
to apnay dilon ko sakht na karo.”
8jab yashooa unhen mulk-ay-kan’aan men laaya tab us nay israaeeliyon ko yah sukoon na diya, varna allaah is kay baad kay kisee aur din ka zikr na karta. 9chunaanchay allaah kee qaum kay liyay ek khaas sukoon baaqee rah gaya hai, aisa sukoon jo allaah kay saatven din aaraam karnay say mutaabiqat rakhta hai. 10kyoonki jo bhee vah sukoon paata hai jis ka vaada allaah nay kiya vah allaah kee tarah apnay kaamon say faarigh ho kar aaraam karega. 11is liyay aaen, ham is sukoon men daakhil honay kee pooree koshish karen taaki ham men say koee bhee baapdaada kay naaframaan namoonay par chal kar gunaah men na gir jaaay.
12kyoonki allaah ka kalaam zinda, muassir aur har dodhaaree talvaar say ziyaada tez hai. vah insaan men say guzar kar us kee jaan rooh say aur us kay jodon ko gooday say alag kar leta hai. vahee dil kay khayaalaat aur soch ko jaanch kar un par faisla karnay kay qaabil hai. 13koee makhlooq bhee allaah kee nazar say naheen chhup saktee. us kee aankhon kay saamnay jis kay javaabdih ham hotay hain sab kuchh ayaan aur beniqaab hai.
eesa hamaara imaam-ay-aazam hai
14gharaz aaen, ham us eemaan say liptay rahen jis ka iqraar ham kartay hain. kyoonki hamaara aisa azeem imaam-ay-aazam hai jo aasmaanon men say guzar gaya yaanee eesa allaah ka farzand. 15aur vah aisa imaam-ay-aazam naheen hai jo hamaaree kamzoriyon ko dekh kar hamdardee na dikhaaay balki agarchi vah begunaah raha to bhee hamaaree tarah usay har qism kee aazmaaish ka saamna karna pada. 16ab aaen, ham pooray etimaad kay saath allaah kay takht kay saamnay haazir ho jaaen jahaan fazl paaya jaata hai. kyoonki vaheen ham vah rahem aur fazl paaengay jo zaroorat kay vaqt hamaaree madad kar sakta hai.