Ibraaniyon 3
eesa moosa say bada hai
1muqaddas bhaaiyo, jo meray saath allaah kay bulaaay huay hain! eesa par ghaur-o-khauz kartay rahen jo allaah ka paighambar aur imaam-ay-aazam hai aur jis ka ham iqraar kartay hain. 2eesa allaah ka vafaadaar raha jab us nay usay yah kaam karnay kay liyay muqarrar kiya, bilkul usee tarah jis tarah moosa bhee vafaadaar raha jab allaah ka poora ghar us kay sapurd kiya gaya. 3ab jo kisee ghar ko taameer karta hai usay ghar kee nisbat ziyaada izzat haasil hotee hai. isee tarah eesa moosa kee nisbat ziyaada izzat kay laaiq hai. 4kyoonki har ghar ko kisee na kisee nay banaaya hota hai, jabki allaah nay sab kuchh banaaya hai. 5moosa to allaah kay pooray ghar men khidmat kartay vaqt vafaadaar raha, lekin mulaazim kee haisiyat say taaki kalaam-ay-muqaddas kee aanay vaalee baaton kee gavaahee deta rahay. 6maseeh farq hai. usay farzand kee haisiyat say allaah kay ghar par ikhtiyaar hai aur isee men vah vafaadaar hai. ham us ka ghar hain basharteeki ham apnee dileree aur vah ummeed qaaim rakhen jis par ham fakhar kartay hain.
allaah kee qaum kay liyay sukoon
7chunaanchay jis tarah rooh-ul-quds farmaata hai,
“agar tum aaj allaah kee aavaaz suno
8to apnay dilon ko sakht na karo jis tarah baghaavat kay din hua,
jab tumhaaray baapdaada nay registaan men mujhay aazmaaya.
9vahaan unhon nay mujhay aazmaaya aur jaancha,
haalaanki unhon nay chaalees saal kay dauraan meray kaam dekh liyay thay.
10is liyay mujhay us nasal par ghussa aaya aur main bola,
‘un kay dil hamesha saheeh raah say hat jaatay hain
aur vah meree raahen naheen jaantay.’
11apnay ghazab men main nay qasam khaaee,
‘yah kabhee us mulk men daakhil naheen honge
jahaan main unhen sukoon deta’.”
12bhaaiyo, khabardaar rahen taaki aap men say kisee ka dil buraaee aur kufr say bhar kar zinda khuda say bargashta na ho jaaay. 13is kay bajaay jab tak allaah ka yah farmaan qaaim hai rozaana ek doosray kee hausalaaafzaaee karen taaki aap men say koee bhee gunaah kay fareb men a kar sakhtdil na ho. 14baat yah hai ki ham maseeh kay shareek-ay-kaar ban gaay hain. lekin is shart par ki ham aakhir tak vah etimaad mazbootee say qaaim rakhen jo ham aaghaaz men rakhtay thay.
15mazkoora kalaam men likha hai,
“agar tum aaj allaah kee aavaaz suno,
to apnay dilon ko sakht na karo jis tarah baghaavat kay din hua.”
16yah kaun thay jo allaah kee aavaaz sun kar baaghee ho gaay? vah sab jinhen moosa misr say nikaal kar baahar laaya. 17aur yah kaun thay jin say allaah chaalees saal kay dauraan naaraaz raha? yah vahee thay jinhon nay gunaah kiya aur jo registaan men mar kar vaheen paday rahay. 18allaah nay kin kee baabat qasam khaaee ki “yah kabhee bhee us mulk men daakhil naheen hongay jahaan main unhen sukoon deta”? zaahir hai un kee baabat jinhon nay naafarmaanee kee thee. 19chunaanchay ham dekhtay hain ki vah eemaan na rakhnay kee vajah say mulk men daakhil na ho sakay.