Ibraaniyon 2
najaat kee azmat
1is liyay laazim hai ki ham aur ziyaada dhyaan say kalaam-ay-muqaddas kee un baaton par ghaur karen jo ham nay sun lee hain. aisa na ho ki ham samundar par bekaaboo kashtee kee tarah bemaqsad idhar udhar phiren. 2jo kalaam farishton nay insaan tak pahunchaaya vah to anmit raha, aur jis say bhee koee khata ya naafarmaanee huee usay us kee munaasib saza milee. 3to phir ham kis tarah allaah kay ghazab say bach sakengay agar ham maseeh kee itnee azeem najaat ko nazar’andaaz karen? pahelay khudaavand nay khud is najaat ka elaan kiya, aur phir aisay logon nay hamaaray paas a kar is kee tasdeeq kee jinhon nay usay sun liya tha. 4saath saath allaah nay is baat kee is tarah tasdeeq bhee kee ki us nay apnee marzee kay mutaabiq ilaahee nishaan, mojizay aur mukhtalif qism kay zordaar kaam dikhaaay aur rooh-ul-quds kee nemten logon men taqseem keen.
maseeh ka najaatabakhsh kaam
5ab aisa hai ki allaah nay mazkoora aanay vaalee duniya ko farishton kay taabay naheen kiya. 6kyoonki kalaam-ay-muqaddas men kisee nay kaheen yah gavaahee dee hai,
“insaan kaun hai ki too usay yaad kare
ya aadamzaad ki too us ka khayaal rakhay?
7too nay usay thodee der kay liyay farishton say kam kar diya,
too nay usay jalaal aur izzat ka taaj pahena kar
8sab kuchh us kay paaon kay neechay kar diya.”
jab likha hai ki sab kuchh us kay paaon talay kar diya gaya to is ka matlab hai ki koee cheez na rahee jo us kay taabay naheen hai. beshak hamen haal men yah baat nazar naheen aatee ki sab kuchh us kay taabay hai, 9lekin ham usay zaroor dekhtay hain jo “thodee der kay liyay farishton say kam” tha yaanee eesa ko jisay us kee maut tak kay dukh kee vajah say “jalaal aur izzat ka taaj” pahenaaya gaya hai. haan, allaah kay fazl say us nay sab kee khaatir maut bardaasht kee. 10kyoonki yahee munaasib tha ki allaah jis kay liyay aur jis kay vaseelay say sab kuchh hai yoon bahut say beton ko apnay jalaal men shareek karay ki vah un kee najaat kay baanee eesa ko dukh uthaanay say kaamiliyat tak pahunchaaay.
11eesa aur vah jinhen vah makhsoos-o-muqaddas kar deta hai donon ka ek hee baap hai. yahee vajah hai ki eesa yah kahenay say naheen sharmaata ki muqaddaseen meray bhaaee hain. 12maslan vah allaah say kaheta hai,
“main apnay bhaaiyon kay saamnay teray naam ka elaan karoonga,
jamaaat kay darmiyaan hee teree madahsaraaee karoonga.”
13vah yah bhee kaheta hai, “main us par bharosa rakhoonga.” aur phir “main haazir hoon, main aur vah bachchay jo allaah nay mujhay diay hain.”
14ab choonki yah bachchay gosht-post aur khoon kay insaan hain is liyay eesa khud un kee maanind ban gaya aur un kee insaanee fitrat men shareek hua. kyoonki is tarah hee vah apnee maut say maut kay maalik iblees ko tabaah kar saka, 15aur is tarah hee vah unhen chhuda saka jo maut say darnay kee vajah say zindagee bhar ghulaamee men thay. 16zaahir hai ki jin kee madad vah karta hai vah farishtay naheen hain balki ibraaheem kee aulaad. 17is liyay laazim tha ki vah har lihaaz say apnay bhaaiyon kee maanind ban jaaay. sirf is say us ka yah maqsad poora ho saka ki vah allaah kay huzoor ek raheem aur vafaadaar imaam-ay-aazam ban kar logon kay gunaahon ka kaffaara day sakay. 18aur ab vah un kee madad kar sakta hai jo aazmaaish men uljhay huay hain, kyoonki us kee bhee aazmaaish huee aur us nay khud dukh uthaaya hai.