Ibraaniyon 13

ham allaah ko kis tarah pasand aaen

¹ek doosray say bhaaiyon kee see muhabbat rakhtay rahen. ²mehamaan-navaazee mat bhoolna, kyoonki aisa karnay say baaz nay naadaanista taur par farishton kee mehamaan-navaazee kee hai. ³jo qaid men hain, unhen yoon yaad rakhna jaisay aap khud un kay saath qaid men hon. aur jin kay saath badasulookee ho rahee hai unhen yoon yaad rakhna jaisay aap say yah badasulookee ho rahee ho.

⁴laazim hai ki sab kay sab izdivaajee zindagee ka ehatiraam karen. shauhar aur beevee ek doosray kay vafaadaar rahen, kyoonki allaah zinaakaaron aur shaadee ka bandhan todnay vaalon kee adaalat karega.

⁵aap kee zindagee paison kay laalach say aazaad ho. usee par iktifa karen jo aap kay paas hai, kyoonki allaah nay farmaaya hai, “main tujhay kabhee naheen chhodoonga, main tujhay kabhee tark naheen karoonga.” ⁶is liyay ham etimaad say kah saktay hain,

“rabb meree madad karnay vaala hai,

is liyay main naheen daroonga.

insaan mera kya bigaad sakta hai?”

⁷apnay raahanumaaon ko yaad rakhen jinhon nay aap ko allaah ka kalaam sunaaya. is par ghaur karen ki un kay chaal-chalan say kitnee bhalaaee paida huee hai, aur un kay eemaan kay namoonay par chalen. ⁸eesa maseeh maazee men, aaj aur abad tak yaksaan hai. ⁹tarah tarah kee aur begaana taaleemaat aap ko idhar udhar na bhatkaaen. aap to allaah kay fazl say taqviyat paatay hain aur is say naheen ki aap mukhtalif khaanon say parhez kartay hain. is men koee khaas faaida naheen hai.

¹⁰hamaaray paas ek aisee qurbaangaah hai jis kee qurbaanee khaana mulaaqaat kay khaimay men khidmat karnay vaalon kay liyay mana hai. ¹¹kyoonki go imaam-ay-aazam jaanvaron ka khoon gunaah kee qurbaanee kay taur par muqaddastareen kamray men lay jaata hai, lekin un kee laashon ko khaimaagaah kay baahar jalaaya jaata hai. ¹²is vajah say eesa ko bhee shaher kay baahar saleebee maut sahenee padee taaki qaum ko apnay khoon say makhsoos-o-muqaddas karay. ¹³is liyay aaen, ham khaimaagaah say nikal kar us kay paas jaaen aur us kee beizzatee men shareek ho jaaen. ¹⁴kyoonki yahaan hamaara koee qaaim rahenay vaala shaher naheen hai balki ham aanay vaalay shaher kee shadeed aarzoo rakhtay hain. ¹⁵chunaanchay aaen, ham eesa kay vaseelay say allaah ko hamd-o-sana kee qurbaanee pesh karen, yaanee hamaaray honton say us kay naam kee taareef karnay vaala phal niklay. ¹⁶neez, bhalaaee karna aur doosron ko apnee barkaat men shareek karna mat bhoolna, kyoonki aisee qurbaaniyaan allaah ko pasand hain.

¹⁷apnay raahanumaaon kee sunen aur un kee baat maanen. kyoonki vah aap kee dekh-bhaal kartay kartay jaagtay rahetay hain, aur is men vah allaah kay saamnay javaabdih hain. un kee baat maanen taaki vah khushee say apnee khidmat sar’anjaam den. varna vah karaahatay karaahatay apnee zimmaadaaree nibhaaengay, aur yah aap kay liyay mufeed naheen hoga.

¹⁸hamaaray liyay dua karen, go hamen yaqeen hai ki hamaara zameer saaf hai aur ham har lihaaz say achchhee zindagee guzaarnay kay khwaahishmand hain.

¹⁹main khaaskar is par zor dena chaahata hoon ki aap dua karen ki allaah mujhay aap kay paas jald vaapas aanay kee taufeeq bakhshay.

aakhiree duaa

²⁰ab salaamatee ka khuda jo abdee ahd kay khoon say hamaaray khudaavand aur bhedon kay azeem charvaahay eesa ko murdon men say vaapas laayaa ²¹vah aap ko har achchhee cheez say navaazay taaki aap us kee marzee pooree kar saken. aur vah eesa maseeh kay zareeay ham men vah kuchh paida karay jo usay pasand aaay. us ka jalaal azal say abad tak hota rahay! aameen.

aakhiree alfaaz

²²bhaaiyo, meharbaanee karkay naseehat kee in baaton par sanjeedgee say ghaur karen, kyoonki main nay aap ko sirf chand alfaaz likhay hain. ²³yah baat aap kay ilm men honee chaahiay ki hamaaray bhaaee teemuthiyus ko riha kar diya gaya hai. agar vah jaldee pahunchay to usay saath lay kar aap say milnay aaoonga.

²⁴apnay tamaam raahanumaaon aur tamaam muqaddaseen ko mera salaam kahena. itlee kay eemaandaar aap ko salaam kahetay hain.

²⁵allaah ka fazl aap sab kay saath rahay.