Ibraaniyon 12
allaah hamaara baap
1gharaz, ham gavaahon kay itnay baday lashkar say gheray rahetay hain! is liyay aaen, ham sab kuchh utaaren jo hamaaray liyay rukaavat ka baais ban gaya hai, har gunaah ko jo hamen aasaanee say uljha leta hai. aaen, ham saabitqadmee say us daud men daudtay rahen jo hamaaray liyay muqarrar kee gaee hai. 2aur daudtay huay ham eesa ko taktay rahen, usay jo eemaan ka baanee bhee hai aur usay takmeel tak pahunchaanay vaala bhee. yaad rahay ki go vah khushee haasil kar sakta tha to bhee us nay saleebee maut kee sharmanaak beizzatee kee parva na kee balki usay bardaasht kiya. aur ab vah allaah kay takht kay dahenay haath ja baitha hai!
3us par dhyaan den jis nay gunaahgaaron kee itnee mukhaalafat bardaasht kee. phir aap thaktay thaktay bedil naheen ho jaaengay. 4dekhen, aap gunaah say laday to hain, lekin abhee tak aap ko jaan denay tak is kee mukhaalafat naheen karnee padee. 5kya aap kalaam-ay-muqaddas kee yah hausalaaafza baat bhool gaay hain jo aap ko allaah kay farzand thahera kar bayaan kartee hai,
“meray betay, rabb kee tarbiyat ko haqeer mat jaan,
jab vah tujhay daantay to na bedil ho.
6kyoonki jo rabb ko piyaara hai us kee vah taadeeb karta hai,
vah har ek ko saza deta hai
jisay us nay betay kay taur par qabool kiya hai.”
7apnee museebaton ko ilaahee tarbiyat samajh kar bardaasht karen. is men allaah aap say beton ka sa sulook kar raha hai. kya kabhee koee beta tha jis kee us kay baap nay tarbiyat na kee? 8agar aap kee tarbiyat sab kee tarah na kee jaatee to is ka matlab yah hota ki aap allaah kay haqeeqee farzand na hotay balki naajaaiz aulaad. 9dekhen, jab hamaaray insaanee baap nay hamaaree tarbiyat kee to ham nay us kee izzat kee. agar aisa hai to kitna ziyaada zarooree hai ki ham apnay ruhaanee baap kay taabay ho kar zindagee paaen. 10hamaaray insaanee baapon nay hamen apnee samajh kay mutaabiq thodee der kay liyay tarbiyat dee. lekin allaah hamaaree aisee tarbiyat karta hai jo faaiday ka baais hai aur jis say ham us kee quddoosiyat men shareek honay kay qaabil ho jaatay hain. 11jab hamaaree tarbiyat kee jaatee hai to us vaqt ham khushee mahsoos naheen kartay balki gham. lekin jin kee tarbiyat is tarah hotee hai vah baad men raastbaazee aur salaamatee kee fasal kaattay hain.
hidaayaat
12chunaanchay apnay thakehaaray baazooon aur kamzor ghutnon ko mazboot karen. 13apnay raastay chalnay kay qaabil bana den taaki jo uzv langda hai us ka jod utar na jaae [a] ek aur mumkina tarjuma : jo langda hai vah bhatak na jaaay. balki shifa paaay.
14sab kay saath mil kar sulah-salaamatee aur quddoosiyat kay liyay jidd-o-jahd kartay rahen, kyoonki jo muqaddas naheen hai vah khudaavand ko kabhee naheen dekhega. 15is par dhyaan dena ki koee allaah kay fazl say maheroom na rahay. aisa na ho ki koee kadvee jad phoot niklay aur badh kar takleef ka baais ban jaaay aur bahuton ko naapaak kar day. 16dhyaan den ki koee bhee zinaakaar ya esau jaisa duniyaavee shakhs na ho jis nay ek hee khaanay kay ivz apnay vah mauroosee huqooq bech daalay jo usay baday betay kee haisiyat say haasil thay. 17aap ko bhee maaloom hai ki baad men jab vah yah barkat viraasat men paana chaahata tha to usay radd kiya gaya. us vaqt usay tauba ka mauqa na mila haalaanki us nay aansoo baha baha kar yah barkat haasil karnay kee koshish kee.
18aap us tarah allaah kay huzoor naheen aaay jis tarah israaeelee jab vah seena pahaad par pahunchay, us pahaad kay paas jisay chhua ja sakta tha. vahaan aag bhadak rahee thee, andhera hee andhera tha aur aandhee chal rahee thee. 19jab narsingay kee aavaaz sunaaee dee aur allaah un say hamkalaam hua to sunnay vaalon nay us say iltija kee ki hamen mazeed koee baat na bata. 20kyoonki vah yah hukm bardaasht naheen kar saktay thay ki “agar koee jaanvar bhee pahaad ko chhoo lay to usay sangasaar karna hai.” 21yah manzar itna haibtanaak tha ki moosa nay kaha, “main khauf kay maaray kaamp raha hoon.”
22naheen, aap siyyoon pahaad kay paas a gaay hain, yaanee zinda khuda kay shaher aasmaanee yarooshalam kay paas. aap beshumaar farishton aur jashn manaanay vaalee jamaaat kay paas a gaay hain, 23un pahelauthon kee jamaaat kay paas jin kay naam aasmaan par darj kiay gaay hain. aap tamaam insaanon kay munsif allaah kay paas a gaay hain aur kaamil kiay gaay raastbaazon kee roohon kay paas. 24neez aap naay ahd kay darmiyaanee eesa kay paas a gaay hain aur us chhidkaaay gaay khoon kay paas jo haabeel kay khoon kee tarah badla lenay kee baat naheen karta balki ek aisee muaafee deta hai jo kaheen ziyaada muassir hai. 25chunaanchay khabardaar rahen ki aap us kee sunnay say inkaar na karen jo is vaqt aap say hamkalaam ho raha hai. kyoonki agar israaeelee na bachay jab unhon nay duniyaavee paighambar moosa kee sunnay say inkaar kiya to phir ham kis tarah bachengay agar ham us kee sunnay say inkaar karen jo aasmaan say ham say hamkalaam hota hai. 26jab allaah seena pahaad par say bol utha to zameen kaamp gaee, lekin ab us nay vaada kiya hai, “ek baar phir main na sirf zameen ko hila doonga balki aasmaan ko bhee.” 27“ek baar phir” kay alfaaz is taraf ishaara kartay hain ki khalaq kee gaee cheezon ko hila kar door kiya jaaega aur nateejay men sirf vah cheezen qaaim rahengee jinhen hilaaya naheen ja sakta.
28chunaanchay aaen, ham shukrguzaar hon. kyoonki hamen ek aisee baadshaahee haasil ho rahee hai jisay hilaaya naheen ja sakta. haan, ham shukrguzaaree kee is rooh men ehatiraam aur khauf kay saath allaah kee pasandeeda parastish karen, 29kyoonki hamaara khuda haqeeqatan bhasm kar denay vaalee aag hai.