Ibraaniyon 11
eemaan
1eemaan kya hai? yah ki ham us men qaaim rahen jis par ham ummeed rakhtay hain aur ki ham us ka yaqeen rakhen jo ham naheen dekh saktay. 2eemaan hee say puraanay zamaanon kay logon ko allaah kee qabooliyat haasil huee.
3eemaan kay zareeay ham jaan letay hain ki kaainaat ko allaah kay kalaam say khalaq kiya gaya, ki jo kuchh ham dekh saktay hain nazar aanay vaalee cheezon say naheen bana.
4yah eemaan ka kaam tha ki haabeel nay allaah ko ek aisee qurbaanee pesh kee jo qaabeel kee qurbaanee say behatar thee. is eemaan kee bina par allaah nay usay raastbaaz thahera kar us kee achchhee gavaahee dee, jab us nay us kee qurbaaniyon ko qabool kiya. aur eemaan kay zareeay vah ab tak bolta raheta hai haalaanki vah murda hai. 5yah eemaan ka kaam tha ki hanook na mara balki zinda haalat men aasmaan par uthaaya gaya. koee bhee usay dhoond kar pa na saka kyoonki allaah usay aasmaan par utha lay gaya tha. vajah yah thee ki uthaaay jaanay say pahelay usay yah gavaahee milee ki vah allaah ko pasand aaya. 6aur eemaan rakhay baghair ham allaah ko pasand naheen a saktay. kyoonki laazim hai ki allaah kay huzoor aanay vaala eemaan rakhay ki vah hai aur ki vah unhen ajr deta hai jo us kay taalib hain.
7yah eemaan ka kaam tha ki nooh nay allaah kee sunee jab us nay usay aanay vaalee baaton kay baaray men aagaah kiya, aisee baaton kay baaray men jo abhee dekhnay men naheen aaee theen. nooh nay khuda ka khauf maan kar ek kashtee banaaee taaki us ka khaandaan bach jaaay. yoon us nay apnay eemaan kay zareeay duniya ko mujrim qaraar diya aur us raastbaazee ka vaaris ban gaya jo eemaan say haasil hotee hai.
8yah eemaan ka kaam tha ki ibraaheem nay allaah kee sunee jab us nay usay bula kar kaha ki vah ek aisay mulk men jaaay jo usay baad men meeraas men milega. haan, vah apnay mulk ko chhod kar ravaana hua, haalaanki usay maaloom na tha ki vah kahaan ja raha hai. 9eemaan kay zareeay vah vaada kiay huay mulk men ajnabee kee haisiyat say rahenay laga. vah khaimon men raheta tha aur isee tarah ishaaq aur yaaqoob bhee jo us kay saath usee vaaday kay vaaris thay. 10kyoonki ibraaheem us shaher kay intizaar men tha jis kee mazboot bunyaad hai aur jis ka naqsh banaanay aur taameer karnay vaala khud allaah hai.
11yah eemaan ka kaam tha ki ibraaheem baap bannay kay qaabil ho gaya, haalaanki vah budhaapay kee vajah say baap naheen ban sakta tha. isee tarah saara bhee bachchay janm naheen day saktee thee. lekin ibraaheem samajhta tha ki allaah jis nay vaada kiya hai vafaadaar hai. 12go ibraaheem taqreeban mar chuka tha to bhee usee ek shakhs say beshumaar aulaad niklee, taadaad men aasmaan par kay sitaaron aur saahil par kee ret kay zarron kay baraabar.
13yah tamaam log eemaan rakhtay rakhtay mar gaay. unhen vah kuchh na mila jis ka vaada kiya gaya tha. unhon nay usay sirf door hee say dekh kar khush’aamadeed [a] lafzee tarjuma : salaamee dee. salaam day kar izzat ka izhaar kiya. salyoot kiya. kaha. aur unhon nay tasleem kiya ki ham zameen par [b] zameen par ya mulk (yaanee kan’aan) men. sirf mehamaan aur aarizee taur par rahenay vaalay ajnabee hain. 14jo is qism kee baaten kartay hain vah zaahir kartay hain ki ham ab tak apnay vatan kee talaash men hain. 15agar un kay zahen men vah mulk hota jis say vah nikal aaay thay to vah ab bhee vaapas ja saktay thay. 16is kay bajaay vah ek behatar mulk yaanee ek aasmaanee mulk kee aarzoo kar rahay thay. is liyay allaah un ka khuda kahelaanay say naheen sharmaata, kyoonki us nay un kay liyay ek shaher tayyaar kiya hai.
17yah eemaan ka kaam tha ki ibraaheem nay us vaqt ishaaq ko qurbaanee kay taur par pesh kiya jab allaah nay usay aazmaaya. haan, vah apnay iklautay betay ko qurbaan karnay kay liyay tayyaar tha agarchi usay allaah kay vaaday mil gaay the 18ki “teree nasal ishaaq hee say qaaim rahegee.” 19ibraaheem nay socha, “allaah murdon ko bhee zinda kar sakta hai,” aur majaazan usay vaaqaee ishaaq murdon men say vaapas mil gaya.
20yah eemaan ka kaam tha ki ishaaq nay aanay vaalee cheezon kay lihaaz say yaaqoob aur esau ko barkat dee.
21yah eemaan ka kaam tha ki yaaqoob nay martay vaqt yoosuf kay donon beton ko barkat dee aur apnee laathee kay siray par tek laga kar allaah ko sijda kiya.
22yah eemaan ka kaam tha ki yoosuf nay martay vaqt yah peshgoee kee ki israaeelee misr say nikalengay balki yah bhee kaha ki nikaltay vaqt meree haddiyaan bhee apnay saath lay jaao.
23yah eemaan ka kaam tha ki moosa kay maan-baap nay usay paidaaish kay baad teen maah tak chhupaaay rakha, kyoonki unhon nay dekha ki vah khoobsoorat hai. vah baadshaah kay hukm kee khilaafvarzee karnay say na daray.
24yah eemaan ka kaam tha ki moosa nay parvaan chadh kar inkaar kiya ki usay firaaun kee betee ka beta thaheraaya jaaay. 25aarizee taur par gunaah say lutf’andoz honay kay bajaay us nay allaah kee qaum kay saath badasulookee ka nishaana bannay ko tarjeeh dee. 26vah samjha ki jab meree maseeh kee khaatir rusvaaee kee jaatee hai to yah misr kay tamaam khazaanon say ziyaada qeemtee hai, kyoonki us kee aankhen aanay vaalay ajr par lagee raheen.
27yah eemaan ka kaam tha ki moosa nay baadshaah kay ghussay say daray baghair misr ko chhod diya, kyoonki vah goya andekhay khuda ko musalsal apnee aankhon kay saamnay rakhta raha. 28yah eemaan ka kaam tha ki us nay fasah kee eed mana kar hukm diya ki khoon ko chaukhton par lagaaya jaaay taaki halaak karnay vaala farishta un kay pahelauthay beton ko na chhuay.
29yah eemaan ka kaam tha ki israaeelee baher-ay-qulzum men say yoon guzar sakay jaisay ki yah khushk zameen thee. jab misriyon nay yah karnay kee koshish kee to vah doob gaay.
30yah eemaan ka kaam tha ki saat din tak yareehoo shaher kee faseel kay gird chakkar lagaanay kay baad pooree deevaar gir gaee. 31yah bhee eemaan ka kaam tha ki raahab faahisha apnay shaher kay baaqee naaframaan baashindon kay saath halaak na huee, kyoonki us nay israaeelee jaasooson ko salaamatee kay saath khush’aamadeed kaha tha.
32main mazeed kya kuchh kahoon? meray paas itna vaqt naheen ki main jidaaoon, baraq, samsoon, iftaah, daaood, samooel aur nabiyon kay baaray men sunaata rahoon. 33yah sab eemaan kay sabab say hee kaamyaab rahay. vah baadashaahiyon par ghaalib aaay aur insaaf kartay rahay. unhen allaah kay vaaday haasil huay. unhon nay sherbabron kay munh band kar die 34aur aag kay bhadaktay sholon ko bujha diya. vah talvaar kee zad say bach niklay. vah kamzor thay lekin unhen quvvat haasil huee. jab jang chhid gaee to vah itnay taaqatvar saabit huay ki unhon nay ghairmulkee lashkaron ko shikast dee. 35eemaan rakhnay kay baais khavaateen ko un kay murda azeez zinda haalat men vaapas milay.
lekin aisay bhee thay jinhen tashaddud bardaasht karna pada aur jinhon nay aazaad ho jaanay say inkaar kiya taaki unhen ek behatar cheez yaanee jee uthnay ka tajriba haasil ho jaaay. 36baaz ko laan-taan aur kodon balki zanjeeron aur qaid ka bhee saamna karna pada. 37unhen sangasaar kiya gaya, unhen aaray say cheera gaya, unhen talvaar say maar daala gaya. baaz ko bhed-bakriyon kee khaalon men ghoomna phirna pada. zarooratmand haalat men unhen dabaaya aur un par zulm kiya jaata raha. 38duniya un kay laaiq naheen thee! vah veeraan jagahon men, pahaadon par, ghaaron aur gadhon men aavaara phirtay rahay.
39in sab ko eemaan kee vajah say achchhee gavaahee milee. to bhee inhen vah kuchh haasil na hua jis ka vaada allaah nay kiya tha. 40kyoonki us nay hamaaray liyay ek aisa mansooba banaaya tha jo kaheen behatar hai. vah chaahata tha ki yah log hamaaray baghair kaamiliyat tak na pahunchen.