Ibraaniyon 10
1moosvee shareeat aanay vaalee achchhee aur aslee cheezon kee sirf naqlee soorat aur saaya hai. yah un cheezon kee aslee shakl naheen hai. is liyay yah unhen kabhee bhee kaamil naheen kar saktee jo saal-ba-saal aur baar baar allaah kay huzoor a kar vahee qurbaaniyaan pesh kartay rahetay hain. 2agar vah kaamil kar saktee to qurbaaniyaan pesh karnay kee zaroorat na rahetee. kyoonki is soorat men parastaar ek baar sada kay liyay paak-saaf ho jaatay aur unhen gunaahgaar honay ka shaoor na raheta. 3lekin is kay bajaay yah qurbaaniyaan saal-ba-saal logon ko un kay gunaahon kee yaad dilaatee hain. 4kyoonki mumkin hee naheen ki bail-bakron ka khoon gunaahon ko door karay.
5is liyay maseeh duniya men aatay vaqt allaah say kaheta hai,
“too qurbaaniyaan aur nazren naheen chaahata thaa
lekin too nay meray liyay ek jism tayyaar kiya.
6bhasm honay vaalee qurbaaniyaan aur gunaah kee qurbaaniyaan
tujhay pasand naheen theen.
7phir main bol utha, ‘ai khuda, main haazir hoon
taaki teree marzee pooree karoon,
jis tarah meray baaray men kalaam-ay-muqaddas men [a] lafzee tarjuma : kitaab kay toomaar men. likha hai’.”
8pahelay maseeh kaheta hai, “na too qurbaaniyaan, nazren, bhasm honay vaalee qurbaaniyaan ya gunaah kee qurbaaniyaan chaahata tha, na unhen pasand karta tha” go shareeat inhen pesh karnay ka mutaalba kartee hai. 9phir vah farmaata hai, “main haazir hoon taaki teree marzee pooree karoon.” yoon vah pahela nizaam khatm karkay us kee jagah doosra nizaam qaaim karta hai. 10aur us kee marzee pooree ho jaanay say hamen eesa maseeh kay badan kay vaseelay say makhsoos-o-muqaddas kiya gaya hai. kyoonki usay ek hee baar sada kay liyay hamaaray liyay qurbaan kiya gaya.
11har imaam roz-ba-roz maqdis men khada apnee khidmat kay faraaiz ada karta hai. rozaana aur baar baar vah vahee qurbaaniyaan pesh karta raheta hai jo kabhee bhee gunaahon ko door naheen kar sakteen. 12lekin maseeh nay gunaahon ko door karnay kay liyay ek hee qurbaanee pesh kee, ek aisee qurbaanee jis ka asar sada kay liyay rahega. phir vah allaah kay dahenay haath baith gaya. 13vaheen vah ab intizaar karta hai jab tak allaah us kay dushmanon ko us kay paaon kee chaukee na bana day. 14yoon us nay ek hee qurbaanee say unhen sada kay liyay kaamil bana diya hai jinhen muqaddas kiya ja raha hai.
15rooh-ul-quds bhee hamen is kay baaray men gavaahee deta hai. pahelay vah kaheta hai,
16“rabb farmaata hai ki
jo naya ahd main un dinon kay baad un say baandhoongaa
us kay tahet main apnee shareeat
un kay dilon men daal kar
un kay zahenon par kanda karoonga.”
17phir vah kaheta hai, “us vaqt say main un kay gunaahon aur buraaiyon ko yaad naheen karoonga.” 18aur jahaan in gunaahon kee muaafee huee hai vahaan gunaahon ko door karnay kee qurbaaniyon kee zaroorat hee naheen rahee.
aaen, ham allaah kay huzoor aaen
19chunaanchay bhaaiyo, ab ham eesa kay khoon kay vaseelay say pooray etimaad kay saath muqaddastareen kamray men daakhil ho saktay hain. 20apnay badan kee qurbaanee say eesa nay us kamray kay parday men say guzarnay ka ek naya aur zindageebakhsh raasta khol diya. 21hamaara ek azeem imaam-ay-aazam hai jo allaah kay ghar par muqarrar hai. 22is liyay aaen, ham khuloosdilee aur eemaan kay pooray etimaad kay saath allaah kay huzoor aaen. kyoonki hamaaray dilon par maseeh ka khoon chhidka gaya hai taaki hamaaray mujrim zameer saaf ho jaaen. neez, hamaaray badnon ko paak-saaf paanee say dhoya gaya hai. 23aaen, ham mazbootee say us ummeed ko thaamay rakhen jis ka iqraar ham kartay hain. ham daanvaandol na ho jaaen, kyoonki jis nay is ummeed ka vaada kiya hai vah vafaadaar hai. 24aur aaen, ham is par dhyaan den ki ham ek doosray ko kis tarah muhabbat dikhaanay aur nek kaam karnay par ubhaar saken. 25ham baaham jama honay say baaz na aaen, jis tarah baaz kee aadat ban gaee hai. is kay bajaay ham ek doosray kee hausalaaafzaaee karen, khaaskar yah baat madd-ay-nazar rakh kar ki khudaavand ka din qareeb a raha hai.
26khabardaar! agar ham sachchaaee jaan lenay kay baad bhee jaan-boojh kar gunaah kartay rahen to maseeh kee qurbaanee in gunaahon ko door naheen kar sakegee. 27phir sirf allaah kee adaalat kee haulnaak tavaqqo baaqee rahegee, us bhadaktee huee aag kee jo allaah kay mukhaalifon ko bhasm kar daalegee. 28jo moosa kee shareeat radd karta hai us par rahem naheen kiya ja sakta balki agar do ya is say zaaid log is jurm kee gavaahee den to usay saza-ay-maut dee jaaay. 29to phir kya khayaal hai, vah kitnee sakht saza kay laaiq hoga jis nay allaah kay farzand ko paaon talay raunda? jis nay ahd ka vah khoon haqeer jaana jis say usay makhsoos-o-muqaddas kiya gaya tha? aur jis nay fazl kay rooh kee beizzatee kee? 30kyoonki ham usay jaantay hain jis nay farmaaya, “intiqaam lena mera hee kaam hai, main hee badla loonga.” us nay yah bhee kaha, “rabb apnee qaum ka insaaf karega.” 31yah ek haulnaak baat hai agar zinda khuda hamen saza denay kay liyay pakday.
32eemaan kay pahelay din yaad karen jab allaah nay aap ko raushan kar diya tha. us vaqt kay sakht muqaablay men aap ko kaee tarah ka dukh sahena pada, lekin aap saabitqadam rahay. 33kabhee kabhee aap kee beizzatee aur avaam kay saamnay hee eezaarasaanee hotee thee, kabhee kabhee aap un kay saathee thay jin say aisa sulook ho raha tha. 34jinhen jel men daala gaya aap un kay dukh men shareek huay aur jab aap ka maal-o-mata loota gaya to aap nay yah baat khushee say bardaasht kee. kyoonki aap jaantay thay ki vah maal ham say naheen chheen liya gaya jo pahelay kee nisbat kaheen behatar hai aur har soorat men qaaim rahega. 35chunaanchay apnay is etimaad ko haath say jaanay na den kyoonki is ka bada ajr milega. 36lekin is kay liyay aap ko saabitqadmee kee zaroorat hai taaki aap allaah kee marzee pooree kar saken aur yoon aap ko vah kuchh mil jaaay jis ka vaada us nay kiya hai. 37kyoonki kalaam-ay-muqaddas yah farmaata hai,
“thodee hee der baaqee hai
to aanay vaala pahunchega, vah der naheen karega.
38lekin mera raastbaaz eemaan hee say jeeta rahega,
aur agar vah peechhay hat jaae
to main us say khush naheen hoonga.”
39lekin ham un men say naheen hain jo peechhay hat kar tabaah ho jaaengay balki ham un men say hain jo eemaan rakh kar najaat paatay hain.