Ibraaniyon 1
allaah ka apnay farzand kay zareeay kalaam
1maazee men allaah mukhtalif mauqon par aur kaee tareeqon say hamaaray baapdaada say hamkalaam hua. us vaqt us nay yah nabiyon kay vaseelay say kiyaa 2lekin in aakhiree dinon men vah apnay farzand kay vaseelay say ham say hamkalaam hua, usee kay vaseelay say jisay us nay sab cheezon ka vaaris bana diya aur jis kay vaseelay say us nay kaainaat ko bhee khalaq kiya. 3farzand allaah ka shaandaar jalaal mun’akis karta aur us kee zaat kee ain shabeeh [a] ya naqsh. hai. vah apnay qavee kalaam say sab kuchh sambhaalay rakhta hai. jab vah duniya men tha to us nay hamaaray liyay gunaahon say paak-saaf ho jaanay ka intizaam qaaim kiya. is kay baad vah aasmaan par qaadir-ay-mutlaq kay dahenay haath ja baitha.
allaah kay farzand kee azmat
4farzand farishton say kaheen azeem hai, itna jitna us ka meeraas men paaya hua naam un kay naamon say azeem hai. 5kyoonki allaah nay kis farishtay say kabhee kaha,
“too mera farzand hai,
aaj main tera baap ban gaya hoon.”
yah bhee us nay kisee farishtay kay baaray men kabhee naheen kaha,
“main us ka baap hoongaa
aur vah mera farzand hoga.”
6aur jab allaah apnay pahelauthay farzand ko aasmaanee duniya men laata hai to vah farmaata hai,
“allaah kay tamaam farishtay us kee parastish karen.”
7farishton kay baaray men vah farmaata hai,
“vah apnay farishton ko havaaen
aur apnay khaadimon ko aag kay sholay bana deta hai.”
8lekin farzand kay baaray men vah kaheta hai,
“ai khuda, tera takht azal say abad tak qaaim-o-daaim rahega,
aur insaaf ka shaahee asa teree baadshaahee par hukoomat karega.
9too nay raastbaazee say muhabbat
aur bedeenee say nafrat kee,
is liyay allaah teray khuda nay tujhay khushee kay tel say masah karke
tujhay teray saathiyon say kaheen ziyaada sarfaraaz kar diya.”
10vah yah bhee farmaata hai,
“ai rabb, too nay ibtida men duniya kee bunyaad rakhee,
aur teray hee haathon nay aasmaanon ko banaaya.
11yah to tabaah ho jaaengay,
lekin too qaaim rahega.
yah sab libaas kee tarah ghis phat jaaenge
12aur too inhen chaadar kee tarah lapetega,
puraanay kapday kee tarah yah badlay jaaengay.
lekin too vahee ka vahee raheta hai,
aur teree zindagee kabhee khatm naheen hotee.”
13allaah nay kabhee bhee apnay kisee farishtay say yah baat na kahee,
“meray dahenay haath baith,
jab tak main teray dushmanon ko
teray paaon kee chaukee na bana doon.”
14phir farishtay kya hain? vah to sab khidmatguzaar roohen hain jinhen allaah un kee khidmat karnay kay liyay bhej deta hai jinhen meeraas men najaat paanee hai.