Hajjee 2
rabb ka naya ghar shaandaar hogaa
1usee saal kay saatven maheenay kay 21ven din [a] 17 aktoobar. hajjee nabee par rabb ka kalaam naazil hua, 2“yahoodaah kay gavarnar zarubbaabal bin siyaalteeel, imaam-ay-aazam yashooa bin yahoosadaq aur qaum kay bachay huay hissay ko bata dena,
3‘tum men say kis ko yaad hai ki rabb ka ghar tabaah honay say pahelay kitna shaandaar tha? jo is vaqt us kee jagah taameer ho raha hai vah tumhen kaisa lagta hai? rabb kay pahelay ghar kee nisbat yah kuchh bhee naheen lagta. 4lekin rabb farmaata hai ki ai zarubbaabal, hausla rakh! ai imaam-ay-aazam yashooa bin yahoosadaq hausla rakh! ai mulk kay tamaam baashindo, hausla rakh kar apna kaam jaaree rakho. kyoonki rabb-ul-afwaaj farmaata hai ki main tumhaaray saath hoon. 5jo ahd main nay misr say nikaltay vaqt tum say baandha tha vah qaaim rahega. mera rooh tumhaaray darmiyaan hee rahega. daro mat!
6rabb-ul-afwaaj farmaata hai ki thodee der kay baad main ek baar phir aasmaan-o-zameen aur baher-o-barr ko hila doonga. 7tab tamaam aqvaam laraz uthengee, un kay beshaqeemat khazaanay idhar laaay jaaengay, aur main is ghar ko apnay jalaal say bhar doonga. 8rabb-ul-afwaaj farmaata hai ki chaandee meree hai aur sona mera hai. 9naya ghar puraanay ghar say kaheen ziyaada shaandaar hoga, aur main is jagah ko salaamatee ata karoonga.’ yah rabb-ul-afwaaj ka farmaan hai.”
main tumhen dubaara barkat doongaa
10daara baadshaah kee hukoomat kay doosray saal men hajjee par rabb ka ek aur kalaam naazil hua. navven maheenay ka 24vaan din [b] 18 disambar. tha.
11“rabb-ul-afwaaj farmaata hai, ‘imaamon say savaal kar ki shareeat zail kay muaamalay kay baaray men kya farmaatee hai, 12agar koee shakhs makhsoos-o-muqaddas gosht apnee jholee men daal kar kaheen lay jaaay aur raastay men jholee mai, zaitoon kay tel, rotee ya mazeed kisee khaanay vaalee cheez say lag jaaay to kya khaanay vaalee yah cheez gosht say makhsoos-o-muqaddas ho jaatee hai’?”
hajjee nay imaamon ko yah savaal pesh kiya to unhon nay javaab diya, “naheen.” 13tab us nay mazeed poochha, “agar koee kisee laash ko chhoonay say naapaak ho kar in khaanay vaalee cheezon men say kuchh chhuay to kya khaanay vaalee cheez us say naapaak ho jaatee hai?”
imaamon nay javaab diya, “jee haan.”
14phir hajjee nay kaha, “rabb farmaata hai ki meree nazar men is qaum ka yahee haal hai. jo kuchh bhee yah kartay aur qurbaan kartay hain vah naapaak hai.
15lekin ab is baat par dhyaan do ki aaj say haalaat kaisay hongay. rabb kay ghar kee naay siray say bunyaad rakhnay say pahelay haalaat kaisay thay? 16jahaan tum fasal kee 20 boriyon kee ummeed rakhtay thay vahaan sirf 10 haasil hueen. jahaan tum angooron ko kuchal kar ras kay 100 litar kee tavaqqo rakhtay thay vahaan sirf 40 litar niklay.” 17rabb farmaata hai, “teree mehanat-mashaqqat zaaay huee, kyoonki main nay patrog, phaphoondee aur olon say tumhaaree paidaavaar ko nuqsaan pahunchaaya. to bhee tum nay tauba karkay meree taraf rujoo na kiya. 18lekin ab tavajjuh do ki tumhaara haal aaj yaanee navven maheenay kay 24ven din say kaisa hoga. is din rabb kay ghar kee bunyaad rakhee gaee, is liyay ghaur karo 19ki kya aainda bhee godaam men jamaashuda beej zaaay ho jaaega, ki kya aainda bhee angoor, anjeer, anaar aur zaitoon ka phal na honay kay baraabar hoga. kyoonki aaj say main tumhen barkat doonga.”
zarubbaabal say allaah ka vaadaa
20usee din hajjee par rabb ka ek aur kalaam naazil hua, 21“yahoodaah kay gavarnar zarubbaabal ko bata day ki main aasmaan-o-zameen ko hila doonga. 22main shaahee takhton ko ulat kar ajnabee saltanaton kee taaqat tabaah kar doonga. main rathon ko un kay rathbaanon samet ulat doonga, aur ghoday apnay savaaron samet gir jaaengay. har ek apnay bhaaee kee talvaar say marega.” 23rabb-ul-afwaaj farmaata hai, “us din main tujhay, apnay khaadim zarubbaabal bin siyaalteeel ko lay kar muhar kee angoothee kee maanind bana doonga, kyoonki main nay tujhay chun liya hai.” yah rabb-ul-afwaaj ka farmaan hai.