Hajjee 1
rabb kay ghar ko dubaara banaanay ka hukm
1faars kay baadshaah daara kee hukoomat kay doosray saal men hajjee nabee par rabb ka kalaam naazil hua. chhatay maheenay ka pahela din [a] 29 agast. tha. kalaam men allaah yahoodaah kay gavarnar zarubbaabal bin siyaalteeel aur imaam-ay-aazam yashooa bin yahoosadaq say mukhaatib hua.
2-3 rabb-ul-afwaaj farmaata hai, “yah qaum kahetee hai, ‘abhee rabb kay ghar ko dubaara taameer karnay ka vaqt naheen aaya.’ 4kya yah theek hai ki tum khud lakdee say sajay huay gharon men rahetay ho jabki mera ghar ab tak malbay ka dher hai?” 5rabb-ul-afwaaj farmaata hai, “apnay haal par ghaur karo. 6tum nay bahut beej boya lekin kam fasal kaatee hai. tum khaana to khaatay ho lekin bhookay rahetay ho, paanee to peetay ho lekin piyaasay rahetay ho, kapday to pahentay ho lekin sardee lagtee hai. aur jab koee paisay kama kar unhen apnay batvay men daalta hai to us men sooraakh hain.”
7rabb-ul-afwaaj farmaata hai, “apnay haal par dhyaan day kar us ka saheeh nateeja nikaalo! 8pahaadon par chadh kar lakdee lay aao aur rabb kay ghar kee taameer shuroo karo. aisa hee ravayya mujhay pasand hoga, aur is tarah hee tum mujhay jalaal dogay.” yah rabb ka farmaan hai. 9“dekho, tum nay bahut barkat paanay kee tavaqqo kee, lekin kya hua? kam hee haasil hua. aur jo kuchh tum apnay ghar vaapas laaay usay main nay hava men uda diya. kyoon? main, rabb-ul-afwaaj tumhen is kee asal vajah bataata hoon. mera ghar ab tak malbay ka dher hai jabki tum men say har ek apna apna ghar mazboot karnay kay liyay bhaag-daud kar raha hai. 10isee liyay aasmaan nay tumhen os say aur zameen nay tumhen faslon say maheroom kar rakha hai. 11isee liyay main nay hukm diya ki kheton men aur pahaadon par kaal paday, ki mulk ka anaaj, angoor, zaitoon balki zameen kee har paidaavaar us kee lapet men a jaaay. insaan-o-haivaan us kee zad men a gaay hain, aur tumhaaree mehanat-mashaqqat zaaay ho rahee hai.”
12tab zarubbaabal bin siyaalteeel, imaam-ay-aazam yashooa bin yahoosadaq aur qaum kay pooray bachay huay hissay nay rabb apnay khuda kee sunee. jo bhee baat rabb un kay khuda nay hajjee nabee ko sunaanay ko kaha tha usay unhon nay maan liya. rabb ka khauf pooree qaum par taaree hua. 13tab rabb nay apnay paighambar hajjee kee maarifat unhen yah paighaam diya, “rabb farmaata hai, main tumhaaray saath hoon.”
14-15 yoon rabb nay yahoodaah kay gavarnar zarubbaabal bin siyaalteeel, imaam-ay-aazam yashooa bin yahoosadaq aur qaum kay bachay huay hissay ko rabb kay ghar kee taameer karnay kee tahereek dee. daara baadshaah kee hukoomat kay doosray saal men vah a kar rabb-ul-afwaaj apnay khuda kay ghar par kaam karnay lagay. chhatay maheenay ka 24vaan din [b] 21 sitambar. tha.